RDP oku na iilyo yi li 250 000

NONANDE ongundu yo Rally for Democracy and Progress (RDP) oya totwa po ashike oomwedhi 17 dha piti po, omwaalu gwiilyo yopaati ndjika ogwa koka na pethimbo ndika oyi na iilyo yi li 250 000, Omupresidende gwa RDP Hidipo Hamutenya, osho a popi ngaaka.

Hamutenya shika okwe shi popi poshigongi sha RDP sha li mu Katutura mOlyomakaya ga zi ko.
‘Otandi vulu okutseyitha kutya ngashiingeyi RDP oku na iilyo yi na uukalta yi li 250 000, shoka shi li esindano enene kopaati yi na ashike oomwedhi 17,’ Hamutenya osho a lombwele ongundu yaantu ye li 500 lwampoka, mboka ya li ya nyanyukwa noonkondo mokuuva ngaaka.
Poshigongi shika, iilyo yo RDP oya li wo ya pewa ompito okupula omapulo kombinga yOmanifesto yOmahogololo gOpaati yawo. Omanifesto ya RDP oya li ya topolelwa aantu poshigongi shika.
‘Tse otwa mana (ongonga) Omanifesto yetu na otse opaati yotango okuninga ngaaka. Opaati yimwe, ndjoka ya zi nale nale, inayi ninga natango ngaaka,’ Hamutenya ta popi ngaaka, ta popi opaati yo Swapo. ‘Aantu oya yuulukwa okumona elunduluko na elunduluka otali okupitila mu RDP,’ ta tsikile ko ngaaka.
Hamutenya okwa ti Epagelo lyo Swapo olya ndopa okundalupa omukundu gwokwaaheniilonga mu Namibia nosho wo okugandja elongo li li nawa, tali dheula aantu nawa.
‘Aawiliki yopaati tayi pangel ohaya popi ashike piigongi, ihe olopota yawo ompe yaashoka sha ningwa po kEpangelo lyoSwapo okuza momumvo 2004, otayi sitha ohoni,’ Hamutenya ta popi.
Okuza mpoka, Amushanga-Ndjayi gwa RDP, Jesaya Nyamu, okw ali nee a yamukula komapulo kombinga yeuvaneko lya RDP kutya ota ka gandja elongo lyoshali sigo omOgrade 12 nokombinga yomulandu gwawo gwAakiina mu Namibia.
‘Tse otwa mana mo uuna ta tu ti Epangelo lyo RDP otali ka gandja elongo lyoshali okuza mOprimasikola sigo opehulilo lyOsekundosikola,’ Nyamu ta popi. Kombinga yomulandu gwa RDP kombinga yAakiina, Nyamu okwa ti Aakiini oye li oye li oshitopolwa shomwaalu gwaantu muuyuni na itaya vulu okukala inaya halika. ‘Namibia ita vulu okweeta po ooveta tadhi indike Aakiina kaye ye mo mu Namibia, ihe onkalo otayi vulu okuungaungiwa nayo pakwiimangakumwe nayo muunangeshefa nokuninga Aamaibia aapewishipambu mOokampani dhAakiina moshilongo shetu,’ Nyamu ta popi ngaaka.
Kepulo kutya, RDP ota ka ninga po shika mokushunitha pevi omukundu gwokwaaheniilonga ngoka gashingeyi gu li poopelesenda 40, Nyamu okwa ti shika otashi vulu okuungaungiwa nasho pakweeta po elongo nomaheulo ge li nawa.