RDP noSWAPO yi idhenga mumwe pOutapi

ONGUNDU yo RDP ndjoka ya ningile oshigongi shayo kOutapi moMusati oya li yi idhenge mumwe naayambidhidhi yOswapo pOutapi mpoka nOpolisi oya li ya thiminikwa konkalo yi longithe olwithi lwomahodhi yi ya kuthe kumwe, unene yi tidhaatidhe po mboka yOswapo ya kala ya ninga eyinda mondjila moka mu na okupita yamwe yoRDP sho taya shuna komagumbo unene tuu mboka ya zilila ya Shakati na Mungwelume.

Okuza tuu ongula yOsoondaha ndjoka, AakwaSwapo oya kala ye li momapandaanda omanene moshilando shAutapi, taya igidha kutya RDP mOutapi ite ya mo oshoka ke na mo aantu ye ina halika mo woo. Opolisi oya kala nee nokukelela, nonando mpaka naampeyaka ya kala tayi nyengwa noya pula ekwatho lyOpolisi okuza kOshakati.RDP okw kala ta thiki miintoko, niintoko, okuzilila ngashi koRuacana noshowo kombinga ya Mungwelume na Kalongo noshowo nee ongundu onene ye ya zilile kOshakati okupitila kOkahao noTsandi e li megameno enene lyOpolisi nokuya pehala mpoka a ka ningila oshigongi, li li muuzilombugantu kashona wOmukwa omunene gwaMbalantu pOutapi. Oshigongi osha tameke nawa, ashike yamwe yomiilyo naayambidhidhi yo RDP poshigongi mpoka oye ya po ya dhengwa nale nomakuma nenge nomamanya.Omupopi omunene okwa li Amushangandjayi gwo RDP omusamane Jesaya Nyamu ngoka a pandula aanangundu ye, unene aalongekidhi yoshigongi shoka shomOutapi mOmusati. Ta ti okuya kwo RDP mOutapi nokuninga oshigongi esindano enene koRDP noshinima oshinene mondjokonona ya Namibia, unene tuu yoshitopolwa sha Musati. Ta ti ngashingeyi Aamusati oyendji oya mangululwa konkalo nokombepo yuumbanda nomatilitho.Ya tulwa monkalo yemanguluko lyoshili ko RDP nokuulikilwa kutya uudemokoli oshike.Omusamane Nyamu ta lombwele oshigongi mpoka kutya Oshitopolwa sha Musati otashi yonwa kaantu ye li yane, aalumentu yane nomukulukadhi gumwe. (Ine ya popya komadhina).’Opu na gumwe nenge yamwe, ya hala okuvundakanitha, nenge okuteta ko Oshitopolwa sha Musati. Aantu ye li yatano, aalumentu yane nomukulukadhi gumwe, oontseyele. Aantu nee mbaka yatano, oyo handi ithana ‘Okangundu kaaMusati,’ Nyamu ta ti ngawo nokutsikila ko ta ti, ‘Nena ndjika onda hala ndi mu lombwele kutya oMusati nashi kale tashi ithanwa oshitopolwa sha mangululwa ko RDP, notandi ithana oongundu dhoopolotika oonkwawo,kutya okuza nena dhi kale tadhi ningi iigongi yadho moMusati,’ Omusamane Nyamu ta ti mOmusati oye ya mo ya gamene Ekotampango lyoshilongo ndjoka ya eta po konima yekondjelomanguluko noye na nee nena okukondjela Uudemokoli woshili moshilongo sha Namibia. ‘Kutya oshike nee tashi ya po nashi tu faalele.Otuna na okukondjela uuthemba wetu nowoshigwana ashihe nuudemokoli wu kale tau ti pii moNamibia,’ Omusamane Nyamu ta ti ngawo nokwiindila koshigwana sha Namibia shi hogolole RDP momahogololo ngoka tage ya gOpaupresidende nogOshigongi shopashigwana ngoka taga ka kala ko eti 27 neti 28 Novemba 2009. Omusamane Nyamu ta ti okuteta ko Omusati ko Namibia owa fa naanaa mboka yokoCaprivi ya hala okuteta ko Caprivi ku Namibia. Ta ti wo kutya RDP kayi shi nande ongundu yopaukwamuhoko ngashi yamwe ya hala kutya. Okutya RDP ina enda mo mOmusati mOutapi, owa hala okutopola aantu kaamwayina.Omusamane Nyamu ta ti ngaashi ye Nyamu, oohekulu ye Aambalantu nokuuvite kutya mOmbalantu omu na ezimo lye enene. Omusamane Nyamu ta lombwele aanashigongi she mpoka kutya Epangelo lyOswapo ita li gandja we omayakulo koshigwana ngashi sha li sha thanekwa. Onkee oshigwana nashi ka hogolole RDP yi ke shi tulile po elongo, uuhaku noomayakulo galwe ge li nawa,ngashi ngoka goondjila, omeya, omalusheno nosho tuu. Ta ti okutopagula oshigwana sha Namibia osha puka. Nyamu ta ti pethimbo ndika ngele omuntu oto tala nawa, Oswapo kayi shi we yAanamibia ‘oyoKangundu ko koOmusati’. Shigwana uva ko sho tatu ku lombwele, ngele hasho oto ka adha wa topagulwa kaantu mbaka yatano tandi popi. Aalementu yane nomukiintu gwawo gumwe,’ Nyamu ta ti ngawo.Manga omusamane Nyamu ina popya, gumwe gwomAawiliki aakuluntu mo RDP tate Martin Heita, okwa ti kutya Omusati nOutapi mOshitopolwa sha Musati oshitopolwa sha Namibia na kapu na omuntu e na uuthemba wokutya Outapi nOmusati ogwOswapo, na inamu enda we Ongundu nenge oongundu dhi ili dhOpolotika. ‘Inatu hala okutopagulwa nandenande’, Heita ta ti ngawo nokutsikila ko pula kutya omolwashike mbela mboka ya hala okutopola ko Omusati koNamibia itaya kwatwa ngashi mboka yoko Caprivi ya kwatelwe sho ya li ya hala okuteta ko oCaprivi momumvo 1999?Omukuluntu gwOmahogololo go RDP moMusati,omusamane Nicanor Ndjoze, naye okwa ti kutya okuninga oshigongi sho RDP mOutapi moMusati osho okumangulula Aanamibia yomOmusati kokukalekwa monkalo yaa na emanguluko lyokupopya ngashi omuntu wa hala noshowo oku ya kutha monkalo yuuposi, ya mone ko kutya uuyuni owa uka peni na nkene moshilongo mwa pumbwa omalunduluko. Ndjoze ngoka e li wo Omukuluntu gwaanayasha moNamibia mo RDP, ta indile kaanyasha ya tale iinima muule. Ya kale taya dhilaadhila mo iinima muule nokuninga omatokolo ge na sha nelunduluko mo Namibia.