RDP mOshana ta yamukula Kaansela Mupetami

ETHIMBO lyongula Omaandaha geti 29 Juni 2009 mOprograma yomatumwalaka gowina gopambelewa mOradio NBC yOsshiwambo, Omusimanekwa Kaansela gwOshikandjohogololo Okatyali mOshitopolwa sha Shana okwa igidhile a ti, mOshikandjohogololo Okatyali omu na ooyene yomikunda 20 ya nyolela yekemo noyengambeko ku ye kutya , itaya ka zimina momikunda dhawo mu ningwe iigongi yopapolotika koongundu dhilwe kakele owala pomahala gamwe gontumba ge li gane ye ga totha mo, ihe Ongundu yOswapo oyi na uuthemba auhe wa gwana po okuninga iigongi yayo kehe pehala ya hala nethimbo kehe mOshikandjohogololo sha Katyali.

Kaansela Josef Mupetami ta tsikile ko ta ti oongundu dhimwe ngele inadhi hala okuningila iigongi yadho komahala hoka dha pewa inadhi ka nyenyeta ngele dha ka ningila iigongi yadho yopapolotika pomhala tage ke ya zila uupyakadhi. Mupetami ta hulitha epopyo lye lyesiku nedhengo lyelaka ta nyana oongundu dhilwe, kakele kongundu ye Swapo. Ongundu yoRDP nayo oya gumwa kepopyo lya Kaansela Mupetami. Onkee otwa thiminikwa tu yamukule kepopyo lyetumpakano lyatya ngaaka. Ngele oku na gumwe taka popya a fa Kaansela Mupetami, inaku thigala we eyonagulo lyekotampango lyoshilongo nehololo lyokuhena esimaneko lyuuntu waantu mbo kaye shi Aaswapo moshilongo muka. Omusimanekwa Mupetami pamwe nooyene yomikunda (ngele oyoshili) oya palutha mpoka mokudhilaadhila paveta nopapolotika. Ihe tse yo RDP shika otashi tu longo kutya mpaka opu na Opolotika yuumbanda ya valwa kefupa. Mo RDP itatu dhilaadhila kutya aakalimo yomOshikandjohogololo sha Katyali oye na okudhilaadhililwa ko kooyene yomikunda mboka Mupetami ta popi. Oshowo Kaansela Mupetami naye mwene otushi shi kutya ke na ehakanopo lyoondunge (monopoly of thinking) adhihe dhaakalimo yomOshikandjohogololo, opo ando e ya ningile etokolo ngasshi ndjoka. Oshimpwiyu shimwe sha Kaansela kehe mOshikandjohogololo okuguna aantu mboka ta lele paPolotika nOpaveta yoshilongo. Ihe mpaka ope na Omusimanekwa Mupetami na ye mwene a nyengwa okuuvako Opolotika nOveta yoshilongo, a fa mboka ye mu nyolela ombapila 9ngele oyoshili). Kaansela Mupetami nuuntsa nomukumo okwa popya epopyo lyetompakano lyatya ngaaka, ke na ko nasha kutya otashi luudhike iilonga ye ya simana painekelo lyoshigwana. RDP mOshitopolwa sha Shana, kayi shi ngele Kaansela gwoomvula odhindji miilonga ngaashi Omusimanekwa Mupetami oku na okufatululilwa omadhilaadhilo ga holoka mombanda nenge taga landula: Ewiliko lyoRDP mOshana olya hala okuuva ngele epopyo ndyoka lya pitithwa ku Kaansela Mupetami medhina lyooyene yomikunda oli li pamulandu gwElelo lyoshilongo sha Ndonga moka Oshikandjohogololo shika shi li. Otwa hala wo okuuva omadhina gomikunda dho (ngele itaya lundilwa) tse tu shi landule, opo tu yelelwe nawa. RDP okushi shi kutya pauthemba woveta nopauthemba mboka ongundu yoRDP ya totwa noya dhidhilikwa paveta yomahogololo moshilongo otayi vulu okwiinyenga nokuninga iigongi yayo ya manguluka moshilonbgo ashihe ngaashi oongundu adhihe dhopapolotika tadhi shi ningi. Mupetami netu lombwele ompangela e na naantu mOshikandjohogololo sha Katyali. Omahala taga popiwa ku Kaansela Mupetami, itaga opalele iigongi yetu yo RDP. Tse ohatu yi kaantu, katu ya kiihwa nokiithitukuti. Mpo twa hala okuningila iigongi yetu, otu shi po, opo tatu ka pula tu ningile iigongi yetu. Omusimanekwa hoka to popi fala ko Swapo, ngiika okuuwanawa. Omusimanekwa ina kala i ipyakidhila nokuyalula aantu mboka taya yi kiigongi yOongundu dhilwe, unene yoRDP, oshoka eyalulo lye aluhe otali mu pe omwaalu gwa puka. RDP mOshana ota popi kAanamibia ayehe, unene komusimanekwa Mupetami nayalwe kutya, RDP ongundu ya totwa ya dhilaadhilwa nawa. Aatoti yayo yamwe oyo wo ye ku totela oSwapo. Onkee owa pumbwa oku ya simaneka. Aatoti niilyo ya mo oyendji oshowo aayambidhidhi yoRDP oye na ehokololo lya yela mOndjokonona yEkondjelomanguluko lyoshilongo shika. Onkee oye shi shoka ya kondjela noonkondo adhihe noku shi kalela po. mEpopyo lyomusimanekwa otamu monika efupa, uumbanda nenge engwangwano lyasha. Omu na wo omatilitho koshigwana. Ihe shika inashi pumbiwa. RDP oku na okwiinyenga apehe naakuhe a manguluka kehe mokakololo ka Namibia. Tatu shi ningi meni lyOveta ngaashi oongundu adhihe tadhi shi ningi. RDP iha tidha ondjamba tu ulula. Otandi ku halele ombili muushiinda mbuka wOpapolotika.Ku Kornelius Mbangula Oshilyo shOngundumutima sho RDP nOmupopiliko gwOngundu mOshitopolwa sha Shana.