RDP a yamukula omupopyo gwa Iivula-Ithana

ONGUNDU yo RDP oya ti omupopyo gwaamushangandjai gwo Swapo Pendukeni Iivula Ithana ogwa kankamekelwa kokutukana noshowo kokunyateka, nokiifundja.

Iivula-Ithana okwa lundile oompilameno ta ti ota dhi taandeleke omitoto, iifundja noshowo omitotolombo kombinga aniwa yomapiyagano ganingwa momahogololo ngoka ga piti. Amushanga gwomauyelele gwoRDP , Jeremia Nambinga okwa ti momushangwa kutya oSwapo aniwa otayi hwahwameke aakwashigwana opo ya tsondumbo nompangu yopombanda, shaashi ashike ya gandja etokolo kutya oongundu dhoompilameno nadhi pewe uuthemba dhi tala tale momishangwa dhomahogololo ga Novemba 2009. Okwa ti onkene ita shi kumitha sho Swapo a pangula omushangwa ngoka gwa gandjwa kompangu yopombanda kombinga yoshikalimo she indilo lyoongundu dhompilameno, ndyoka lya gandjwa kompangu. Eindilo ndika olya kankamekelwa kwaashoka oongundu ndhika dha ti odhi itsu mokukonkona omishangwa hogololo dhimwe. Swapo aniwa ota popi kutya shika osha fa tashi ti ompangu oya gandja elombwelo kutya omahogololo ka gena ongushu ya sha. Nambinga okwa ti ongundu ye ita yi ka tya sha kombinga yaashoka ompangu tayi ka tokola nenge ta yi ningi kombinga yoshinima shika.,Oshoka okutya sha ota shi vulika ku yelekwe kwafa ondhino yompangu.Okommissi yomahogololo ya Namibia oya popi momushangwa ta yi ti yo ina yi mona natango omishangwa ndhoka tadhi yi tamaneke ngaashi dha gandjwa koongundu dhompilameno. Ongundu yawo yaatseyimpango oya tegelela natango opo yip ewe omsihangwa ndhika yoye dhi konakone ya wape oku ninga etokolo lyawo. Kutya ota ya uka peni.Okomissi ota yi ti omahogololo ga Novomba oga li ge li gamanguluka noga li payuki. Onkene iizemo yago oyina ongushi na oyi shi okwi inekelwa.