RDP a tula miilonga Omanifesto ye yOmahogololo

O
NGUNDU yOpolotika yo RDP (Rally for Democracy and Progress) ndjoka ya totelwe po pehulilo lyomumvo2007 mOlyomakaya ga zi ko oya li noshigongi shayo oshinenenene pOhangwena mOshitopolwa sha Hangwena shoka sha li sha kalwa kAawiliki nokengathithi enene lyiilyo naayambidhidhi yOngundu ndjika okuza kIitopolwa yi ili noyi ili ya Namibia, unene tuu
mwaambyoka yomoNooli yopokati ngashi shoka sha Hangwena, sha Shana, sha Musati, sha Kunene nosha Shikoto nokupopithwa kOmupersidende gwayo omusamane Hidipo Hamutenya ngoka wo pethimbo ndyoka a tula miilonga Omanifesto yOmahogololo yOngundu yawo ndjoka.
Osho oshigongi shotango sho RDP moNooli tashi gongele engathithi lyaantu oyendji ye thike mpoka nOmupresidende gwo RDP omusamane Hidipo Hamutenya okwa gandja olupandu lwe koshigwana sha Namibia sho tashi ndjoina ongundu yawo ompe yo RDP.
Pethimbo olyo tuu ndyoka, omusamane Hidipo Hamuntenya okwa tula miilonga Omanifesto yOmahogololo yongundu yawo yo RDP, nkene ya thaneka taya ka longela oshilongo shika noshigwana shasho, uuna ya hogololwa nomake ogendji nokupewa oonkondo dhokupangela Namibia.

Pethimbo ta popitha engathithi lyAakwaRDP pOhangwena mpoka nokutula nee miilonga omukanda ngoka tagu ka wilika iilonga yoRDP ngele a holololwa nomake ogendji koshigwana nokukutha ko Epangelo lya Namibia, Omupresidende gwo RDP Hamutenya okwa pandula noonkondo koshigwana sho she ya koshigongi oshinene sho RDP pOhangwena shi ye shi pulakene ketumwalaka lyevalululo lyoshigwana mewiliko lyo RDP. ‘Inandi mona nale oshigwana mwa gongala ngeyi moshigongi sho RDP okuza sho ya totwa po pwa pita ngashiingeyi omvula yimwe noomwedhi ntano lwaampoka. Shika otashi ulikile ndje naawiliki yakwetu yomoRDP kutya oshigwana osha yuulukwa elunduluko. Omutima gwandje ogwa gumwa nogwa enda noonkondo keholokopo lyeni mengathithi enenenene li thike mpaka nosha pandje uumbangi wa gwana kutya omwa hala elunduluko, omwa pumbwa ekwatho mu ze mo moothina mu li mo. Otandi mu pandula noonkondo sho mwa taamba ndje ko ngeyi nengathithi enene nonda hala oku mu lombwela mpaka kutya RDP oku li i ilongekidha a mana mo e mu kwathele noku mu kuthe muudhigu mu li mo noku mu pa ondjila yuukilila molwashoka pethimbo ndika kamu wete we kutya omwa ukithwa peni kOngundu ndjoka yOswapo tayi pangele pethimbo ndika,’ Hamutenya ta ti ngawo. Okwa ti RDP opo a totwa notashi kumitha sho e na nale engathithi lyaawiliki, lyiilyo naayambidhidhi ye thiker mpoka. ‘Otandi pandula ongundu yandje ya kola yAawiliki mIitopolwa yi ili noyi ili sho tamu longo nuudhiginini ngeyi nokukokeka Ongundu yetweni yo RDP meendelelo li thike mpoka,’ Hamutenya ta ti ngawo nokugwedha po ta lombwele oshigwana sha li mpoka kutya okwe ya e ya etela elaka lyetegameno ewanawa lyokutya ngele oshigwana oshe mu hogolola ongOmupresidende nOngundu yo RDP ongOngundu tayi pangele, nena otaya ka lundulula oshindji kashi li we nawa mEpangelo li li mewiliko lyoSwapo. Tandi mu lombwele mpaka oshili yowene kutya ngele otatu longeleni kumwe ndele tamu ke tu hogolola nomake ogendji tu ye koshipundi, nena osha yela kutya otatu ke mu etela elago netegameno li li nawa. Omupresidende gwo RDP Hamutenya ta ti kutya ongundu yawo yo RDP ndjoka ya eta mo nale ongushu onene mOpolotika ya Namibia, ngele oya yi koshipundi Elongo otayi ke li opaleka, oshowo Uuhaku. Ta ti RDP otaka opaleka nawa Ooprograma dhOnkalonawa yEsiku kehe mwa kwatelwa ndjoka yAakulupe nosho tuu, taya ka tula po Emona li li nawa nokweeta po onkalo ya nika nawa yemona lya kehe gumwe. Taya ka eta po onkalo yi li nawa yomakwatakanithokumwe gomaludhi gi ili nogi ili noshowo etungo po lyomagumbo ga gwana. Taya ka eta po egandjo lyomeya li li nawa, onkalo yi li nawa yOmidhingoloko nOmatalelopo, Egandjo lyolusheno li li hwepo, Enkondopaleko lyoshigwana miinima yi ili noyi ili, eetopo lyoompito dhiilonga, taya ka tula po omulandu gwOmahangano ga yama kEpangelo ga kale ga talika ko kutya ogoshigwana, oga thikama po koshimaliwa shoshigwana noge na okulonga ngashi sha halika koshigwana. Hamutenya ta ti kutya pamukanda gwawo ngoka oshinima shOofaabulika otashi ka yeluthwa po uuna RDP oye ta pangele mwa kwatelwa wo noongeshefa moshilongo ngashi unene moshimpungu shOmangeshefo nOmapungulo. Uuyelele wopaunongononi mEpangelo lyo RDP, Hamutenya mOmanifesto yawo moka ta ti, otau ka dhana onkandangala. Oshinima shOmavi nasho mEpangelo lyo RDP otashi ka endukululwa noonkondo molwashoka pethimbo ndika kashi li nawa nande. Uunamapya nUuniimuna nawo otau ka talululwa nokuwapalekululwa. Oomeme nAanyasha mo Namibia otaya ka silwa oshimpwiyu nawa nokutyapula omauwanawa ogendji shi vulithe pethimbo tu li mo omanga Oomeme taya ka nkondopalekwa pamona nosho tuu shi vulithe. Iikondo nOmahangano gEpangelo otaga ka opalekululwa nawa,Shi na sha nEkotampango lyOshilongo, RDP otaka kala noku li simaneka, ashike ota kala ngaa te li talulula naampoka sha pumbiwa li lundululwe, li lundululwe. Oshikondo shUuyuki mEpangelo lyo RDP oshi na okukalekwa ngashi shi na okukala na hangashi shi li pethimbo lyEpangelo li li koshipundii. Uulingilingi ou na wo okukaungaungwa nawo kEpangelo lyo RDP ngashi naanaa shi na okukala. Shi na sha nOmbepo yedhiminathanepo, RDP ota ti otaka tula po omulandu gwokiihokolola kwaamboka ya ningila yakwawo nayi ndele taya dhiminwa po nee nawa nomuntu ta tsikile e uvite ombili yokomwenyo. RDP otaka simaneka ekalepo lyOmalelo gOpamithigululwakalo noshowo lyIikundaneki nokusimaneka omauthemba gawo. Etanga lyEgameno noshowo Opolisi mEpangelo lyo RDP otaya ka kalekwa ponkatu kutya yo kaye na egamombinga lyasha notaya longo taya longele taya gamene oshigwana ashihe shi thike pamwe. Oonakulwa aakulu mEpangelo lyo RDP,otaya ka kala ye li megameno ewanawa nokutyapula omauwanawa gawo. Epangelo lya RDP. Omanifesto tayi tsikile, otali ka kala lya tula pombanda Oshikondo shIikwapondje yOshilongo notashi ka kala tashi gamene onkalo yAaniilonga moshilongo.Omupresidende gwo RDP ta ti kutya sigo oompaka oRDP oyo ashike Ongundu yotango ya eta puuyelele Omaifesto yayo yomahogololo. Ta ti na SWAPO ine shi ninga nokwa kutha ashike ye ndjoka onkulu yomomumvo 2004 nokulombwela oshigwana kutya oyo ta yi nayo miikonga yomahogololo ndjoka. Oshinima shoka, Hamutenya a ti kutya, okufundjaleka oshigwana nokuhenuka shoka sha li shi na okuningwa nokukala po.Mboka ya li poshigongi shoka, otaya ti kutya oya kuminwa elongekidho lyAawiliki yo RDP mOshitopolwa sha Hangwena. Taya ti oya longekidha nawa lela oshigongi shawo shoka. Aapopiyalwe poshigongi mpoka oya li Omuunganeki gwo RDP mOhangwena tate Timotheus Shikongo noshowo Amushanga gwo RDP moKhomas tate Jeremia Nambinga.