RDP a lombwela Presidende Pohamba a kumagidhe Swapo yomOhangwena

ONGUNDU yo Rally for Democracy and Progress (RDP) mehololomadhilaadhilo lyayo ye li ningile mEenhana mOshitopolwa sha Hangwena mOsoondaha ndjika ya zi ko, oya indila ya mana mo kOmupresidende Hifikepunye Pohamba a kumagidhe meendelelo ngashi tashi vulika aaleli yoSwapo mOshitopolwa sha Hangwena molwashoka otaya vundakanitha iinima, ya ngwangwana na kaye shi we sho taya ningi, yo wo kaye shi we iinakugwanithwa yawo ong’aaleli yoshigwana.

Momukanda gwawo gwomanyenyeto ngoka ya shangela kOmupresidende Pohamba gu na omapandja gatano, nogwa leshelwa Aahololimadhilaadhilo, Aatoolinkundana naayehe mboka ya li mpoka mOsoondaha ya zi ko ku Amushanga gwOpashikandjo sha Eenhana gwo RDP, Ndawedwa Mwandingi, RDP ota lombwele Presidende kutya yo oya hala okweeta oshili shawo puuyelele, shi na shanaashoka sha popilwe kOswapo pethimbo lyomaashinga yayo ya ningilwe meti 3 Apilili 2009 mewiliko ly Kaansela gwOshikandjohogololo sha Eenhana omusamane Nehemia Udeiko Haufiku na Amushanga gwAanyasha y oSwapo moshitopolwa sha Hangwena Martha Helena Nakale, shi na sha aniwa nelongitho nefalo lyaanasikola kOmaashinga yo RDP ndjoka ya li ko Osoondaha yeti 29 Maalitsa 2009 mEehnana.
RDP ta lombwele Presidende kutya shoka sha popiwa ku Kaansela Haufiku na Amushanga gwoSwapo mOhangwena Martha Nakale, kutya Omukuluntusikola gwOseko yOpombanda ya Haimbili Haufiku, Dineinge Sheya okwa fala aanasikola komaashinga yo RDP mEenhana esiku ndyoka, kashi shi shoshili. Aanasikola mboka ya yile kOmaashinga ndjoka, oya ya ko kehalo lyawo yeneyene na inaya thiminikilwa ko komuntu nande. Inaya falwa ko nande komukuluntusikola gwOseko yOpombanda ya Haimbili Haufiku Dineinge Sheya, ngashi taya ti. RDP ta tsikile ta lombwele Omupresidende momukunda ngoka kutya, Aaleli yo Swapo yomoshitopolwa sha Hangwena naya kale ye shi shi kutya Ekotampango lya Namibia, otali utha kutya kehe Omunamibia e na oomvula dhi li li omulongonahetatu (18) nenge dhi vule po oku na uuthemab wokuhogolola ongundu ndjoka ye mwene a hala. RDP ta ti aanasikola mboka ya popiwa ku Kaansela Kaufiku ya li momaashinga yo RDP, aanasikola aakuluntu ye na oomvula dhi vulithe pomulongo nahetatu, mboka ku yo yene ya li ya tokola okukala moshigongi nenge momaaashinga yo RDP, no ye na uuthemba wokushininga. Taya pula kutya, Swapo okuwete oshiwinayi ngiini ngele naye osho ha ningi? Ha longitha nokuli uunona uushona inau adha poomvula 18. Ha longitha uunona wu li poomvula 7, hashi monika te wu londeke mOloli yoScania, te wu fala kiigongi, wu ka udhe iigongi ye, wu ke mu yakelele omake, ano te wu piyaganeke, pehala lyoku wu etha wu ye kootundi dhawo nombili.
RDP ta ti aanasikola mboka ye na oomvula dha gwana okukahogolola momahogololo ngoka tage ya pehulilo lyomvula ndjika gUupresidende nogOshigongi shOpashigwana oye na uuthemba nokulongitha oompito dhawo oku ya ya ka pulakene kAawiliki yoongundu dhOopolotika sho taya popi opi notaya uvaneke opo ya vule okukahogolola nawa pethimbo lyomahogololo. Onkee inaya pumbwa ya kelelwe okulongitha uuthemba wawo wokupulakena kAawiliki yOopolotika nokukahogolola Ongundu ndjoka yoyene ye wete tayi opalele okupangela oshilongo, pa malombwelo nopamauvaneko ngoka tayi gandja koshigwana. RDP ta ti kutya ye okwa itaala melongo lyomunona gwa Namibia nokwa itaala wo megandjo lyiilonga li li nawa kwaamboka taya longele oshigwana shika kutya nee oye li mEpangelo nenge openi, ashike nashi kale shi shiwike nawa kutya yo yo RDP iinima yawo ya nika Opolotika ohaye yi ningi momahulilo giiwike nomomasiku gomafudho gaayehe. Taya ti taye shi ningi opo iilonga yOpolotika kayi idhenge mumwe naambyoka yeyakulo lyomuntu kehe, kutya nee opailonga yEpangelo nenge oyo mbyoka yaashi yopapangelo. Ndhika RDP okwe dhi popi, sho yo Swapo mOsoondaha ndjoka yeti 3 Apilili 2009, ya li ya gandja uusama kAanambelewa yamwe yomElongo kutya ohaya longo ye li ompinge nEpangelo molwashoka yo oyo RDP na ohaya ningi iinima yOpolotika yawo pethimbo lyiilonga yEpangelo, nenge taya nyana Epangelo lyoSwapo, moka ye li taya longo. Shika RDP okwa ti nasho iifundja iitokele nIilyo ye tayi longo ongAanambelewa mEpangelo oyi shi Omautho gEpangelo noye li tayi utha komautho ngoka ethimbo alihe.
RDP ta ti Epangelo olyaantu ayehe, olyaaniilonga yahe. Kali shi lyiilyo naayambidhidhi yOswapo ayeke nenge lyaaniilonga mboka ye li iilyo yOswapo nenge aayambidhidhi yOswapo ayeke, olyaantu ayehe, kutya nee okwa gama kOngundu yini yOpolotika. RDP ota lombwele uuyuni nOmupresidende Pohamba kutya esiku ndyoka Swapo a ningile omaashinga mEenhana, ano meti 3 Apilili 2009, okwa li a longitha wo nuunona uushona lela womosikola ya Paulus Hamutenya mEenhana moka, na molwashoka omaashinga ye oya ningilwe pethimbo lyootundi, osha yela kutya Swapo esiku ndyoka okwa yonagula ootundi dhaanona yomosikola ndjoka, mboka a longitha momaashinga ye moka esiku ndyoka. ‘Omukalo ngoka ya li ya longitha ogwa li tagu kondjithathana naashoka ya li taya ningile omaashinga shokutya kutya RDP ota longitha aanona yosikola moomaashinga dhe. Yo oyo ee kamana, haya longitha uunona wu li kohi yoomvula omulongonahetatu, oshinima shoka sha indikwa,’ RDP ta ti.