RDP a dhika oobrancha dhe kOnkumbula, Okandjeke nomOmutsegwonime

ONGUNDU yOpolotika opo ya totwa po omathimbo ga zi ko yedhina Rally fro Democracy and Progress (RDP), oya tameka nokutota po nenge okudhika Oombelewaitayi yayo, ano Oobrancha dhayo mOshitopolwa shomoNooli nomehuliloshiwike lya zi ko, oya dhiki Oobrancha dhayo pOnkumbula mOndonga moshitopolwa sha Shikoto, oshowo pOkandjeke nopOmutsegwonime mOndonga tuu moka mOshitopolwa sha Shikoto, shoka shi li mewiliko lyomusamane Ismaerl Shailem, ngoka e li Amushanga gwayo mOshitopolwa sha Shikoto.

Tashi ti mOlyomakaya ga zi ko oya dhika Obrancha yawo mOnkumbula, mOsoondaha ndjika ya zi ko tayi dhiki yimwe mOkandjeke nayimwe pOmutsegwonime. Omusamane Shailemo ta lombwele The Namibian kutya mehuliloshiwike tali ya otaya ka dhika yimwe pOmuntele noshowo onkwawo pEmanya nayimwe pElavi nopOnkule. Oshilonhgo ashihe otu na oku shi andjaganeka Oombelewa dhetu, ano Oobrancha nOosectiona dhetu, tse tatu tula mo wo omawaw gaanyasha, goomeme nogOotate, oshoka otwa hala okulonga twa mana mo,’Shailemo ta ti ngawo nokugwedha po kutya sho ngaa taya mana mOshikoto yo otaya yi mOshana, mOshangwena nomOmusati noshowo kiitopolwa yilwe moshilongo.
Obrancha yomOmutsegwonime ndjoka ya egululwa pambelewa komusmaane Shailemo omutenya gOlyomakaya ga zi ko, otayi kala tayi wilikwa komusamane Absalom Nghinamundowa, ngoka e li Amushanga nomupeha gwe tate Robert Munalye.
Oobrancha adhihe odha lombwelwa kutya dhi kale dha hogolola Aanambelewa aakuluntu mudho noshowo dha tota po nokudhika Omawawa gAagundjuka,gOomeme nosho tuu manga eti 15 Februari 2009 inali thika, oshoka meti 26 Februari 2009, Shailemo ta ti, otaku ka gandjwa Olopota nkene ayihe mbyoka ya tulwa nale pomahala. Omusamane Shailemo okwa indila kaawiliki ya RDP mIitopolwa nomIikandjohogololo oshowo momikunda ya longe nuudhiginini nokuuvithila oshigwana etumwalaka lyo RDP, unene shi ikwatelela komahogololo omanene ngoka taga ka kala ko pehulilo lyomvula ndjika. ‘RDP okwa hala oye a ka pangele oshilongo shika momvula tayi ya 2010, oshoka Swapo oku li po ta topagula oshigwana sha Namibia,’Shailemo ta ti ngawo.
mOlyomakaya omo tuu moka, aakalimo yomOmutsegwonime nomomudhingoloko ye li omulongonagumwe (11) oya ndjoina Ongundu yo RDP pOmutsegwonime mpoka. Manga te ya pe uukalata wawo, omusamane Shailemo okwe ya pandula ta ti, ‘Omwa ninga nawa sho mwa dhimbulula oshili nokuya mu ndjoine Ongundu yoshili yo RDP ndjoka tayi lalakanena, oshili, uuwanawa nuuyuki womuntu kehe, ‘. Oshigongi shoka shedhiko lyObrancha pOmutsegwonime, osha li sha wilikwa komusamane Omuwiliki mo RDP tate Josef Kaale nosha li sha egululwa negalikano komusamane Absalom Nghinamundowa nokupopithwa ku mwene gwomukunda Okandjeke tate Peter Nghinamwaami Kalenga noshowo ku Kaansela gwo RDP mOmuthiya Moses Panduleni Amukoto noku meme Lenderia Kadera, ngoka a tseyika wo nedhina Kandeya, a zile kOliindili nokwe ya okutula ngashiingeyi mOmutsegwonime nokundjoina oRDP ngeyi. Omwa li wo aapopi yamwe. Tate Kaale noshowo tate Nghinamwaami, oya lombwele oshigongi kutya Kaansela gwOshikandjohogololo sha Muthiya, Penda Ndakolo, ngoka wo e li Gavena yOshitopolwa sha Shikoto noku li omunangeshefa mOmutsegwonime, okwa kala aniwa ta ti kutya RDP mOmutsegwonima ita ende mo na ita dhiki mo Ombelewa ye. ‘Eeno, Gavena Ndakolo osho ha popi ngawo, ashike shigwana onda hala ndi mu lombwele kutya tse otwe ya twa tsimika ko ombundu. Itatu shuna monima nOmumutsegwonime omo tu li okuza nena ndjika notatu tsikile okuya miitopolwa nomomahala galwe moka kaatu na mo natango oombelewa manga, ‘Tate Nghinamwami ta ti ngawo, omanga tate Kaale a ti wo kutya sho ya kala momutsegwonime moka ehuliloshiwike alihe, taya tyapula eyotho lyonyama ndyoka ya li nalyo, oya kala taya hindagulwa kaatumwa ya Gavena Ndakolo, ashike, ta ti, omahindo gawo inaga ka pondola po sha nande, RDP okwa yi komeho nObraai ye ndjoka ya ende nawa noonkondo. Nghinamwaami ta ti Gavena Ndakolo ke na sho a eta mo shehumokomeho moshitopolwa sha Mutsegwonime. ‘Okwa kala noku li ta kelele omadhilaadhilo ngoka tatu eta po ge na sha nehumithokomeho lyoshitopolwa shika. Twa kala tatu eta po omadhilaadhilo gokutunga ngeno Oklinika, ashike okwa kala te ga yi moshipala. Otwa tungitha mo Osikola Elago momudhingoloko muka, ndjoka natango a kala te yi kala moshipala, molwashoka omadhilaadhilo oga zi kutse. Ashike nande ongawo, Osikola ndjoka Elago oya tungwa yapwa notayi hitwa nale kaanasikola ye vulithe pethele nokulongwa kaalongi ye li puyane lwaampoka. Pu na negumbo lyaalongisikola. Ayihe mbika ongaye nayakwetu yamwe aaholimbili, twe yi eta po koonkondo dhetu. Ngashiingeyi Osikola ndjoka oyi li nale nokuli mEpangelo, ‘Nghinamwaami ta ti ngawo nokwiindila AakwaRDP ya longe nuudhiginini nokuyakula oshigwana sha mona iihuna mewiliko lyOswapo. Ta indile koshigwana shi ka hogolole RDP ngoka momahogololo twa thinda mo pehulilo lyomvula ndjika opo ya ka lye iiyimati yemanguluko mbyoka taya kelelwa kOswapo ye yilye.