Presidente Netumbo Nandi-Ndaitwah okwa ti kutya ota ka kufa moilonga ovanailonga vepangelo ovo itava longo nawa.
Oshinima eshi okwe shi popya pefimbo kwa li a talela po endiki laavo va ningwa oihakanwa yefundja kEtunda koshitopolwahoololo shaMusati.
Presidente okwa ti ota ka longifa eenghono daye odo a pewa kovahoololi opo a kufe moilonga ovo ve li meembelewa depangelo itava longo osho va pumbwa okuningwa, manga Ovanamibia inave mu “kufa moilonga”.
“Onda pewa eenghono kOvanamibia, nohandi di longifa ponhele yavo. Ashike ovo tava longo naame, manga Ovanamibia inava kufa nge moilonga, ohandi mu kufa moilonga,” Osho a ti ngaho.
Okwa ti Ovanamibia navo ove na oufemba woku mu kufa moilonga ngee ita longo oilonga yaye.
Nandi-Ndaitwah okwa ti kutya oshikakoshaye itashi “kala ngaashi shito”.
Omunandjungu wongudu yoAffirmative Repositioning Johannes ‘Jay-Jay’ John Omaandaxa okwa ti presidente okwa yandja oipopiwa tai etifa eenghono, ashike kai na etulomoilonga.
‘POPYA KASHONA, LONGA SHIHAPU’
“Osho nda hala okumona omapopyo ashona noilonga ihapu. Opwa kala pu na omapopyo awa kombinga yepangelo liwa, ashike okutula moilonga kaku po eshi handi tale,” Osho a ti ngaho.
John okwa ti okomisi yokukondjifa oimbuluma oya kala iati longo sha.
Okwa pula yoo vali omahangano amwe a kufilwe onghatu.
John okwa ti okondalaka yomukulunhuwiliki wokomisi yokukondjifa oimbuluma Paulus Noa inai wedelwa.
Okomisi yokukondjifa oimbuluma oya dopa okulonga oilonga yayo yokulwifa oulingilingi moshilongo shaashi oibofa imwe kai na fiku ya potokononenwe, osho a ti ngaho.
John okwa ti eeminista dimwe dOkabinete yaNandi-Ndaitwah “kadi na ouyuki”. Osho a ti ngaho.
Natango, omundjadjukununi woikwapolitika Henning Melber okwa ti Nandi-Ndaitwah ota monika a fa e na ehokwe yokutota elelo laye nomatilifo.
Ashike nande ongaho okwa ti, oitya idjuu otashi dulika i tilife ovanailonga vepangelo novanapolitika ovo va mwe na ashike, te va dimbulukifa kutya ohava futwa va yandje omayakulo.
“Ngee oitya yaye itai landulwa koilonga ngee okuhalonga nawa ku li oshinima shopaumwene, otashi dulika i ete oshiponga,” Osho a ti ngaho.
Melber okwa ti presidente oku na okukalela po eyandjo lomayakulo la nghundipala. Yeemwene oku na ashike okupewa ehandukilo lokuha hoolololwa konima yoshikako shaye shotete mombelewa, osho a ti ngaho.
Omunandjungu wouyuki wopanghalafano Shaun Gariseb okwa ti oshiwa okulihonga kutya presidente ota shiivifile ovanailonga vepangelo osho va teelelika va ninge.
Okwa ti ovaleli ove na omukalondjiikilile wokukala itava pwilikine omanyenyeto oshiwana kombinga yeyandjo lomayakulo.
“Ovaleli ohava endelele ashike va kufe omafano okoInstagram shama va ulikwa, paife nava longe novanhu. Otu na okutala presidente wetu kutya ongudu yaye otai longo ngahelipi,” Gariseb osho a ti ngaho.
Okwa ti ovaleli ovo tva dulu okukalelela po oinima ohava popi osho va hala okuhanga keengudu davo opo di dule okulonga ngaashi sha teelelika.
Osho osho presidente ta ningi paife, Gariseb osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
