Presidende Pohamba otaka popitha oshigongi shoSwapo pOluno

ONKUNDANA ye tu zilila mOmbelewa ymukuluntu gwOswapo moshitopolwa sha Shana, ano yomusamane Erastus Uutoni, otayi ti kutya Omupresidende gwoshilongo Hifikepunye Pohamba, ngoka wo e li Omupresidende gwoSwapo, mOmaandaha goshiwike tashi ya geti 25 Mei 2009, ano mEsiku lya Africa, otaka popitha oshigongi oshinene shOswapo mOluno mOndangwa.

Omusamane Uutoni ta ti kutya oshigongi shika, tashi ka ningilwa pOkapale kEtanga, ano komaudhano kopOseko yopOmbanda ya Andimba Toivo yaToivo mOluno mOndangwa moka, ndjoka ya tseyika nale Oseko yOpombanda ya Luno kwali, otashi ka tameka poyimwe yomutenya.Nonande iikonga yiigongi yomahogololo, ngoka taga ka kala ko pehulilo lyomvula ndjika, oya fa ngaa inayi tameka natango pambelewa, aawiliki yoongundu dhopolotika oya tameka nale okupopitha iilyo naayambidhidhi yawo, unene oku ya tsa omukumo yi ishangithe ongaahogololi molu omahogololo ngoka taga ka kala ko pehulilo lyOmvula ndjika gUupresidende nogOshigongi shOpashigwana noshowo okuka hogolola aawiliki yoongundu dhawo.Uutoni ota lombwele nee iilyo naayambidhidhi ayehe yoSwapo ya ye momangungo koshigongi shawo shoka tashi ka popithwa komusimanekwa Omupresidende gwoshilongo nogwoSwapo Hifikepunye Pohamba noshowo kaawiliki yalwe yongundu yoSwapo.Pokati mpoka otwa kundana wo kutya Omupresidende Pohamba, ongula yEtine lyoshiwike tashi ya, otaka tula miilonga omikalo nomilandu dho Namibia Road Safety, te ke shi ninga pethimbo lyoshiithanene shoka tashi ka kala mOhotela ya Shakati yedhina Oshakati Country Lodge, tashi ka tameka petata lyomulongo gwongula, ano po 09H30.