Presidende Pohamba a indila ayehe ye kiiyuthe kooveta dha Namibia pethimbo lyomahogololo

PETHIMBO ta popitha engathithi enenenene lyaAakwaSwapo pOhangwena mOukwanyama mOshitopolwa sha Hangwena mOlyomakaya ga zi ko Omupresidende Hifikepunye Pohamba ngoka wo e li Omupresidende gwoSwapo ya Namibia, moshipopiwa she oshileeleka nosha kwata hanga oowili mbali te shi lesha nokupopya, okwa indila a mana mo kAawiliki yOswapo noshowo kiilyo yOswapo nokoshigwana ashihe oshiholimbili sha Namibia kutya Ooveta dha Namibia nadhi dhigininwe ethimbo alihe, unene tuu pethimbo lyomahogololo twa thinda mo pehulilo lyomvula ndjika 2009.

Oshigongi shOswapo shika, sha li oshinenene nosha kalwa kengathithi enene lyAakwaSwapo, osha li sha kalwa kOoministeli dhimwe dhEpangelo naandhoka dhopevi tadhi kwatelwa komeho kOministeli yElongo omusamane Nangolo Mbumba ngoka e li Amushangandjayi gwOpevi gwOswapo, noshowo kOogavena, ngashi ya Hangwena tate Usko Nghaamwa noya Shikoto tate Penda Ndakolo,kOokaansela dhIitopolwa nOondoolopa, kAaunganeki yOswapo mOshana, mOmusati, mOhangwena nomOshikoto, kAawiliki yOswapo mIikandjohogololo, yOobrancha nomOosectiona, unene tuu yomOshitopolwa sha Hangwena, kAakwanepangelo yomIikondo yi ili noyi ili yEpangelo noshowo kIilyo yOparlemende, kAanambelewa yIikondo yOpaumwene, kAawiliki yOpambepo noyOpamuthigululwakalo taya kwatelwa komeho kOmukwaniilwa gwUukwanyama meekulu Martha Mwadinomho Kristian Nelumbu, kAanangeshefa, kaAanafaalama, kaanyasha nokaanona. Oshigongi osha li tashi wilikwa kOmupongololi gwOswapo moshitopolwa sha Hangwena tate Nestor Shuukwanyama nosha egululwa negalikano kOmusita gwa Anglicana Omupresidende Pohamba ngoka a kala mefudho uule wiiwike itatu kegumbo lye kOkanghudi mOukwanyama mOshitopolwa sha Hangwena okwa li ta popitha Oshigongi oshinene
Omupresidende Pohamba ta ti kutya Omupeha gwe, ano Omiupevipresidende gwOswapo Omundohotola Hage Geingob noshowo Amushangandjayi gwOswapo me Pendukeni iivula-Ithana inaya vula okukala po omolwomaipyakidhilo gi nili nogi ili mpaka naampeyaka, ashike oya tuma omakundo kOshigwana ashihe shOswapo koshigongi shika. Gavena yOshitopolwa sha Shana Klemens Kashuupulwa oshowo Gavena yOshitopolwa sha Musati Sacky Kayone kaya li ko koshigongi shika, omanga Omusita gwa Katope naangokan ya li ye na okuninga naye egalikano lyeegululo lyoshigongi shika, kaya li ya holoka, nOmusita gwa Anglicana kOdibo tate Lukas (Katenda) Kaluwapa okwiiyamnba noku egulula oshigongi shika negalikano.
Omupresidende ta lombwele oshigwana shOswapo mpoka kutya nonando ta ningile oshigongi shika pOhangwena mOshitopolwa sha Hangwena,ita popitha ashike Aaswapo mOhangwena, ihe ota popitha AakwaSwapo noshigwana ashihe sha Namibia okuzilila mOhangwena moka.
Ta indile a mana mo nee kAakwaSwapo nokoshigwana ashohe sha Namibia oshiholimbili shi dhiginine Ooveta dhoshilongo nEkotampango lya Namibia hoka oko kwa kankekwa Ooveta adhihe dhoshilongo, unene tuu pethimbo lyomahogololo tage ya. Omupresidende ta lombwele Aaswapo mpoka noshowo oshilongo ashihe kutya naya ka kale ya ngungumana naakwatelipo yombili, aadhiginini naasimaneki yOoveta dhOshilongo pethimb lyomahogololo twa thinda mo noye kiikaleke kokule netsitsimiko lyomaipumomumwe nOongundu dhi ili dhOpolotika. ‘Tu ka uvitheni Opolotika yetu ya yela nombili yOngundu yetu yOswapo Onankondonkondo, tse tatu dhigininine Ooveta dhoshilongo, ndhoka dha popya nodhe shi yeleka mo sha yela kutya otu na okulonga ngiini notu na okukala ngiini nayakwetu, esiku kehe,’Presidende Pohamba ta ti ngawo nokugwedha ko ta ti ota ningi endilo kwaamboka ya thiga po Oswapo omolu omapukitho kOongundu dhilwe ya galuke ngele oya hala okugaluka. ‘Ngoka wa hala okugaluka, alikana galuka, omiyelo dhOswapo odhe ku egulukila ethimbo kehe, ‘Omupresidende Pohamba ta ti ngawo, shiwetike kutya okwa ukilila unene mboka yomoRDP.
Omupresidende okwa indila wo koshigwana oshigundjuka shi kale tashi simaneke aaleli yasho aakuluntu. ‘Moshigwana moka, unene tuu shoka oshigundjuka omu na sha kashi li nawa shokuhasimaneka aakuluntu yasho mboka yopapolotika. Aakuluntu yamwe ngashi OoAndimba Toivo ya Toivo , OoSam Nujoma, OoMzee Kaukungwa mboka nootse mbaka, noshowo ayalwe wo, oye li Ooveterana dhOswapo, Oongudhi dhOswapo, odho dha tunga po Oswapo, ihe mboka opo taye ya ngashiingeyi, oye li po ye ya dhina, noye wete ya fa inaya longa sha. Oshinima shoka kashi li nawa naanyasha yetu oye nan okutala iinima nawa’. Okudhina nokutuka aaleli yoye mbaka noku ya shundula pamikalo dhi nili nodhi ili kashi li nawa nande, ‘Presidende Pohamba ta ti ngawo nokwiindila koshigwana oshigundjuka shi simaneke aaleli yasho aakuluntu ethimbo kehe.’Ondi shi shi aaleli mbaka yOoSam Nujoma nayakwawo aantu ngashi aantu yakwawom haya vulu wo okuninga omapuko, ashike itashi ti nee naya shundulwe nokutukwaatukwa kaanyasha nosho tuu, ‘Presidende Pohamba ta ti ngawo. Ta gweha po ta ti kutya ngashi ye kutya nee Omupresidende oku li ta simaneke aaleli ye mboka aakuluntu kuye. Ta ithana komeho tatekulu Mze Kaukungwa nokulombwela Oshigongi kutya okwa kondja nale nOswapo nokwa dhengelwe esiku limwe nomapokolo koma..metala lya Hangwena moka kOmalenga ngoka ga li inaga hala Oswapo yi popiwe nokuuvithwa mokati koshigwana kOoMzee Kaukungwa noku yakwawo. Ta lombwele wo Oshigongi kutya AakwaSwapo yamwe ngashi mboka yOondjayi Ndahu Namoloh aantu mboka ya kala yi itula mOswapo nomEkondjelomanguluko. A kala Omukwiita miihwa moka, ta lwitha omukolonyeki, a ze mo moNamibia noku shi pondola shili. Presidendee Pohamba ta ti Ndjayi gwOmatanga Namoloh ina mona elongo lyopombanda, molwashoka ethimbo lye alihe okwa kala miihw,moongoye dha Angola moka nosho tuu naamati ye yokakulumbwati kOswapo taya lwitha omukolonyeki
Omupresidende ta ti kutya omvula ndjika 2009, otamu ka kala omahogololo pehulilo lyayo mpoka nota indile nee kukehe gumwe a kale nokudhiginina Ooveta dhoshilongo opo omahala ge keende nawa,mombepo ombwanawa, ga manguluka nopauyuki. Aantu inaya kahindathana. Ta ti Aaswapo naya mondjila yawo yuukilila ngashi ya kala nale ndele taya ka hogolola ya manguluka nokuka dhenga mo oongundu ndhoka dhOompilameno. Omupresidende ta ti kutya omvula ndjika omvula yondjokonona momahogololo ga Namibia molwashoka Oongundu odhindji dhoompilameno otadhi ka ekelwa mi momandiloma giiyagaya kOswapo. Ta ti ngashi DTA, ngele oku na elago, otaka za mo ashike nomuntu gumwe, ano noshipundi shimwe opuwo.
‘Ashike onda hala nee ndi mu lombwele kutya, ingele otwa hala osho shi ka kale ngawo, itashi zi pokapala kayela, otuneni okulonga nuudhiginini noneitulomo enene mehwahwameko lyetu lyoshigwana okuza egumbo negumbo, omukunda nomukunda, Oshikandjohogololo nOshikandjohogololo noshowo Oshitopolwa nOshitopolwa opo Swapo a mone esindano enenenene nokudhipage po Uungundu auhe mboka nopena,’Presidende Pohamba ta ti ngawo.