Poshigongi shaaleli ya SADC kombinga ya Zim opwa li omatopoko omanene

JOHANNESBURG – Aaleli yiilongo yAafrika lyUumbugantu oya li aniwa ya topoka noonkondo poshigongi shawo shoka sha li tashi kundathana kombinga ya Zimbabwe, shoka sha li mu Pretoria maOmaandaha.

Konima yoshigongi shika, Omupresidende gwa South Afrika Kgalema Motlanthe, okwa li a popi kutya aaleli ayehe yAafrika lyUumbugantu oya tsa kumwe kutya moshilongo shika namu etwe Epangelo lyopaukumwe.
Shika osha li wo sha endululwa ku Frank Chikane, ngoke e li Omunambelewa omukuluntu mOmbelewa ya Montlanthe.
Nande ongaaka, oonzo dhomauyelele odha li yakele ko oshitumikundaeki sha ZimOnline kutya, poshigongi shika opwa li oompata dha kindja. Omupresidende gwa Botswana Ian Khama, okwa li a popi kutya moshilongo shika mu ningwe omahogololo omape, ga manguluka noge li pauyuuki.
‘Khama okwa li lela e li ompoinge nosheetwapo shEpangelo lyopaukumwe,’ onzo yimwe yomauyelele osho ya popi ngaaka. Botswana okwa kala nokukondema Epangelo lya Robert Mugabe shuukilila na manga nokuli oshigongi shika ina shi ningwa, oshilongo shika osha li sha popi kutya omahogololo omape ogo ashike taga ka kandulapo omaupyakadhi ngoka taga inyenge mu Zimbabwe.
Omupresidende gwa Tanzania, Jakaya Kikwete, ngoka oye e li Omunashipundi gwa AU nOmupresidende gwa Zambia, Rupiah Banda, ayehe oya li aniwa ya popile osheetwapo kutya naku ningwe omahogololo omape mu Zimbabwe, pehala lyokweeta mo Epangelo lyopaukumwe kamu na shili uukumwe.
Ngoka a li nale Omupresidende gwa South Afrika, Thabo Mbeki, okwa li aniwa a hala Epangelo lyopaukumwe mu Zimbawe na okwa li aniwa yambidhidhwa ku Motlanthe nokOmupresidende gwa Namibia, Hifikepunye Pohamba.
Oonzo dhomauyelele odha popi kutya AaSouth Afrika oya li ya longo noonkondo, opo osheetwapo kutya mu Zimbabwe natu etwe Epangelo lyopaukumwe shi yambidhidhwe.
Okuya nee aniwa pehulilo, Botswana, Zambia na Tanzania oya li awike oya itaye shi shi popile, nokukala ya fa yi ikalekelwa.
Mugabe omo a li moshigongi pethimbo lyoompata dhika, a li ashike a kuutumba a mwena. Tsvangirai kali, ihe sho a ka etwa mo e ta pewa oshizemo shoshigongi, ka li e shi shi ngele opwa li etopoko enene.
Mepangelo ndika, Robert Mugabe ota tsikile nokukla Omupresidende, omanga omuwiliki gwa MDC Morgna Tsvangirai ta kala Omuprimimanista.
Omasiku ga zi ko, ehangano li na sha nuundjolowele lyIigwanahangano nenge World Health Organisation (WHO), lya popi kutya ngashiingeyi aanttu mboka ya si komukithi gwOkolera mu Zimbabwe, otaya ihilile po 3 000 omanga ya konda po 56 000 ya kwatwa komukithi nguka okuza mu Auguste 2008.
’Iinima oya li ya kundathanwa shuukilila na sho twa thiki pehululi, kapwa li we omapulo inaga yamukulwa,’ Motlanthe osho a popi ngaaka konima yoshigongi shika.
Motlanthe oye a li Omunashipundi gwoshigongi shika.
Omutseyinawa miikwapolitika gumwe, Dirk Kotze, okwa ti oshizemo shoshigongi shika otashi monika shi li nawa, ihe uupyakadhi oku shi tula miilonga.
Kotze oha gandja ootundi mOunivesiti ya South Afrika.
‘SADC ehangano ashike lyiilongo na omatokolo ge itaga dhengele. Ngele ombinga yimwe oya shuna monima kombinga yiiyetwapo ya SADC, nena otwa shuna kononola yotango,’ Kotze ta popi ngaaka.