Pohamba ta londodha oshigwana shaangale uukwamuhoko

OMUPERESIDENDE Hifikepunje Pohamba okwa londodha aayambidhidhi yongundu ye ya angale uukwamuhoko.

‘Uukwamuhoko owo oshiponga oshinene.Otuna okushi yanda,’Pohamba a ti sho a popitha oshigongi shoSwapo poKaiti, Olyomakaya ga yi.’Na tweendeni muukumwe tuuka kesindano enene lyakwata oshilongo ashihe,’Pohamba ta indile sho a ulike komahogololo gopauperesidende noshigongi shopashigwana ngoka ge li ko mu 27 sigo 28 ga Novemba 2009.Okwa ti aantu oye na oku kala ye shi kutya oshilanduli shuukwamuhoko osho oshike, ta ulike omaipumomumwe gopamihoko moRwanda na Somalia shoka ga ningi kiilongo mbyoka ongo oshiholelwa shuuwinayi wuukwamuhoko.Pahapu dha Pohamba, oongundu dhuukwamuhoko ngashingeyi ota dhi ithana dhodhene oongundu dhopapolitika.’Omuntu owa kumwa kutya omalalakano gadho ogeni po,’ osho a pula.Pohamba okwa nkunkilile aayambidhidhi yo Swapo ya yande elongitho lyoonkondo pethimbo lyiikonga yomahogololo.’Eeno otushishi omathimbo gamwe otwa shongwa.Ndele inatu yamukuleni komashongo ngoka nuuhwapindi.Eyamukulo lyeni na li kale okutseyithila opolisi ya Namibia,’Pohamba ta indile.Okwa tseyitha woo kutya ayehe mboka ya kondjele emanguluko meni lyoshilongo naamboka ya li kombanda oye na uuthemba okupewa oodola 2000 komwedhi ongo oonakulwa aakulu.Pohamba okwa ti oshinima shevi, natango oshi li eshongo enene,eta gwedha ko ta ti epangelo lye olii itulamo moku lundulula omulandu gwevi.Omuleli gwaNamibia okwa londodha aayambidhidhi yoSwapo kaa ya edhilile oombudhi momagumbo gawo, ta ti aakiintu nuunona wuukadhona owu li muumbanda wokukwatwa koonkondo monkalamwenyo.Pohamba okwa uvaneke kutya ongundu ye ita yi ka thiga emanya lya londa kekwawo okwaadha epotokonono lyomukundu.’Ota tu ka gandja iimaliwa opo tu ete ehumokomeho kaantu yetu opo yo ya adhe oondjodhi nomalalakano gawo.Ota tu kumike oompito dhomapungulo moshilongo shetu opo ndhika dhi ete po oompito dhiilonga, unene pa ku kumika egwedheko lyongushu kiilongomwa yetu, noshowo kokuhambula iipenima moshilongo shetu, na okuhumitha komeho oongeshefa ooshona naandhoka dhopokati.,’Pohamba a uvaneke.Omuperesidende okwa ulike woo omasindano ngoka oSwapo ya adha ongo ngundu ta yi pangele, unene muundjolowele, muupashioni nenge momatalelopo, melongo, muunamapya moshitopolwa shaKaras. Ta tsikileko ta ti epangelo ota tsikile noku tungila komasindano ngaka.