Pohamba okwa ulwa omahilathano

OMUPRESIDENDE Hifikepunye Pohamba okwa lombwela iilyo yEwawa lyAagundjuka mo Swapo/Swapo Party Youth League (SPYL) mbyoka inayi hala a ye mOmahogololo gOpaupresidende kutya naye shi mu lombwele moshipala ye mu ukilila.

Pethimbo a li ta popitha oshigongi shokangundu okaningamatokolo omanene moSwapo (Swapo Politiburo) mehuliloshiwike, Pohamba okwa li aniwa popi sha yela mo kutya ye okwa vulwa omahilathano mopaati noonkambadhala dhomeholamo tadhi ningwa nelelakano oku mu kutha koshipundi shUupresidende.
Okwa ti kutya ye okwi ilongekidha okuza ko koshipundi, ngele okwe shi lombwelwa shuukilila.Pohamba okwa longtha wo oshigongi shika okutseyitha kutya ye ota ka longitha oonkondo dhe ong’Omupresidende ‘okutula pevi iilyo (yOpaati) mbyoka tayi ihumbata nayi.’
A li wo aniwa a tumbula omadhina gaawiliki ya SPYL mboka inaye mu hala, Pohamba okwa popi wo kutya aagundjuka yamwe mbaka otashi vulika ya li nale iilyo yOkoevoeta, ye li aakwiilonga noya mono ombululu mOpaati okuza ko DTA.
Iilyo yilwe iikuluntu yOpaati oya li aniwa ya haluka nookondo komapopyo ga Pohamba na oya li ye wete sha puka okuuka aagundjuka yOpaati poshigongi shika, molwashoka kaya li po okwiipopila.’Kasha li nande paPohamba. Otwa li twa haluka, unene tuu sho twa li twa mono ompito okukuutumba nEwawa lyAagundjuka poshigongi sha li sha eta po sha omumvo gwa zi ko,’ Ominista yimwe osho ya popi ngaaka.
Omadhina gaaleli ya SPYL ngoka holoka pethimbo lyoshipopiwa sha Pohamba ongashi aniwa lya Elijah Ngurare na Veikko Nekundi, nolyOmukwatakanithi gwo Swapo moshitopolwa sha Shikoyto Armas Amukwiyu na Amushanga-Ndjayi gwehangano lyomahangano gaaniilonga/National Union of Namibian Workers (NUNW), Evilastus Kaaronda. ‘Okwe tu lombwele kutya aagundjuka yetu oyi ili thilu-thilu kwaamboka yongundu yokOtanga na oya monika ombululu kaagundjuka yo DTA, kaakwiilongo nokiilyo iikulu yo Koevoeta,’ oshilyo shimwe oshikuluntu mOpaati osho sha popi ngaaka.
Oonzo dhimwe dhomauyelele odha popo wo kutya Pohamba okwa li wo ponokela Ewawa lyAagundjuka mo Swapo, sho lya kutha ombinga moontamanana dhiilongo mu TransNamib. ‘Ewawa lyAagundjuka mo Swapo kalya li lya pumbiwa po sho oontamanana dha tameke mu TransNamib, ihe oya yi kumwe na NUNW ya dhina ndje,’ Pohamba osho aniwa popi ngaaka.Pohamba okwa li wo aniwa a geela omukalo ngoka gwa longithwa mokuungaunga nuupyakadhi waanona yoonakulwa aakulu e ta gandja wo aniwa uusama kOminista yAagundjuka nOmaudhano, Willem Konjore sho aniwa a ndopa okukandulapo uupyakadhi waanona mbaka. Aanona mbaka oya li taya indile ya pewe iilonga nokupewa eilongo lyoshali, pethimbo ya li ya yungu ontanda pOombelewa dhUuministeli wOonakulwa aakulu omumvo gwa zi ko.
Pohamba okwa popi kutya okwa hala pula Konjore e mu pe olopota kombinga yomaindilo gaanona mbaka na okwa li wo aniwa a geela SPYL sho a tokola okufala aanona mbaka kofaalama yOpaati pondje yOvenduka.’Shika osha li sha ningwa konima yombunda yandje,’ Pohamba osho aniwa a popi ngaaka.