OMUPERESIDENDE Hifikepunye Pohamba okwa endulula ishewe eindilo lye koshigwana opo shi kale kumwe nokutunga oshilongo muukumwe, wumwe nokweekelahi kokule uukwamuhoko. Pohamba okwa endulula eindilo ndika pethimbo lyedhimbuluko lyesiku lyaCassinga oshikando oshiti 34 oshiwike sha yi moVenduka.
Omasiku gane ga May 1978, omatanga gepangelo lyokatongotongo ga South Africa oga li ga ponokele okamba ndjoka kwa li ha yi thikile oontaukidha Namibia muumbugantu wAngola. Okamba ndjika oya li yina aakalimo unene ya thikama maanona,naakiintu, aakwiita yo PLAN mboka ya li mo mokamba ndjoka oya li okamwaalu okashona. Okamba ya Cassinga omwa li hamu pitilwa koontauki dha Namibia ndhoka tadhi zi koNamibia oku ya muupongekwa. Pohamba pedhimbuluko ndyoka okwa ti manga oshigwana tashi dhimbulukwa shoka sha ningilwe esiku ndyoka, na shi ilongeleko kondjokonona ndjoka. Unene tuu moshinima shelongelokumwe, pwaana oku tala kutya nguka okwa za momuhoko guni, omulumentu nenge omukiintu. Okwa ti pethimbo lyekondjelomanguluko aaNamibia oya li kumwe mokukondjela emanguluko lyoshilongo nopwaana ngoka ta pula mukwawo kutya ogwezimo lini noshowo omuhoko gwe ogunipo.Okwa dhimbulutha oshigwana kutya eshongo lya taalela oshilongo olyo okuyanda oku yalula aantu shiikwatelela komuhoko gwawo. Okwa ti osha simana opo omuntu kehe a kale eshi kutya ye oshilyo shoshigwana shimwe oshiNamibia. Okwa indile opo aaNamibia ya tunge oshigwana sha kankamekelwa komautho omawanawa gedhiminathanepo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
