Pohamba a indila aakwambepo ya uvithe ombili pethimbo ndika

OMUPRESIDENDE Hifikepunye Pohamba okwa indila Aaleli yOpambepo ya tameke okuuvitha ombili nokulombwela oshigwana sha Namibia shi kale nombili nonande oya yooloka papolitika.

Eindilo ndika, Pohamba okwe li ningi pethimbo ta popitha oshigwana pEenhana moHangwena Omaandaha, hoka a yile a ka taambe omagano gIikwaniipangitho yoSwapo yopethimbo lyiikonga yOmahogololo, mbyoka a pewa kAanangeshefa Aapakistana yOngeshefa Fatima Plastics yopOshikango mOndoolopa ya Helao Nafidi moHangwena.’Otwa hala omahogololo getu gOpaupesidende nogOshigongi shOpashigwana ngoka ge liko okuza meti 27 sigo eti 28 Novemba 2009 ga ka ende nawa, ge li mombepo yombili, notandi indile aauvithi, ya tameke okuuvitha ombili mokati koshigwana, shi kale mombili ethimbo alihe, unene tuu pethimbo lyiikonga yomahogololo nopethimbo lyomahogololo,’Omupresidende Pohamba ta ti ngawo. Oshigongi shoSwapo shesiku pEenhana, ngaashi shito, osha li sha egululwa nEgalikano kOmusita gwomEenhana, nOmupresidende Pohamba okwa li a pandula sho sha egululwa nEgalikano nokupewa ompolo neyambeko.Esiku olyo tuu ndyoka, Omupresidende Pohamba okwa lombwele Aaswapo mpoka kutya oomvula ndhoka Swapo a pelwe koshigwana a pangele Namibia, odha pwa ko notaku ka ningwa natango omahogololo pehulilo lya Novemba moka Oongundu odhindji dhOpolotika tadhi ka kutha ombinga, noshigwana otashi ka pulwa natango kutya osha hala natango Oswapo yi tsikile nokupangela, nenge osha hala po ongundu yimwe yi ili. ‘Omahogololo ogo nee ngoka, noshigwana thikama nee wu ka hogolole, notandi mu indile mu ka hogolole nawa, ano mu ka hogolole Oswapo, Omupresidende gwOswapo nIilyo yOshigongi shOpashigwana yOswapo. Oswapo oya pula ndje ngele onda hala natango okukala Omupresidende gwOswapo, nonde yi lombwela kutya osho naanaa, onda hala natango okukala Omupresidende gwOswapo muule woomvula ntano tadhi landula. Onkee nee oshigwana sha Namibia, otandi mu indile kutya mu ka hogolole nawa. Ngaye ongaye nguka ka hogololiindje kumwe nOswapo yetweni opo yi vule okutsikila ko niilonga yehumithokomeho lyoshilongo noshigwana, mbyoka ya adhika yi ipyakidhila nayo. Oswapo oyo ayike ongundu yi shi kwiinekelwa. Epangelo lyayo olya longa oshindji, no ta li tsikile oku longa ngaashi ta li tungu ondjila yopokati koRundu nElundu ndjoka tu na okumanitha natango, onkee tu hogololeni. ‘Omupresidende Pohamba ta ti ngawo nokwiindila koshigwana shi koneke nawa aanangeshefa yAaPakisatana mbaka, oshoka otaya kwathele noonkondo oshigwana , shi humekomeho. Omuperesidende Pohamba ota ti opu na aantu yamwe, shampa ashike omahogololo taga thiki yo ota ya tameke okutota po oongundu dhoopolotika, ya hala okweeta omapiyagano momadhilaadhilo gaakwashigwana. Yamwe taya ti Oswapo oya kanitha ondjila. ‘Yamwe otwa li nayo. Ya li ya hala okuninga Oppresidende yOswapo, yoshilongo, ashike sho ya dhengwa mo ku Pohamba, oya tameke taya ti kutya aniwa hangaye nda li ndi na okuninga Omupresidende. Ngoka ta ti ngawo, okwe shi popi sho a dhengwa mo momahogololo ndele ta geye, nokutokola a ka tote po Ongundu ye yOpolotika. Ashike nee sigo oompaka inayi pondola po sha. mEenhana omo ya li momahogololo, ndele tayi dhengwa mo ku hailwa Haufiku. Tayi ka kutha ombinga momahogololo gokOmufiya. Nako inayi mona ko sha shomupondo. Kape na sha shimwe shi ili, kashi shi ashike okuhala oshipundi. Taya ende taya lombwele oshigwana kutya Epangelo tali wilikwa ku Pohamba kali li nawa, oshoka aniwa ke shi kupangela. Pohamba mEpangelo ini itula mo ye mwene, okwa tulwa mo koshigwana, osho she mu panda noku mu hogolola a kale Omupresidende gwasho,’ Omupresidende Pohamba ta ti.