Peni Swapo iipundi oyindji mu dhimbiwe Shailemo ta ti

PETHIMBO ta popitha oRDP pOluno moShana meti 14 Novemba 2009, omusamane Ismael Shailemo, okwa londodha kutya shampa ashike Swapo a mono omawi ogendji taga vulu oku mu pa uuthemba wokutokola shoka a hala mOmutumba gwOpashigwana, nena oshigwana nashi kale shi ,shi shi kutya osha dhimbiwa kOswapo ngawo.

Shailemo ta ti momumvo 2004, Swapo okwa li a pewa omake ogendji gokutokola shoka a hala mOmutumba gwOpashigwana, nokuza mpoka okwa tameke ta tidha Aanahambo aapopi yOshiwambo mOkavango. ‘ Shampa twe mu peni omake ogendji nena kaleni mu shi shi kutya otatu ke shi moneni. Otaka lombwela omalenga nooyene yomikunda kutya oongombe dheni odhindji, dhipageni po dhimwe. Swapo oku na onyanya na oha dhimbwa aantu,’ Shailemo ta ti kutya ngeno ha RDP ngeno aagaluki ya sila pomutenya, oshoka ngeno Swapo okwe ya tala ashike ye li mpoka taya mono iihuna. Shailemo ta ti kutya Swapo oku na onyanya, a dhimbwa nOongeleka ndhoka dha kala tadhi mu kwathele noonkondo pethimbo lyekondjelomanguluko. Oshoka omagongalo gamwe miilando ngashi mEenhana, otaga kuthwa omahala gago koomuni yoSwapo. ‘ Swapo a dhimbwa yakwawo. Tse otwa hala Omuleli, Hidipo Hamutenya ngoka ta kwatakanitha oshigwana kumwe,’ Shailemo ta ti ngawo. Omusamane Shailermo okwa li wo a popi nokunyenyeta kEpangelo lyOswapo, tali futhitha aantu omeya. Ta ti omeya oga ninga ondilo, noshigwana unene tuu aakulupe, itaya vulu we oku ga futa.