Oyendji ya shuna komagumbo

OYENDJI yomoonakutembudhwa pomahala gawo komeya gefundja kuyele nuumvo
mOshakati, mOndangwa nomomidhingoloko ya shuna komagumbo gawo, ashike opu na yamwe natango inaya shuna, molwashoka omagumbo gawo onkee ngaa ge na noga dhingililwa komeya nokontopo yomeya gefundja.

Omunambelewa ngoka ha popile ko Elelo lya Shakati Anna Ingwafa, ta lombwele The Namibian kutya omeya gefundja, ngoka ga hepekele noonkondo oshigwana shomOshakati, unene tuu shomomalukanda ngashi Oneshila, Oshoopala,Kandjengedi, Evululuko, Uupindi, Eemwandi, Olukanda lwaShimbangu nosho tuu, ga shuna nenge ga fadhuka po, noshigwana oshindji shoka sha li sha tembudhwa pomahala gasho, ngashi unenenene sha Shoopala, Oneshila, Evululuko nUupindi ombinga yimwe, pethimbo ndika oshi li tashi shuna komagumbo gasho kOmalukanda hoka n osho tuu.Oshigwana oshindji okuza komalukanda ngoka gomOshakati, ngashi ga tumbulwa metetekelo, osha li sha tembudhilwa kOosenda nenge komahala haga ithanwa Oshoopala nEkuku ge li moNooli yOfaabulika yOnyama mOshakati, ga egama komukunda Ekuku ngoka gu li kumwe nOkatana. Meme Ingwafa ota ti kutya, nonande oyendji ya shuna komahala gawo omakulu hoka ya tidhilwe komeya gefundja, opu na natango yamwe, ngashi unene kOsenda ya Shoopala, mboka natango inaya shuna komagumbo molwashoka oku na natango omeya gefundja, ngoka ge na okupwinina, nenge ontopo yi kuthwe po, opo ya shiwe okushuna momagumboo gawo hoka. Ingwafa ta lombwele The Namibian, kepulo kutya, Elelo lya Shakati olya ninga etokolo li tutithe ko oshali aantu mbaka sho taya shuna komahala gawo ngeyi. Kuyele aakalimo yamwe ye li kOosenda Oshoopala nEkuku, kaya li ya hala okushuna komagumbo gawo omakulu, taya ti kutya oya vulwa okuuhala taya tembauka.Nande ongawo moshigongi shawo na Muni gwa Shakati, sha li ko mEtiyali lyoshiwike sha zi ko, oya uvathana ya shune komagumbo manga Muni ta tula miiloonga omalongekidho ge gokutembudhila aakalimo ya gumwa komeya gefundja kOosenda nenge komahala hoka ku li nawa mOshakati. Kepulo kutya sho nee aakalimo ya shuna komagumbo gawo ngawo,lyo ethimbo olya thinda natango komvula onkwawo tayi ya, ndjoka tashi vulika tayi ka kala natango onene nokuyelula aakalimo momagumbo gawo, unene tuu ngele oye ya natango nefundja, Ingwafa okwa ti kutya Elelo lya Shakati pokati mpoka otali ka longa pamathaneko omanene ngoka ga tulwa po kEpangelo gokukelela omeya gefundja ga kale hage ya mOshakati. Ingwafa ta ti edhilaadhilo enene ndyoka li li po ngashiingeyi okweendelela ku monikile aantu omahala kOsenda ya Shoopala nEkuku noku ya tembudhila hoka meendelelo ngashi tashi vulika. Omupopiliko gwElelo lya Shakati, ta ti kutya pethimbo ndika otaku ningwa omakonaakono kutya mwaamboka ye na okutembudhilwa hoka, oyeni yomuyo ye na nenge taya vulu okumona ekwatho lyokutunga omagumbo pakwathelo lya Build Together, lyopa Shack Dwellers nenge mboka taya vulou okutunga omagumbo nande opa kwatho lyOombaanga nenge lyopailonga yawo, oyo ya tameke tango, ko taku talika nee yalwe wo yuumbashu nosho tuu.Omukundu nee gu li po, Ingwafa ta ti, ogwomahala. Ta ti, nonando omikunda dha dhingilila Oshakati, ngashi Ekuku, Ehenye, Okakukiipupu nosho tuu, dhi na okuyapukila ehumokomeho, onkee oshidhigu kaakalimo yomomikunda moka, ya zimine okuyapukila ehumokomeho lyondoolopa. ‘Kashi shi nande oshipu okukutha aantu mboka pomahala gawo. Ashike nande ongawo Elelo lya Shakati onkee tali kundathana naakalimo, ano nooyene yomikunda ndhoka kumwe naalelwa yawo moshinima shoka shokuyapukila ehumokomeho lyondoolopa,’ Ingwafa ta ti nokugwedha ko ta ti, ngashi kombinga ndjoka ya Shoopala nEkuku oko naanaa ku na okutembudhilwa aakalimo yomOshakati mboka ya gumwa nayi komeya gefundja, nElelo lya Shakati oli na okwiitula mo noonkondo moonkundathana na mwene gwomukunda Ekuku kumwe noshigwana she ya tale mpoka taya adha euvathano moshinima shokuyapukila ehumokomeho kaanamukunda ngoka, opo ku tungwe omagumbo gopandoolopa, kutembudhilwe nee mboka ya gumwa komeya mOndoolopa ya Shakati.Kombinga yEhenye, aakalimo onkee taya ti yo pomahala gawo itaya zi po, okuninga Elelo lya Shakati tali ke ya futa sha gwana, ngashi taya pula. Aakalimo otaya ti okamaliwa hoka Elelo lya Shakati lya hala oku ya futa okashona noonkondo okuyelekanitha nomaliko gawo mpoka. The Namibian, okwa kundana wo kutya naamboka yokEkuku, otashi vulika ya ka pule oshimaliwa oshindji sha eleka momapya, omagumbo, oondhalate dhawo, omiti dhawo dhopamuthigululwakalo, ngashi omiye, omigongo nosho tuu.