Oyendji oya pumbwa iikulya

EPANGELO olya pumbwa okulongitha oodola oomiliona 59 oku keelela aaNamibia omayovi 50 000 yaa se kondjala noku kwathela aanafaalama 106 000 ya hepa opo ya vule okufuta iipangelo, elongo, oombuto, uuhoho noshowo ya vule okupulula omapya gawo.

Omushangwa gwa zi ko Kabinete ogwa ti ehokololo kombinga yekonakono lya nkene pena oluhepo lyomumvo 2010-11 olya ndhindhilike omaupyakadhi gatano ethimbo ndyoka. Ngaka ogo eyo pombanda lyoondando dhiikulya, momikunda, omikithi dhiimuna, omafundja niikukuta noshowo eipumomumwe lyaantu niithitukuti.Okabinete oka ti onkalo yombepo yaali nawa pamwe noluhepo oyo ta yi geeyeke onkalo yuuthigona moshilongo.Okabinete oka ndhindhilike kutya aantu omayovi 42 100 ota ya ka kala ye na uudhigu okwiipalutha ethimbo lya popiwa lyomimvo 2010-11.Aantu omayovi 33 493 yomomwaalu nguka oye li moshitopolwa sha Caprivi, momikunda ndhoka hadhi longwa epungu nokulithwa oongombe.Omanga aantu omayovi 8 607 ya hepa oye li moshitopolwa sha Hardap nosha Karas muumbugantu woshilongo mevi lyoofaalama dhiipindi, moka taya munu iimuna iishona.Okwa hololwa ishewe kutya aantu 106 297 ita ya ka vula okufutila, elongo, uunamiti, oombuto, uuhoho nenge okupulula omapya gawo.Aantu mbaka oye li momahala gomasilu hamulongwa epungu nohamulithwa iimuna, yakwawo oomboka ye li muumbugantu woshilongo ha ya litha nenge ha ya munu oonzi niikombo, noshowo moshitopolwa Omaheke nOtjozondjupa moka hamu munwa oongombe. Okabinete oka tseyithilwa kutya opo mbaka ya kwathelwe epangelo olina oku longitha oodola oomiliona 45.Okabinete oka ti opwa pumbiwa ootona 2 440 dhepungu okuya hupitha omanga ootona 7 877 odha pumbiwa opo mbaka ya kale ya gamenwa paikulya ethimbo 2010-11. Okabinete oka zimine oonkatu ndatu ndhoka dhi na okukuthwa methimbo efupi, ngaashi kutya mboka yomo Caprivi, Kavango, Hardap na Karas itaaya vulu okulonga oyena oku pewa iikulya yoshali.Oohepele mo Caprivi, oshitopolwa shimwe shaKavango, Hardap, Karas, Omaheke nOtjozondjupa mboka ta ya vulu okulonga ota ya ka pewa iimaliwa noshowo iikulya ngele ya longo, momukalo gwanakulya osha nakulonga. Omukalo omutitatu okutala kutya omayakulo gepangelo momikunda oga longekidhwa nawa. Okabinete oka zimine woo omikalo dhilwe dhethimbo ele oku kondjitha oluhepo.Okabinete pomutumba gwako gwa Auguste oka lombwele ombelewa yomuPrima Minista opo yi etepo omwaalu ngoka gu na oku kwathelwa, noshowo oku tala kutya epungu ndyoka li na okulandwa moKavango olyo ngushu yi thike peni. Okabinete oka ti ombelewa yomuPrima Minista oyi na woo oku gandja iikulya yekwathelo komalukanda giipeleki miilando.