Oyendji oya geya kombinga yepulakeno lya longekidhwa

ONTSI ina yi shuna pevi natango kombinga yOmpango yOmakwatathano ndjoka ya tseyika ongo ‘Ompango yUundaadhi’.Aatotimpango yegumbo etiyali lyoparliamende oya li ta yiipopile kepititho lyontotwampango ndjoka pwaana malundululo.

Aakwashigwana pamwe naamboka ya gandja omaiuvo gawo kombinga yompango ndjika pethimbo lyomasiku gatatu gepulakeno lyoshigwana, lya longekidhilwe kEgumbo Etiyali lyoparliamende, oya li yuuvite nayi.Euvo nayi, olya zi mpoka sho ompango ndjika ya ziminwa , inaa yi kwatela mo omathanekolunduluko ngoka yo ya thaneke.Oyendji oyuuvite ya gwaalekwa kegumbo ndika, no ya ti etokolo lyalyo oku ninga oonkundathana noshigwana kombinga yompango ndjika osho ashike okugwayeka oshigwana omahoka komilungu.Kuyele ombedhi oya li ya pewa aanambelewa yegumbo etiyali lyoparliamende kutya aniwa oyo ya ndopa okushanga omalundululo mompango ndjika. Ndele omunashipundi shongundu yiikwapondje, egameno nepopilo lyoshilongo, omusamane Johny Hakaye okwa koleke kutya yo, ongaatotimpango oyo ya tokola opo ompango ndjika yi pitithwe ngaashi yi li.Ompango ndjika oya pitithwa kOshigongi shOpashigwana pwaana elundululo lya sha, egumbo etiyali lyoparliamende olya dhiladhila kutya oshaanawa oku yi fala koshigwana shi gandje omaiuvo gasho kuyo.Ndele omathaneko nomagwedhelepo ngoka oshigwana sha ningi ogo, osima yowala, molwaashoka ina ga taambwa kaatotimpango yomegumbo etiyali lyoparliamende.Hakaye okwa ti omathaneko lundululo ngoka ga thanekwa kaakwashigwana otaga monika nale moompango dhimwe ngaashi ndjoka yoku kondjitha uukulo, ndjoka yinasha niimaliwa, ndjoka yokukondjitha eyono lya longekidhwa naandjoka yi na sha niilonga yomonanguwi.Okwa popi ndhika konima sho a pulwa kutya omolwashike omalundululo inaaga kwatelwa mo.Okwi ipopile ishewe ta ti egumbo lyawo ina li zimina ashike ompango ndjika inaa li ninga sha ngaashi aantu ta ya ti.Aatotimpango oya tokola kaa ya ete omalundululo mompango ndjika nonando oshigwana sha li sha ningi omathaneko gasho, nomalunduluko ngoka sho sha hala okumona.Mboka ya gandja iiyetwa po kompango ndjika oya li ya geya no yuuvite nayi mwa kwatelwa amushanga gwo the Namibian ko ku uva kutya ompango ndjika oya pitithwa inaa yi lundululwa.’Egumbo Etiyali lyoparliamende olya dhini omathaneko goshigwana. Shoka ta shi kumitha ooshika kutya ongundu ndjoka ya pulakene oshigwana oya li ya gandja omathanekolunduluko mompango, ndele nee Egumbo lyolyene olya tokola oku pititha ompango pwaana omalundululo.Omukalo nguka ota gu shololitha oshigwana kaashi kuthe we ombinga miigongi yokupulakena iikwampango, ngele na ni ominista oya tokola nale kutya shika osho oshi na okuningwa. Omukuluntu gwo Institute for Public Policy Research Graham Hopwood a ti.Ombudsman John Walters na ye okwa tsu kumwe na Hopwood, ta gwedha ko ta ti oparliamende oyi na uuthemba okupitha ompango ndele oyi na woo okuhumbata oshilanduli ngele ndjika oya kondjithwa mompangu.Hakaye okwa ti oshigongi shokupulakena oshigwana ka sha li ehepeko lyiimaliwa, ethimbo, noonkambadhala. Onda li nda hala oshigwana shi gandje omadhiladhilo gasho.Ndika olyo edhila dhilo lye sho a pitika shika shi ningwe.Mokati komalundulo ngoka oshigwana sha thaneke ongaashi ndyoka li nasha nokutsakaneka omakwatathano. Opwa thanekwa shika shi ningwe ashike ngele elombwelo olya zi komupanguli peresidende nenge komupanguli ngoka a pewa uuthemba kuye opo a gandje elombwelo lya tya ngaaka.Amushanga gwo The Namibian, Gwen Lister ngoka woo a gandja omathaneko ge pamishangwa noshowo pakana,kokangundu haka okwa ti etokolo lyegumbo ndika ota li eta eiyuvo lyoluhodhi kombinga yuudemokoli, okutseya kutya omapulakeno ngaka oga li uudhano wo wala.’Onda li nda pandula egumbo etiyali lyoparliamende ketokolo lyawo oku pula oshigwana nkene shi uvite ndele ngashingeyi ota shi uvitha nayi okumona kutya shika sha ningwa ka sha li etokolo lya za komutima, noshigwana osha gwaalekwa ashike pamukalo nguka.