Ovo va kanifa oimaliwayavo mombaanga yoSME ve li 23 000 otava ka topola eemiliyona N$30

Ovanhu ve fike lwopo23 259 ovo kwa li va kanifa oshimaliwa shavo moumbudi oo kwa li wa ningwa mombaanga yoSME otava ka futwa oshimaliwa shi fike peemiliyona N$30.

Omudaninghandangala moshinima omu omukwashiwana waZimbabwe noku li e na mo oipambuliko mombaangaa yedina Small and Medium Enterprise (SME) oye Enock Kamushinda.

Ovanhu ovo tava pate ombaanga, Ian McLaren naDavid Bruni, oshivike eshi ova ti ovanhu ovo kwa li va tuvikila oshimaliwa shavo mombaanga omu otava ka futwa eesenda 15 keshe modola oyo kwa li va tuvikila mombaanga omu.

Eshi oshe ya konima eshi ovanhu ovo tava ungaunga noinima yombaanga ei kwa li va shiivifa Etivali kutya oshimaliwa shi fike peemiliyona N$130 osho kwa li sha kana ove shi mona.

Ova ti eemiliyona N$100 domoshimaliwa osho sha monika okwa li da longifwa mokukonga oshimaliwa eshi, osho sha eta opo pa shaale ashike eemilyona N$30 odo tadi topolelwa ovanhu ovo va kanifila oimaliwa yavo mombaanga omu.

Ovanhu ovo tava ungaunga noshinima eshi otava feekele kutya oshimaliwa shovanhu ava kwa li hava longifa ombaanga ei shi fike peemiliyona N$257 osha kana.

Ova ti kutya oshimaliwa shihapu okwa li sha hangika moSouth Africa komahangano okulonga noshimaliwa, osho va itavela kutya osha ya koZimbabwe.

“Kondadalude omahangano avali,” Bruni osho a ti ngaho Etivali.

Eshi ombaanga yoSME kwa li ya patwa kakwa li tai monika i na omaliko, McLaren osho a ti ngaho.

Oshimaliwa osho sha monika po sheemilyona N$100 osha pula ovanawino momakonakono opaungoba, osho va ti ngaho.
Ovanhu ava tava ungaunga nepato lombaanga ei otava pula opo eembaanga edi da kwatwa mo moshinima omu opo di yandje ouyelele kutya oshimaliwa eshi osha xulila peni. Oshinima eshi otashi pula natango oule weedula mbali ile nhatu opo shi manifwe.

Oshimaliwa shimwe shi fike peemiliyona N$67 oshi li moDubai paife ngaha, osho sha pitila moDemocratic Republic of Congo, Bruni osho a ti ngaho.

Opo twaalule oshimaliwa eshi otashi pula oshimaliwa shi dulife po pusho.
Fiyo opapa omishangwa otadi ulike kutya, oimaliwa oyo ya longifwa papuko oi fike peemiyona N$257, ashike ovanhu ovo tava ungaunga nepato lombaanga ova itavela kutya oi dulife po opo.

EESENDA NANHO
MODOLA IMWE
Ovanhu ovo kwa li ve na mo oshimaliwa shavo mombaanga omu okwa li kwatengenekwa va mone ashike eesenda 25 keshe modola kwa li va tuvikila, ashike ovo tava ungaunga nepato lombaanga ova itavela kutya otashi dulika omwaalu ou u ka ye pombada.

“Fiyo onena, otwa futa eesenda 15 keshe modola, notwe lineekela okuwanifa po ile okukoyelela po pomwaalu wetu oo twa tengeneka weesenda 25,” Osho a ti ngaho.

Omukalelipo wovatuvikili mombaanga omu Daniel Nyaungwa Etivali okwa ti ova lombwelwa kutya otashi dulika ashike va ka mone eesenda nanho keshe modola va tuvikila.

“Osha ninga efimbo. Otwa hala oimaliwa yetu paife ovanhu vamwe ova fya nale kohonde ya londa nokomadilaadilo molwoshinima eshi,” Osho a ti ngaho.

Nyaungwa okwa ti okukala itava dulu okumona oshimaliwa shavo oshe va etela oupyakadi komalutu nopamadilaadilo.
Okwa ti ovanhu inava hala okweeta omakulukuto moshiwana.

“Katu wete kutya oshike epangelo itali dulu okutupa oimaliwa yetu. Ova pumbwa okuninga po sha,” Osho a ti ngaho.
Bruni naMcLaren ova ti ova xulifa po okukonga Kamushinda, ashike inashi ekelwashi.

“Okumukonga okwa xula, ndee katu shi kutya ohatu ka mona ko shike oko, shaashi otwa uda kutya okwa tembukila koSingapore.

“Ashike nande okuye, okupata nokulandifa po omaliko aye oo e li moZimbabwe kashi shi oshinima shipu,” McLaren osho a ti ngaho.