Banner Left
Banner Right

Ovayakulwa vombaanga yoFNB ova kengelelwa eemiliyona N$4 meemwedi mbali

Omaanga yoFirst National Bank (FNB) Namibia otai konakona oiningwanima yekengelelo i li 103 ya ningwa muNovemba naDesemba odula ya dja, yoshimaliwa shi fike peemiliyona N$4.

Oshinima eshi okwa li sha etwa koluheela komulukunhu woshikondo shimwe moFNB Johan du Plessis Etine. Du Plessis okwa ti oshimaliwa shi fike lwopomiliyona imwe okwa li sha monika nokwaalulilwa oovene.

“Pakutala pokudja muNovemba fiyo oDesemba 2024, FNB okwa lopota nokwakonakona oiningwanima yekengelelo i li 103. Eshi osha kalela po omwaalu uhe fike nopopelesenda imwe yovayakulwa ovo va kumwa kekengelelo eli.

Oshimaliwa osho sha kana molwekengeleo e li oshi fike peemiliyona N$4, ashike opwa monika ashike inashi hanga nopomiliyona shovayakulwa ovo va kumwa koshinima eshi,” Du Plessis osho a ti ngaho.

Oshoondaxa, opolifi okwa li ya lopota kutya momafiku 15 nomafiku 17 Januali, omukainhu womukulupe weedula 60 a dja kUukwamatsi kOkahao okwa kanifa oshimaliwa shi fike pomiliyona oshinghwanyu imwe okudja kombaanga yaye yoFNB.

“Omufeekelwa okwa longifa omukalo uhe shiivike opo a mone oufemba wokuya kombaanga yanakuningwa oshihakanwa yoFNB,” Komufala wopolifi kOmusati Ismael Basson osho a ti ngaho.

Okwa ti ongangala oya twikila nokutumina oimaliwa keembanga dimwe da yooloka daFNB, osho sha eta opo nakutula mo oshibofa a kanife oimaliwa ihapu neenghono.

Du Plessis okwa ti oshibofa oshomafiku aa osho sha lopotwa kopolifi osha limbilika ovanhu.

“Oshibofa eshi osha holola kutya eengangala oda hala okuya kokule lela. Mondjila yokukendabala okulanda oipumbiwa nomayakulo, omuvatelwa wetu okwa shakeneka omunhu oo e mu lombwela oipupulu, ashike nee, konima yomakonakono, ohatu koleke kutya oshiningwanima eshi kakwa li nande sha kwatela mo omunhu womeni loFNB,” Du Plessis osho a ti ngaho.

Okwa ti oshikondo ashishe eshi osha pumbwa okulongela kumwe opo shi lwife oimbuluma nomakengelelo.

“Otwa pumbwa okuuya pamwe ongoshikondo, hatu longo ovayakulwa vetu ndee hatu longo novakwatelipo voveta.

Onda itavela nawa kutya oshikondo novatulipo voveta ova pumbwa okulimanga oukunikumwe. MoSouth Africa, omu na oiholelwa imwe nghee oshikondo she ya kumwe ndee tashi toto po endiki lomauyelele eembaanga.

Oveta yetu moNamibia oya hala tu ninge osho sha ningwa moSouth Africa nohatu longele kumwe navo opo tu tote olutu eli,” Du Plessis osho a ti ngaho.

Natango, omukulunhu woshikondo shoilonga shaFNB Rodney Forbes okwa ti ombaanga oye litula mo mokukelela omakengelelo.

“Opu na elitulemo lakula lokukwashilipaleka kutya eameno letu nomilandu deameno odi li pamufika osystema oyo hatu konakona oinima imwe, mwa kwatela oufemba wovanailonga, oinyangadalwa yovanailonga okuya meesystema nosho yo omauyelele oo tava dulu okumona mosystema omo.

“Opo twa mono kutya opu na oshinima sha pumbwa okutalululwa, ou shi shi, opu na oinima inai yela nawa, ohatu ningi omakonakono,” Forbes osho a ti ngaho.

Omukulunhuwiliki woshikondo shomayakulo eembaanga oohandimwe Nangula Kauluma okwaanya eudeko loshiwana lokutya ovanailonga vomeembaanga ohava dulu okuya keembangaa dovayakulwa.

“Onda hala okukufa omhito di anye omutoto kutya keshe omunhu e li metungo ota dulu okumona ouyelele womunhu keshe.

Ovo tava dulu okumona oinima oyo kosystema, ove na ashike oufemba waasho tava dulu okuninga kosystema, osho tava dulu okumona kosystema, osho va pitikwa okulonga nohava kala tava konakonwa,” Kauluma osho a ti ngaho.

Okwa ti ombaanga ohai tale keshe osho tashi linyenge kosystema.
“Ondi wete kutya otu na oshinakuwanifa opo tu popile ovanailonga vetu. Ohava longo lela pouyelele,” Kauluma osho a ti ngaho.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News