Ovatamanekwa moshikumungu shoFishrot ova hala oihokolola yavoya kalekwa manga

Ovafeekelwa vatatu moshikumungu shoFishrot ova hala oihokolola yeemhangu davo ya kalekwa manga fiyo omhangu ya shiya ko otai yandje etokolo komapulo avo opaveta oo kwa li va pula.

Ovafeekelwa ava vatatu ovo nee haendendjai nominista ikulu youyuki Sacky Shanghala, kaume kaye mongeshefa James Hatuikulipi naPius Mwatelulo, ova hala okupula omhupanguli ta vatele Moses Chinhengo opo a didilike “omapulo oveta”, oo a pumbwa okutuminwa komhangu ya shiya ko, omhangu yavo oya undulilwa komesho momafiku 26 Juli.

Omapulo aa oku li kombinga yomatokolo oo Chinhengo a ninga pefimbo lomhangu yavo oyo ya dja ko yovalumenhu ve li 10 ovo tava tamanekelwa oshibofa shoFishrot, eshi kwa li a pula opo ovafeekelwa va lombwelwe oibofa oyo tava tamanekelwa omanga eemhangu davo inadi tameka, nande ovafeekelwa vamwe kakwa li ve na ovakaleli po vopaveta ponghatu oyo.

Shanghala, Hatuikulipi naMwatelulo natango otava pula kutya omolwashike Chinhengo e na okuhoololwa a ninge omupanguli womhangu yopombada yaNamibia.

Oihokolola yeemhangu da di wilikwa kuChinhengo okwa li ya tameka odula ya dja ko muDesemba, eshi kwa li a pula kutya epangelo nali tameke okutulila mo ovafeekelwa oibofa yalo. Ashike nee, oihokolola okwa li ya kanghama manga eshi omufeekelwa umwe, Nigel van Wyk, kwa li a ninga eindilo opo Chinhengo a kufwe mo moshibofa shavo.

Chinhengo okwa li a ekelashi eindilo laVan Wyk olo tali pula opo a dje mo moshikumungu omu muMarsa ndee nomuMei natango okwa ekelashi eindilo laVan Wyk opo a ninge endilotalululo komhangu ya shiya ko shi na sha netokolo laye kombinga yeindilo olo tali pula opo a dje mo moshikumungu omu.

Konima Van Wyk okwa shangela omhangu ya shiya ko omukanda opo a pewe omhito a ninge eindilotalululo kombinga yetokolo laChinhengo kombinga yeindilo laye opo a dje mo moshikumungu shavo.

Eshi ovalumenhu ava tava tamanekelwa oshibofa eshi kwa li tava pangulwa komhupanguli Herman January momhangu yopombda yaVenduka Etitano, shaashi Chinhengo kali po, omupedu tamanekindjai Ed Marondedze okwa ti kutya omhangu ya shiya ko, pamhito ei, oya ekelashi omukanda waWyk.

Omukanda okwa li waanywa komhupanguli Sylvester Mainga naElton Hoff nomhupanguli ta vatele Theo Frank Etine loshivike sha dja ko.

Chinhengo okwa li a kaleka oihokolola shaashi Van Wyk okwa li ta kendabala e mu kufe mo moshibofa eshi.
Momukandaindilo womapulo opaveta a pumbwa okudidilikwa kuChinhengo oo natango a tumwa komhangu ya shiya ko, Shanghala, Hatuikulipi naMwatelulo navo otava pula opo omhupanguli a kaleke oihokolola manga fiyo omhangu ya shi ya ko ya ninga etokolo komapulo oo va hala a talwa nawa.

Epulo limwe olo va hala la nyamukulwa komhangu ya shi ya ko otava ti oufemba wavo wepangulo lopauyuki kave u na shaashi kave na ovakalelipo vopaveta ve va kalele po moihokolola yavo yoimbuluma.

Shanghala momukandaano oo wa yandjwa komhangu okwa ti: “Okukala puhe na omukalelipo moshibofa sholudi eli, itapa dulu okukala pu na epangulo lopauyuki, nande ashike okwaame ou ndi na ounongo wopaveta.”

Shanghala natango okwa ti ehoololo laChinhengo ongomhupanguli ta vatele kali li pakotamhango, shaashi oku na eedula di dulife po65, eedula dokuya moshipundi shetulumuko domhupanguli ta kalelele moNamibia, shapo ongee eedula davo dokuya moshipundi shetulumuko da wedelwa kupelesidente.

Shimwe vali, Shanghala okwa ti Chinhengo ita dulu okutwikila nokuwilika oshibofa shoFishrot shaashi okwa li ashike a hoololwa ongomhupanguli ta vatele oule ashike weemwedi 18 okudja muSeptemba fiyo omuDesemba odula ya dja ko ndee kapu na nande etumwalaka la yandjwa kutya okwa hoololululwa odula ei.

Okatendo komhangu yopombada oka ti kutya omhupanguli ta vatele ota dulu okutwikila keshe efimbo ngee omhupanguli okwa hangika e na oihokolola inai pwa.

Shanghala okwa ti, nande ongaho, okapambu kokatendo komhangu yopombada omo mwa popiwa oshinima osho otaka kondjifafana nekotamhango kombinga yeedula dokuxulifa po oilonga moshikondo omu.

Momukanda oo wa yandjwa komhangu, omupedu tamanekindjai Cliff Lutibezi okwa ti kutya Shanghala, Hatuikulipi naMwatelulo otava shikula omilandu da puka.

Lutibezi okwa ti, eindilo lavo lomapulo oveta opo a didilikwe ndee taa tumwa komhangu ya shiya ko itali dulu okuningwa paife pefimbo loihokololo yavo, ashike oli na okuningwa konima yoihokolola.

Eindilo olo tava ningi nali ekelweshi shaashi otali eta ashike omakateko amwe, Litibezi osho a ti ngaho.