Ovanamibia ova pandulwa konima eshi eepelesenda 91 dovanhu ovo va hanga okuhoolola de lishangifa opo di ka kufe ombinga momahoololo oupelesidente nomutumba wopashiwana neudo.
Omunambelewa akula womahoololo wokomisi yomahoololo yaNamibia yedina Electoral Commission of Namibia (ECN) Peter Shaama Etitano okwa ti ovahoololi ve li 1 467 604 ova shangifwa moshilongo nosho yo keembelewa adishe doshilongo koilongo imwe.
Omalishangifo omahoololo okwa xula mefiku lotete laAuguste.
Omundjadjukununi woikwapolitika Ndumba Kamwanyah okwa ti eepelesenda 91 dovahoololi ovo ve lishangifa otadi ulike lela ondodo ya fimana kekufombinga loshiwana nosho yo ouyelele mokati koshiwana.
“Ovanyasha novahoololi vape ova fa ovo va eta omwaalu womalishangifo ovahoololi u ye pombada nawa ngaha, tashi ulike kutya ove na ohokwe yakola yelunduluko. Omwaalu ou otau ulike yoo kutya ovanhu ova hala elunduluko momahoololo aa,” Osho a ti ngaho.
Okwa ti paife okomisi yomahoololo oi na oshinakuwanifa shakula opo i kwashilipaleke kutya omwaalu ou wovanhu ve lishangifa owa ka kufa ombinga momahoololo oovene.
“Okukwashilipaleka kutya oshinima eshi shiwa osha kwatelwa po fiyo efiku lomahoololo otashi ka kala sha fimana mokushila ovahoololi vahapu va ka hoolole,” Kamwanyah osho a ti ngaho.
Petameko lomwedi ou, ehangano lokuninga omavalulo laNamibia ledina Namibia Statistics Agency ola ti Ovanamibia ve fike pomiliyona imwe oshinghwanyu hamano ova hanga okukufa ombinga momahoololo oo twa taalela.
Omwaalu ou owa fikama po movalumenhu ve dulife po763 700 novakainhu ve li 852 100.
Oshitopolwahoololo shaShana noshaKunene aishe oya shangifa eepelesenda 97, omanga Okavango Uninginino oko ke na omwaalu u li pedu weepelesenda 83.
Momudo 2019, okomisi yomahoololo okwa li ya nyolifa ovanhu ve fike po1 358 468, omo ovanhu ve li 820 227 kwa li ve shi pondola okukahoolola – osho sha ulika eepelesenda 60,4 dovahoololi ovo kwa li va hoolola momudo omo.
Omundjadjukununi woikwapolitika Johannes Coetzee okwa ti omwaalu wokulishangifa u li pombada otau ulike edidiliko liwa loudemokoli.
“Oshinima tashi hokwifa paife okutala omwaka pokati kaavo ve lishangifa naavo tava ka hoolola. Otashi kala shi hokwifa neenghono okukonakona etomeno lomwaka oo,” Osho a ti ngaho.
“Eepelesenda 91 otadi ulike ekalelepo liwa nolopauyuki leenghendabala odo da ningwa koECN, osho va pumbwa okupandulilwa,” Osho a ti ngaho.
Okwa ti eengudu dopolitika oda pumbwa okukakufa ombinga meemata doupelesidente noda pumbwa okutameka okulombwela ovanhu osho tadi lalakanene.
Natango, Shaama okwa ti okomisi otai tameke okukufa ko ovanailonga vayo keenhele domalishangifo adishe, moshilongo nosho yo kondje yoshilongo ndee tava alula oilongifo aishe oyo kwa li tai longifwa pomalishangifo.
“Eshi otashi landulwa kokutulika omauyelele etu aeshe omalishangifo keesystema detu,” Osho a ti ngaho.
“Elongelokumwe lovakufimbinga vetu aveshe mokukwashilipaleka kutya omakwatafano nomilandu dokomisi odi li pamufika itali dulu okutumbulwa,” Shaama osho a ti ngaho.
Omupopiliko wongudu yoLandless People’s Movement (LPM) Lifalaza Simaata okwa ti Namibia okwa ulika oshinima shiwa ngee tashi ya povahoololi ovo va shangifwa.
“Oshinima eshi sha pumbwa okulipulwa nasho paife okuhoolola . . . okumona Ovanamibia ve fike pomiliyona oshinghwanyu nhee va hoolole,” Osho a ti ngaho.
Simaata okwa ti opwa pumbwa okuningwa shihapu kombinga yehongo lovahoololi neudeko leesystema dokuhoolola doshilongo.
“Otwa itavela kutya ECN okwa kala ta longo nondede ngee tashi ya komahongo oshiwana,” Osho a ti ngaho.
Omupopiliko wongudu yoUnited Demcratic Front (UDF) Mabasen Narib okwa ti kutya omwaalu vovahoololi ovo ve lishangifa opo va ka kufe ombinga momahoololo otau ulike kutya ovanhu vahapu ove lipaka mo mokuwanifa po oshinakuwanifa shavo ongovakwashiwana.
“Oshiwa neenghono eshi Ovanamibia va tokola okukufa ombinga moinima yopaudemokoli opo va hoolole ovaleli vavo,” Osho a ti ngaho.
Narib okwa ti ongudu yaye oya twa ovayambididi noshiwana ashishe omukumo opo shi lishangife omahoololo.
“Eenghendabala doECN okwa li da vatelwa koikonga yetu yomalishangifo,” Osho a ti ngaho.
Narib okwa pula eengudu dopolitika opo di twikile nokudimbulukifa ovanhu efimano lokuhoolola.
“Ouyelele wa fimana ou na okuyandjwa pefimbo, ngaashi eenhele dokuhoololela. Ovanhu ovo ve li koitopolwa yokomikunda ovo unene ve li moupyakadi shaashi ohava mono ashike eenhele dokuhoololela dopokafimbo.
“Onghee nee omwaalu weenhele dokuhoololela nau ningwe uhapu opo kuyakulwe omikunda meendelelo,” Osho a ti ngaho.
Omupopiliko wevava lovanyasha loSwapo Moses Shikerete okwa ti omalishangifo okwa enda nawa lela.
Pelesidente wongudu yoPopular Democratic Movement (PDM) McHenry Venaani okwa ti: “Omahongo ovahoololi okwa li elipaka mo neenghono.
Eengudu nado oda longa oilonga yado, unene ngaa ongudu yetu nosho yo eengudu dikwao dihapu oda longa shihapu,” Osho a ti ngaho.
“Natu twaleni eepesenda odo 91 komahoololo,” Osho a ti ngaho.
Venaani okwa pandula Ovanamibia eshi va kufa ombinga nawa moshinakuwanifa shavo shokulishangifa.
“Oshinima tashi dulu okupopiwa. Otashi ulike kutya ovanhu ova hala lela okumona elunduluko moshilongo.”
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
