… Alweendo okwa lombwelwa a katuke onghatu
Omahangano omahooli otaa longifa ovakwashiwana vaNamibia opo a dule okukufa ombinga, minista woikwamina noikwanghono Tom Alweendo osho a ti ngaho.
“Tashi udifa nai, onda uda kutya ovanawino vamwe moshikondo shomahooli ova tula ashike Ovanamibia komesho,” Alweendo osho a ti ngaho koshoongalele shomahooli noshimoko mOvenduka Etitatu.
Alweedo okwa ti, omahangano amwe inaa hala nokukuta Ovanamibia.
“Epangelo ola teelela ovanangeshefa vetu aveshe vomahoololi opo va longe pouyelele nopauyuki ngee tava kutu,” Osho a denga omufindo ngaho.
“Eshi sha halika, eemhito adishe doilonga nadi shiivifwe moikundaneki yomoshilongo opo kukwashilipalekwe nokutya Ovanamibia aveshe ovo ve na owino ou tau pulwa ove na eemhito di fike pamwe oshilongo ashishe.”
Etivali, oministili yoikwamina okwa li ya shiivifa kutya otai longo mo nawa omulandu wayo wokukwatela mo Ovanamibia opo i kwashilipaleke kutya Onavanamibia ova mona omauwa okudja meedjo dopaushitwe, mwa kwatelwa omahooli.
Alweendo okwa ti omahangano omahooli opaunyuni naa lande oipumbiwa nomayakulo kovalandifi vomoshilongo ngaashi tashi dulika.
“Otwa teelela omahangano omahooli opaunyuni, aeshe kutya nee oyoo e na omikanda domahooli naao okuyandja omayakulo, opo a dane onghandangala mokuyambula po Ovanamibia,” Osho a weda po ngaho.
Omuwiliki wehangano ledina Sonangol Integrated Logistic Services Pedro Oliveira okwa ti opu na shihapu osho Namibia ta dulu okulihonga kuAngola.
Okwa pula opo kulongifwe shihapu mokuvatela ovanhu.
“Namibia efimbo limwe ota ka pumbwa okulongekida ovanhu opo va ka kwatele komesho ongeshefa,” Oliveira osho a ti ngaho.
Okwa ti vali okulongifa oshimaliwa momatungo nako okwa pumbiwa.
“Angola ota tula oshimaliwa meenhele dokudinda omahooli noshimoko. Epulo limwe olo la pumbwa okupulwa olo ngee opu na omumbwe yaNamibia yokulitula mo mokudinda oinima ei.”
Oliveira okwa weda po vali kutya oshilongo nashi lalakanene okulihongela koilongo ikwao yaAfrika oyo ya kala i li mongeshefa omu efimbo lile.
Omupopiliko wongudu yoUnited Democratic Front Mabasen Narib okwa ti omapopyo aAlweendo okwa ulika kutya ita dulu okutula po omilandu dopaveta opo a kwashilipaleke kutya oshikondo shomahooli noshimoko otashi longo ngaashi oikondo ikwao.
“Oilongo ikwao oi na oupyakadi nokawe, ashike osho kapwa li nande efiku sha li oupyakadi waNamibia. Oshike naana tashi holekwa kombinga yomahooli noshimoko? Tete nakufya pelesidente okwa ti omahooli noshimoko keeshi etu ndee paife minista, oo kwa li a hoololwa kuye, ota kendabala okutilifa oshiwana nomahooli,” Osho a ti ngaho.
Narib okwa ti oshi li oshinakuwanifa shaAlweedo ongomutotiveta opo a kwashilipaleke kutya omilandu dopaveta oda tulwa po opo di indike oshinima eshi shiha ningwe.
“Oilongo ikwao oya ya pombada molwomahooli. Omolwashike itatu litula mo ndee hatu longifa eenghono detu mokulihonga nghee tu na okulongifa eedjo edi tu lundulule onghalo yaNamibia?”
Narib okwa ti oshiwana osha hala okushiiva kutya omahooli oo a monika otaa ka vatela ngahelipi oshikumungu shokuhena oilonga noudjuu woiyemo moNamibia.
“Pamhito ei kapu na nande efimbo lomapopya inaa dindwa noinaa tambulwa ko ngaashi aa,” Osho a weda po ngaho.
Hamushangadjai wongudu yoSouth West Africa National Union (Swanu) Wendy Christian okwa ti otashi udifa nai okuuda ominista tai ti kutya Ovanamibia ovo tava eta edundakano eli.
“Minista ponhele yaasho okwa pumbwa okutalaatala opo a lundulule eemhango odo di li po, opo shi ninge shipu kOvanamibia va kale ve na oipambuliko momahangano oo, unene ngaa ovanailonga vayo,” Osho a weda po ngaho.
Omupopiliko wongudu yoIndependent Patriots for Change Immanuel Nashinge okwa ti ovaleli nava tale ko eedjo doshilongo ongeenghedi doshiwana.
“Elondwelo laAlweendo kombinga yomahooli otali monika li na okaima ngaashi ewiliko loSwapo loinima yetu yomefuta. Oule weedula va kala va ninga efuta letu efula loulingilingi, neekota nda kala ashike tadi yandjwa po kookaume kavo kopolitika. Oshikondo shetu sheeshi, osho kwa li sha pumbwa okukala tashi palula oshiwana, osha ninga po ashike okahokololo nghee oshikondo sha fimana tashi di ashike omauwa ovanhu va fimana,” Osho a ti ngaho.
Nashinge okwa ti Ovanamibia inava pumbwa vali omakunghililo ahapu taa di koSwapo.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
