Ehangano ledina Namibia Investment Promotion and Development Board (NIPDB) ola pula epangelo opo li yandje omikanda dokukala moNamibia fiyo alushe kovanailongo ovandjeko ovo ve na ehalo lokulanda eefaalama.
Omukulunhuwiliki wehangano eli loNIPDB Nangula Uaandja okwa ti oshinima eshi okwe shi pula momukanda oo a shangela komukulunhuwiliki woikwameni, omatembu neameno Etienne Maritz momafiku 16 Juli.
Ehangano ola ti oshinima shedina ‘Desert Visa programme’ – otashi lalakanene okunana oimaliwa yovatalelipo nokutwala pombada eliko laNamibia.
“Ovanhu ava ve na oshimaliwa shihapu ove na ohokwe yokulongifa oshimaliwa meemhito dihapu, mwa kwatelwa nokulanda eefalama, okutula oshimaliwa meengeshefa domoshilongo noinima ikwao oyo hai weda keyambulepo leliko loshilongo,” Uaandja osho a ti ngaho..
Okupewa omikandapitikilo dokukala moshilongo kashi shi oshinima shipe moNamibia. Ovandjeko vamwe, ngaashi omunangeshefa woikwamina wokoRussia Rashid Sardorov, okwa kala ta feekelwa kutya okwa tula eendado dofaalama yaNamibia pombada i li moshitopolwa shaDordabis.
Momukanda, Uaandja okwa pula oshoongalele newilikongudu lomatembu naMaritz opo kukolekwe omikanda dokukala moshilongo dovanhu vamwe ovo ve na oshimaliwa shihapu.
“Shi na sha noshinima eshi, ohandi nyola opo ndi pule omhito ndi yandje ouyelele kewilikongudu lomatembu u na sha nokukoleka omikanda dokukala moshilongo daalushe kovanhu ovo ve na oshimaliwa,” Osho a ti ngaho.
“Ohatu popi unene komaindilo oo e li koshi yoveta yomatembu oyo tai lalakanene okunana ovanangeshefa va yooloka moNamibia notashi dulu okuyambididwa koveta oyo i li po nale,” Uaandja osho a ti ngaho.
Oshinima eshi shokuyandja omikanda dokukala moshilongo osha ninga shihapu moilongo yokuuninginino nosha ninga shihapu unene moununu vaCaribbean unene ngaa ovo va tala unene momatalelepo nomeengeshefa dovanailongo.
Eedula nhano da pita, oilyo yopaliamente yaEuropa oya ti opolohalama yokuyandja oufemba wokukala moshilongo kovanailongo oya kala i yadi eembululu noulingilingi, osho sha pitika vahapu tava feekelelwa oulingilingi ile oimbuluma ya yooloka moilongo yavo va mone oukwashiwana woilongo yaEuropa.
OMILANDU ODO TADI PULWA
Uaandja okwa ti okupitila meyambulepo loinima yoludi eli, oshilongo osha nana ovanashimaliwa ovo va hala okukala moshilongo opo va dule okutuvikila nokulongifa oimaliwa yavo moNamibia.
Uaandja momukanda okwa pula oDesert Visa programme, oyo i li ombinga yondunge yoHarambee Prosperity Plan II, ta popi vali kutya opolohalama opo tai tulwa moilonga natango.
“Eshi osha landula kepulo loNIPDB letulomoilonga loDesert Visa programme ngaashi sha popiwa moHarambee Prosperity Plan II,” Osho a ti ngaho.
“Otu udite ko kutya molwomumbwe yokuninga omalunduluko noveta oyo i li po nale, opolohalama yomikanda dokukala moshilongo opo tai tulwa moilonga natango. Ashike nee, oilonga yokunana ovatuvikili voshimaliwa ovo ve na nale osho tashi pulwa koveta oyo i li po nale oi li nale metifa,” Osho a ti ngaho.
OMANYAMUKULO OMINISTILI
Omukulunhuwiliki woikwameni Etiene Maritz okwa koleka kutya okwa mona omukanda wa dja koNIPDB ponhele yovanhu vamwe ovo ve na oshimaliwa shihapu.
“Oministili oi na eshiifo kombinga yomukanda tau pula oshoongalele noImmigration Selection Board,” Osho a ti ngaho oshivike sha dja ko. Maritz okwa ti okatendo oko taka wilike omatembu, oko ka nghonopaleka ewilikongudu li kufe eenghatu da pumbiwa moinima yoludi eli okwa li ka yandjwa koNIPDB ponhele yovaningi vomaindilo momafiku 23 Juli.
“Osho sha yandjwa koNIPDB oshi li oshipambu shomilandu dopombada shi yandje omhito kovaningo vomaindilo opo va yandje ouyelele wavo komesho yoImmigration Selection Board,” Osho a ti ngaho. Maritz okwa ti omulandu ou pamwe nelitulemo laNamibia lokuyambula po omhango yoveta nokukwashilipaleka kutya omatokolo okwa ningwa pauyuki nopauyelele. “Osha fimana okudidilika kutya okatendo oka18 kekotamhango laNamibia oka yandja oufemba opo omunhu a pwilikinwe omanga omatokolo elelo inaa ningwa, mwa kwatelwa omatokolo e na sha nomikanda dokukala moshilongo daalushe nosho yo omikandapitikilo di li koshi yoImmigration Selection Board,” Osho a ti ngaho.
Maritz okwa ti ekotamhango otali pula elongo pauyelele nouyuki momatokolo omaindilo.
“Oministili oya denga omufindo kutya omaindilo aeshe ohaa tambulwa ko kwe likolelelwa koveta, kwa kwashilipalekwa kutya omilandu adishe oda landulwa peendodo adishe dokuninga omatokolo,” Osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
