Banner Left

Ovanailonga vepangelo otava longelekumwe neengangala – Ndeitunga

Sebastian Ndeitunga

Akukutu komatanga wopolifi yaNamibia mukulu Sebastian Ndeitunga okwa ti ovanambelewa vepangelo vamwe otava longele kumwe neengangala.

Oshinima eshi oshe ya konima ehangano ledina Namib Desert Diamonds (Namdia) la kanifa okawe kongushu yeemiliyona N$350 momunyeka wOlomakaya la dja ko.

“Ondi wete kutya ove shi ninga nouyelele womeni ile elongelokumwe novanhu vamwe ovo ve na ouyelele wa wana mehangano,” osho a lombwela oThe Namibian ngaho Etitatu.

“Ou wete kutya oshiningwanima eshi okwa li sha longekidwa nawa, tashi dulika novanhu vamwe ovo ve li ovanailonga vehangano ovo tashi dulika va yandja ouyelele nghee oinima tai linyenge mehangano,” Ndeitunga osho a ti ngaho.

Okwa ti, ovanailonga vepangelo ova pumbwa omakonakono keshe efimbo opo kuyambulwe po omilandu diwa.

“Eengangala otadi kendabala okulongifa keshe omhito opo di ninge oimbuluma yado. Kutya nee omahangano ile oohandimwe, natu kale ashike tu li okamutwevandu,” Osho a ti ngaho.

Ndeitunga okwa ti omahangano naa longele kumwe nopolifi ngee taa ungaunga noinima ngaashi ouwe.
Omupedu komufala wopolifi inspekta Elias Mutota, eshi a pulwa a tye ko sha okwa ti ke na nande ouyelele kombinga yoshikumungu eshi nonghee nee ke na eshi ta ti ko.

‘SHA LONGEKIDWA NAWA’
Ndeitunga okwa ti omunyeka ou owa pula efimbo okulongekida.

“Okwa li lela wa longekidwa nawa, mutu nefimbo, ndee osho osha eta eengangala di longife nawa omafaneko aa opo di vake okawe konima da mona ouyelele ou,” Osho a ti ngaho.

Ovafeekelwa vatatu ova kwatakanifwa nomunyeka ou: Omukulunhu woinima yomeni noshikondo shomakonakono opaungoba waTrustco Max Endjala, mumwaina Joel Angula (taku tiwa vati omunambelewa wopolifi mukulu) naSam Shilolo. Endjala okwa xulifa Olomakaya.

Omunyeka ou natango owa twaalela omwenyo womukulunhu weameno laNamdia Francis Eiseb (57).

Ndeitunga okwa ti Angula mutu okwa dimbulukwa kutya okukala omupolifi kashi shi eifano laye.

“Nande ngeno omunhu okwa li omunambelewa wopolifi mukulu ndee ta fiye po opolifi, osho a ninga paife itashi dulu okukwatakanifwa nopolifi yaNamibia,” Osho a ti ngaho.

Ndeitunga okwa ti, “Kapu na ekwatafano pokati kaAngula nopolifi yaNamibia,” Osho a ti ngaho.

Natango, omupelesidente wongudu yoPopular Democratic Movement McHenry Venaani okwa pula opo ewilikongudu laNamdia alishe li tulwe pedu manga.

“Omukulunhu weameno na tulwe manga pedu. Omukulunhuwiliki natu tulwe manga pedu ndee taku ningwa omakonakono a yela kwaasho sha ningwa po. Ewilikongudu laNamdia nali tulwe manga pedu,” Venaani osho a ti ngaho Etitatu.

Okwa pula yoo vali opolifi opo i kufe mo ovapolifi ovo tava feekelwa kutya navo ova kwatelwa mo momunyeka omu momakonakono.

OKOMISI YOMAYAKULO OSHIWANA OYA NYAMUKULA
Eshi kwa li ta popi noThe Namibian Etitatu, omunashipundi wokomisi yomayakulo oshiwana Salmaan Jacobs okwa ti hava nailonga vepangelo aveshe hava longo oimbuluma.

“Ovanhu otava longo oilonga yavo, ndee itandi dulu okuvakwatela mo nokutya ovanailonga vepangelo ova kwatelwa moinima yoimbuluma. Ngee opu na vamwe, otashi dulika vashona, shaashi aveshe kave shi ovanhu vawa – alushe otapu dulu okukala omunhu mwii ponhele yonhumba,” Osho a ti ngaho.

Jacobs okwa ti Ndeitunga otashi dulika ta popi ovo ve li mopolifi ile metanga leameno.

“Itatu kwatele mo keshe umwe ndee hatu shi ningi shi kale sha fa oshikondo shepangelo ashishe sha kwatelwa mo,” Osho a ti ngaho.
Jacobs okwa ti, oinima i li ngaho nai lopotwe ngee ya monika.

“… opo ovanhu ovo va ungaungwe navo. Otava tula epangelo moshiponga, onghee nee ove na okuungaungwa navo. Kashi shi oshinima shongaho ile oshinima shipe okumona eepelesenda domayakulo oshiwana da kwatelwa moinima ya nyika oimbuluma,” Osho a ti ngaho.

“Keshe osho hatu tale itatu tale ashike komunhu oye auke, ashike nonghee omunhu kwa li a pewa oilonga. Osho hatu ningile omakonakono keshe efimbo, tu kwashilipaleke kutya ovanailonga ile keshe umwe a kutwa ke na ondjokonona yoimbuluma ile keshi ongangala ile omutamanekwa woimbuluma.

Ohatu tale omukalo oo to nyamukula nao,” Osho a ti ngaho.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News