OVANYASHA veli 32 kwali ha veliyambe metanga lopolifi ya Shakati okudja
2001 ovo inava kutwa metanga ekalekipomhango, ova tokola oku wikila komesho nekangha fiyo eindilo lavo lokukutwa moilonga la wanifwa.
Ovanyasha ove mopaife veli va yunga onhanda pomuvelo weembelewa da Ngoloneya waShana mOshakati, ova tokola kutya voo itava dipo opo fiyo eindilo lavo loku kutwa moilonga la wanifwapo. Pefimbo letalelopo twa ninga ponhele opo va yunga onhanda, ovanyasha ova hokolola onghalo idjuu omo veli hanga veli. Ova hokolola kutya otava nane noudju kombinga yoikulya, onhele yoku nangala ya amenwa noshoyo oundjuwo vokulivatelela.
‘Oukadona ova pewa epitikilo okulongifa oudjuwo veli meembelwa da Ngoloneya ashike ovamati inava pitililwamo. Paife ohava longifa ashike okuya moixwa nge wa hala okuli vatela. Oikula ohatu nyange fyee vene na ka pena omavatelo asha twa mona kombinga yoikulya,’ tava hokolola onghalo yavo.
Ovanyasha ova hokolola kutya ova yandja omukanda wekemo lavo kombelewa ya Ngoloneya wOshitukulwa sha Shana opo yi tuminwe kOuministeli wEameno omo va ulika eudonayi lavo.
Ova ti omulandu wa longifwa owo wokutala ngeenge omwiiyambi okwa longa eemwedi nhatu da Mei fiyo Juni 2008 ka dili pauyuuki kuvo shaashi vahapu ovalonga eedula da pita puheyali.
‘Otashi udifa nayi oku tala kutya vahapu vomufye otwa kala noku liyamba oule weedula di fike puheyali da pita ndele molwaashi twa dopa okulonga muMei fiyo Juuni 2008 osha eta tu dope moku kutililwa meetanga leameno,’ osho kamwe komokandeko keindilo lavo ka lesha ngaho.
Omanga va teelela enyamukulo lenyenyeto lavo oku diilila komunisteli wEameno, ovaliyambi ava ova tokola oku kala noku nangala mongalangala fiyo va kutwa moilonga.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
