Ovakalimo vomOkahandja tava nangala peembelewa damuni

… otava ti itava di po fiyo minista a uda oupyakadi wavo

Ovakalimo vahapu vomomalukanda kOkahandja va handuka ova hololela muni waKahandja ehandu lavo, tava nangala pondje yeembelewa damuni mehololo madilaadilo Omaandaxa.

Ovahololi madilaadilo vamwe ove ya nomakumbafa, eetenda nosho yoo eembiya dokutelekela ongedidiliko kutya ovanangala peembelewa damuni.
Osho tava pula osha kwatela mo omayakulo a pumbiwa ngaashi omeva, nolusheno nosho yo oundjuwo ve li paumufika.

“Opo hatu kala hatu nangala apa fiyo minista weeyambulepo leedoolopa noitopolwa yokomikunda, Erastus Utoni, e tu nyamukula ndee ta pwilikine kwaasho hatu pula, shaashi otwa kala nokutuma omikanda efimbo lile kelelo lodoolopa ashike kapu na nande osho sha ningwa po,” Omukalimo umwe nomunandjungu woshiwana Sethy Gariseb osho a ti ngaho.

Ovanhu ovo tava ningi omunyanyo vamwe ova dja momalukanda oo a hepa aKahandja ngaashi Vergenoeg, RCC Camp, Promise Land, Saam Staan, Oshetu 1, 2 no3, Sweet Village, Dom Lokasi nEkunde 6.

Otava pula onghatu yomeendelelo kelelo lodoolopa, kumuni nosho yo koministili yomayambulepo eedoolopa noitopolwa yokomikunda.

Gariseb okwa lombwela oThe Namibian Omaandaxa kutya ova kala tava holola omadilaadilo oule weedula hamano da pita novadali vavo ova kala nale nokulwa efimbo lile la pita, ashike epangelo kali wete ngee ove lipaka mo ngaa.

“Otwa loloka fyee otwa handuka eshi hatu liumbatelwa nai. Otwa fimana ashike pefimbo lomahoololo, ashike omaupyakadi etu ihaa ka ndulwa po, ohatu pewa ashike omaudaneko ongaho keshe odula,” Gariseb osho a ti ngaho.

Nande ova kala tava ningi omaindilo oikando ya landulafana, otava ti eemumbwe davo inadi kala nokufilwa oshisho kelelo lodoolopa, osho she va fiya ve li monghalo ya naipala.

Momukanda oo va hala okuyandja kominista yomayambulepo eedoolopa noitopolwa yokomikunda, ovakalimo ova pula ouyelele kombinga yoshimaliwa osho vati kwa li sha kufwa kuvo kumuni shokuyambula po omalukanda.

“Ove tu pula opo keshe umwe a fute oshimaliwa shi fike poN$165 keshe meumbo osho tava ka longifa okuyambula po omayakulo ashike kapu na osho sha lunduluka po,” Osho a ti ngaho.

Ovakalimo ova ti muni okwa patulula ombaanga noFirst National Bank momafiku 03 Januali ya nuninwa oshinima eshi nova kala tava yandje oshimaliwa shi fike poN$165 keshe meumbo. Ashike nee, natango kave wete osho sha ningwa po.

“Oshimaliwa osho osha fikama peni? Oshimaliwa osho oshi li peni?” Omukalimo umwe osho a pula ngaho momukanda oo wa nyolelwa minista.

“Otwa hala okushiiva kutya oikumungu yetu, oyo ya kala poshitafuula shoye eedula dihapu, otai ungaungwa nayo naini. Otwa kala twe mu mwenena efimbo lile,” Omukanda osho wa ti ngaho.

Ovakalimo vomoPromise Land ngaashi kwa li va pulwa va ninge kukamusela va lande ominino di ete omeva koshitopolwa shavo, ashike fiyo onena, kapu na omeva.

“Otwa hala eepomba opo ovanhu va dule okumona omeva diva ngaashi tashi shiva,” Osho va ti ngaho.

Ovahololimadilaadilo ove shi yeleka nawa kutya itava di po fiyo va mona enyamukulo tali udifa nawa.

“Ngee inatu mona enyamukulo nena, opo hatu nangala apa. Ohatu nangala apa fiyo twa udika ndee hatu fimanekwa. Otwa kala nokuya kupelesidente ashike otwa shunifwa ko, otwa itavela kutya oto dulu okukandula po omaupyakadi etu, ino hala ashike okushininga.”

Shimwe vali, ovakalimo otava pula opo va pewe oufemba wedu, omayakulo akeshe efiku, eendjila dopamufika domayakulo omeendelelo nosho yo okuxwepopaleka omilandu deameno, mwa kwatelwa okutota po oshitaashi shopolifi shishona moshitopolwa.

Natango ova kuma koshikumungu shonghalo yodoolopa oyo ya yuka kowii, mwa kwatelwa ekako nosho yo oimbuluma ya naipala. “Mayola wodoolopa, ngoloneya nakamusela nava kwatelwe mo moinima yoshiwana,” Omuhololimadilaadilo umwe osho a ti ngaho.

“Kave na eshiivo kutya ovanhu ove li monghalo idjuu komalukanda.”