Ounona wOfikola yetu kawa li komaashinga yoSwapo: Hanghuwo

MOMUKANDA wa ye wenyenyeto, a shangela kOshifo eshi, Omukulunhufikola manga wOfikola younona ya Paulus Hamutenya pEenhana mOshitopolwa sha Hangwena me Olivia Tuyenikelao Takatu yaHanghuwo ota ti kutya eshi sha popilwe kongundu yo RDP momashiiga yayo yeti 12 Apilili 2009 pEenhana kutya ounona wOfikola ya ye owa kufile ombinga momaashinga yoSwapo pEenhana meti 3 Apilili 2009, pefimbo leetundi, oipupulu itokele tootoo nota indile koshiwana nokOmupresidende Hifikepunye Pohama kutya inava tambula ko omapopyo oo oipupulu yo RDP.

•OSWALD SHIVUTE
Omukanda okwe wu shanga ngaha, ta ti; ‘ame Olivia Tuyenikelao Takatu ya Hanghuwo, aame Omukulunhufikola Omukwafeli ‘Acting Principal,’ ondi udite etumba mokuyelifila ounjuni nOmupresidende wetu Omufimanekwa , ou ta lombwelwa oipupulu koilyo yo RDP mOshifokundaneki The Namibian shomomafiku 14 Apilili 2009 kutya vati otwa efa ounona wOfikola yetu wu ye komaashinga yoSwapo pefimbo leetundi.
Onda hala kutya fye pOprimafikola yaPaulus Hamutenya mEenhana otwa fimaneka oilonga yetu, notwa fimaneka eemhango nEeveta dElongo nodEpangelo letu, onghee ohatu diinine oilonga yetu. Fye inatu lekela ounona vetu vaye komaashinga yoSwapo pefimbo leetundi nandenande. Fye momafiku 3 Apilili 2009 otwa longa eetundi detu pauyadi, otundi yotete fiyo oyaxuuninwa. Otundi yotete ohai tameke pohetatu yongula komutwe.
Edimbuko ola yooloka paendodo. mEtitano, shaashi efiku 3 Apilili 2009, ola li Etitano, ondodo yotete nonhivali ohadi dimbuka po 12H30, omanga ondodo onhinhatu fiyo onhiheyali, hadi dimbuka po 13H10. Peevili odo nda dja nokutumbula opo pa dimbukila ovahongwa vetu efiku olo, shaashi ka twali tu na eetundi dimwe da wedwa po ‘Study and Remedial.’
Omunashipundi wEpashukilonongelo letu , oo e li omudali noku li wo oshilyo sho RDP,ota dulu oku shi kalela po, shaashi efiku olo opo a li pomuvelo wOfikola yetu opo pefimbo ledimbuko, a li po ongomudali e na oshinakuwanithwa shoku eta noku ila ounona vaye kofikola, a teelela kwali okaana kaye, nota dulu yo okuninga ondombwedi mwaashi handi popi.
Fye pOprimafikola ya Paulus Hamutenya otwa itavela mOudemokoli nomElongelokumwe. Omuvelo wOfikola yetu okwa li wa patwa ku umwe womovanailonga pOfikola yetu, oo nda pa oshinakuwanifwa shoku u pata, nokwe u patulula ashike eshi ofikola ya dimbuka. Naye yo oku li ondombwedi moshinima eshi. Ovahongi vetu aveshe koonono novahongwa pOfikola yetu ove li yo eendombwedi kutya fye eetundi detu efiku olo oda longwa delixwapo ngaashi hatu shi ningi shito.
Ou wa hala ouyelele u dulife apa, inda u ka monafane na keshe umwe pOprimafikola yetu ya Paulus Hamutenya, shi dulife okutandavelifa osho ito dulu okukalela po. Fye otwa fimaneka Ovawiliki vetu nEpangelo letu.Ngele hano opu na ovanafikola vopOprimafikola ya Paulus Hamutenya va monika komaashinga yoSwapo efiku olo, ova ya ko va dimbuka. RDP fufyulula oshiwana nOmupresidende wetu,’meme Olivia Tuyenikelao Takatu, ta ti ngaho nokuyelifa.