Banner Left

Ounona vovanhu ovo va tembulwa otava shaala po keetundi

Efano: Henry van Roooi ETEMBU … Konhele oko kwa tembulilwa ovakalimo vomOtjomuise mOvenduka ovo va ningwa oihakanwa kefundja, yedina Green Mountain koGoreangab Dam.

Ounona vovakalimo vokOtjomuise ovo kwa li va tembulilwa koGoreangab Dam’s Green Mountain konima yefundja lakula petameko lomwedi ou otava mono oixuna okuya kofikola.

Eshi otashi etwa komumbwe yeefikola di li popepi nosho yo omayakulo oyeendifo e na ombilixa.

Queentelin van Rooyen (37), meme wounona ve li vanhe, okwa ti ounona vaye vavali vomeendodo dopetameko natango ove li meumbo shaashi ofamili itai dulu okufuta osheendifo shi twale ounona kofikola yavo kOtjomuise.

“Otwa hala elelodoolopa ile epangelo li vatele noyeendifo ile li tunge ofikola popepi opo ounona vateu ve lihonge,” Osho a ti ngaho.
Gertrude Human (40), omukali umwe oo naye a tembulwa, naye okuna oupyakadi wa fa wamukwao.

Oku na ounona vatatu, kamwa oka teelela ka ye koshiputundilo shopombada shaNamibia shedina Unversity of Namibia (Unam), omanga aka ke li mondodo 6 ke li ashike naye koGreen Mountai.

“Onda hafa okukala apa, shaashi eumbo lange likulu okwa li li li popepi nomulamba, ashike oshinano shokuya kofikola nomumbwe yolefa omaupyakadi akula,” Osho a ti ngaho.

Christel van der Bly, meme wounona ve li vaheyali, okwa ti ounona vaye ve li vanhe okwa li ve na okukala mofikola, ashike ove li ashike meumbo molwomumbwe yosheendifo.

“Onda hafa eshi ndi na onhele yokudja, ashike onhele oishona unene yoo kai na onduda yokidanaukila ounona. Otashi nyemateke,” Osho a ti ngaho.

Petameko lomudo ou, odula yakula okwa li ya teyaula po omaumbo kOtjimuise, osho sha fininka ovakalimo va konge omalukalwa.

Elelodoolopa laVenduka ola tembula eefamili odo da kumwa koshinima eshi ndee tali d tula meetenda koGreen Mounatin, onhele oyo ya pandika kuvamwe omanga vamwe inave i panda.

Omupopiliko welelelodoolopalaVenduka Lydia Amutenya okwa ti etembu okwa li la pumbiwa kukwashilipalekwe eameno lovakalimo pefimbo lodula.

“Ohat longo pamwe novakufimbi aveshe tu kandule po omikundu edi, mwa kwatelwa okuyandja omeva ayela, oundjuwo nosho yo eemhito dokumona ehongo nomayakulo opaundjolowele.

Eenghendabala edi oda pumbwa efimbo shaashi oda pumbwa oinima ihapu,” Osho a ti ngaho.
Amutenyaokwa pula ovakalimo ovo va tembulwa opo ve lididimike manga elelodoolopa tali tula moilonga omafaneko okuxwepopaleka onghalo yavo.

Omnga ovakalimo vamwe ngaashi Maria Iindongo, va pandula etembu, vahapu otava ti onghalo natango oya naipala ashike.
“Otwa kanifa keshe shimwe ndee paife nounona vetu itava i keetundi.

Otwa pumbwa evatelo lomeendelelo,” Van Rooyen osho a ti ngaho.

Eleleodoolopa laVenduka ola ti otali ka tula po eefikola nomayakulo opaunamiti ponhele opo pa tembulilwa ovanhu.
Amutenya okwa ti eenhele dopolifi noipangelo oda tendwa ko nale noilonga otai ka tameka diva.

“Omafaneko omataungo ehongo eekinda nounona ovo hava i kofikola vakumwa oku li metifa,” Osho a ti ngaho.
Amutenya okwa ti elelodoolopa otali ka xwepopaleka eepate opo shi ninge shipu okuya keenhele oko notali ka tula po yoo vali oupomba vape.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News