Banner Left
Banner Right

Ounona ve li 67 ova fya komanyutu koZambezi

OUNONA TAVA MONO OIXUNA …. Omwaalu aushe kumwe, ounona ve li 545 okwa li va monika nokupangwa oudu womanyutu okudja momudo 2021 fiyo onena.

Ounona ve li lwopo67 ve li koshi yeedula nhano ova fya komanyutu moshitopolwahoololo shaZambezi eedula nhee da pita.

Omanyutu oudu wondjala hau etwa kokukala puhe na oikulya ya wana, okukala ito li oikulya oyo i na oundjolowele ile okukala ito dulu okumona mo oinima oyo ya pumbiwa molutu moikulya oyo to li.

Ounona ve li 545 aveshe kumwe okwa li va monika nokupangwa omanyutu momudo 2021 fiyo onena.

Omivalu natango oda ulika kutya ounona ve li 137 ova kala va tambulwa moipangelo ya yooloka moshitopolwahoololo, omanga ve li 17 va xulifa koudu ou wondjala okudja petameko lodula ei ashike.

Ovanambelewa voundjolowele vomoshitopolwa ova ya dja omwaalu ou kokakomisi koilyo yopaliamente oko haka ungaunga nefikopamwe loukakwashikekookanhu, omayambulepo opanghalafano noikumungu aishe ya pamba onghalafano Omaandaxa.

Okomisi ei otai ningi omakonakono efikulimwe omanyutu moshitopolwa.

Omunambelewa woundjolowele koshipangelo shaKatima Mulilo Juliana Sanandwa okwa ti ohava tambula ounona moshipangelo keshe efiku ve na oupyakadi wondjala, nomwaalu otau i pombada molwoshikukuta.

“Omanyutu moshitopolwahoololo oku li oupyakdi wakula neenghono, shaashi oku li ponomola yotete mokweeta omafyo. Katu na omiti da wana moshipangelo opo tu hakule ounona ava, shaashi aveshe ohave ya va kwatwa komaudu ahapu ndee katu na omiti dokuvahakula. Katu na oikulya yokuvavatela ya wana. Eembete inadi wana nado odi li oupyakadi wakula, shaashi otu na ashike embete hetatu. Molwoshinima eshi, ohatu kondjifa okulekela ovanaudu omanga inava veluka nawa,” Osho a weda po ngaho.

Okwa ti oupyakadi umwe woomeme vashona inava hala okunyamifa ounona vavo ou li oshikumungu shakula mokweeta ounona va kwatwe komanyutu, ta weda po kutya okunyamifa oshinima sha fimana neenghono meemwedi hamano dopetameko lokanghalamwenyo yokaana.

“Ounona ava vahapu ohava fiwa metonatelo looinakulu nooxekulu, ovo vehe na kutya otave va tonatele ngahelipi nohava tameke ashike okuvapa keshe osho va mona kutya nee kashi na oukolele nawa. Okukala puhe na etonatelo okudja koxee younona nako ohaku etele ooina younona oupyakadi wopamadilaadilo, osho hashi va fininike va kale itava file vali ounona vavo oshisho,” Osho a ti ngaho.

Omukulunhuwiliki woundjolowele ta vatele koshitopolwahoololo oko Richard Likokoto okwa ti kutya molwomumbwe yomashini, itava dulu okuyandja omashini kwiina yokaana alushe ngee tava lekelwa mo moshipangelo.

Okwa ti epangelo nali tale kokuyandja oikulya oyo ya tulwa oinima imwe oyo ya pumbiwa molutu, ngaashi omapungu, ongoikulya ya pumbiwa kounona ve li koshi yeedula nhano.

“Onghalo yomanyutu moshitopolwahoololo oya pumbwa onghatu yelongelokumwe omo eeministili adishe di na oshinakuwanifa eshi da pumbwa okuyandja omadeulo nghee ku na okulongekidwa oikulya ei ya pumbiwa taku longifwa oikulya yomoshilongo. Ovakwashiwana ova pumbwa okuvatelwa nghee ve na okuuya po noikunino yokonima yomaumbo shaashi, osha yela, itava dulu okushininga kuvoovene. Oomeme vashona navo nava tuwe omukumo opo va kale tava nyamifa ounona vavo,” Osho a ti ngaho.

Omukalelipo a dja keembelewa dehongo moshitopolwa, Elvis Liwakala, odula ya dja ko, okwa ti ounona veendodo dopedu ve fike lwopo28 000 ova kala nokumona omauwa kopolohalama yoikulya yopeefikola.

Okwa weda po vali ta ti neudo, ove na ondunge yokupalwifa ounona ve li lwopo30 000 okupitila mopolohama ei.

“Meefikola detu dihapu, otwa fininikwa opo tu kwatele mo ounona vokeendodo dopombada mopolohala ei, shaashi otu wete kutya navo otava fi ondjala. Paife ngaha, katu na oufila, ndee molwoshinima eshi, otu wete okufaula taku i pombada, shaashi ounona vahapu ohave ya kofikola nelineekelo lokulya etete olo ongoikulya yefiku,” Osho a ti ngaho.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News