Otwa sindana nale Pohamba a ti

OMUULIKWA momahogololo gopauperesidende gwongundu yoSwapo,Hifikepunje Pohamba okwa ti iizemo yomahogololo gaayendifuta naaNamibia ye li pondje yoshilongo ota yi ulike kutya oSwapo oya sindana nale mehogololo lyoshiwike shika.

Omukumo neinekelo ndika okwe li popi pethimbo ta popitha aayambidhidhi yongundu ye oyendjiyendji poKuisebmund ,shaMbaye olyomakaya.Okwa ti’Aayendi futa naaNamibia ye li kiilongo oya pe oSwapo einekelo mesindano ndyoka ya gandja.Okupitila muyo ondiwete twa sindana nale. Na ishewe okutala ongundu ndjika yithike mpaka, shika otashi ulike kutya otwa sindana momahogololo,’Pohamba ta ti.Mboka ya longekidha oshigongi shoka oya tengeneke kutya aantu mboka ya li mpoka oye li lwo po mayovi 10 000, omanga omayovi ogendji ga thigala pondje yokapale oshoka ina ya vula oku ya meni.Mbaka oya kala pondje yokapale omolwa egameno. Oonakulongekidha oya ti ongundu ndjoka onene oya ulike eyambidhidho lyoSwapo moshitopolwa sha Erongo noshowo moshilongo ashihe, pahapu dhoshilyo shongundumutima yoSwapo omusamane Ben Amathila.Shika ota shi ulike kutya aantu oyi ilongekidha oku ka hogolola.Konima yokweendulula omasindano ga adhika koSwapo nepangelo uule womimvo 20,ngoka ga kwatelamo ombili, egameno, ehumokomeho , elongo, uukalinawa, nekondjitho lyuuthigona, Pohamba okwa ti ayihe mbika oyo etompelo kutya omolwashike omuntu a pumbwa okuhogolola , Pohamba noshowo oSwapo.Okwa endulula ishewe kutya oku za kemanguluko ‘opwa ningwa ehumokomeho li iwetikile nonando mboka ta ya thigathanapo noSwapo ota ya tindi okwiitaala omasindano ngaka. Pehala lyoku ga zimina otaya ti Swapo okwa kanitha ondjila. Shika ka shishi oshili kehe gumwe owu weteko,’ osho a ti. ‘Ota tu ka longa nuudhiginini nonondunge opo tu tsikile nokugwanitha po oompumbwe dhaantu yetu.’Okwa ti oshikako shiilonga ye ongo omuperesidende ota shi hulupo na omolwashika ota indile oshigwana shi mu hogolole ishewe opo eshi yakule oomvula ntano tadhi ya.Oshigongi sha hugunina shongundu ta yi pangele osha li sha ningwa moKatutura moVenduka mosoondaha.