Ota shi vulika kwa kukuta pethimbo lyomvula

AATENGENEKI yombepo ota ya ti otashi vulika Namibia ita ka mona omvula oyindji omumvo gwomvula tu uka.

Pa hokololo lyombelewa yokutengeneka onkalo yombepo Namibia ota ka mona omvula yi li pevi okuyeleka noshito pethimbo lyomuloka nyoka ha li tameke moKotoba eta li hulile muMaalitsa omumvo kehe.Etengeneko lyothinge ya fa ya kukuta ota yi tsakanene nonkalo yombepo yedhina El Nino, onkalo yombepo hayi gumu ombepo yuuyuni, noshowo efuta niikwafuta unene mefuta lyaMwena nenge Pacific Ocean.El Nino osho eputsalo lyomeya gefuta lyamwena lyopokati naandyoka lyokuuzilo wotropic, noshinima shika ohashi ende medhingoloko lyoomvula ne sigo ntano.Ombelewa yuuyuni yi nasha netengeneko lyombepo oya tile muAguste kutya El Nino okwa tameka moshitopolwa sho tropic shefuta lyamwena naashika okwa tegelelwa shi tsikile sigo 2010.Ombelewa ndjika oya dhimbulula kutya uupyu wefuta nenge ombepo yefuta lyamwena kuuzilo womusinda ngoka gwa teta uuyuni miipambu iyali yithike pamwe omeya oga pupyala okuza poonkatu 0,5 sigo opu 1 pashiyelekitho sha Celsius, naashika ota shi ulike elondo mepupyalo okuyeleka nethimbo lya faathana mu Juli.Onkalo ndjika oha yi talikwa ko ongo El Nino a nkundipala, ndele aanongononi ota ya tengeneke kutya onkalo ndjika otashi vulika yi londe oku ya pehulilo lyomvula ndjika nokuya petameko lyomumvo 2010.Aluhe El Nino oha eta ombepo yuukukutu muubugantu wAfrica, omanga muuzilo wAfrica oha u kala wu na omvula oyindji.Pethimbo pwa li EL Nino omvula 2006. Patengeneko lyaatengeneki yombepo onkalo yomvula otayi kala yi li nawa sigo oyi li pevi konyala oshilongo ashihe pokati komwedhi Kotoba na December nuumvo.Metata etiyali lyomvula oku za mu January sigo Maalitsa omuloka ota gu kala woo kaagu shi omwaanawa. Namibia okwa tegelela omvula yi li pevi okuyeleka naandjoka oshilongo hashi mono moomvula oombwanawa. Ombelewa yombepo oya ti pethimbo lya January sigo Maalitsa opena ompito oshilongo shi mone omvula yooperesenda 25 yi li pombanda. Omanga ompito yo ku mona omvula yi li nawa oyo ashike ooperesenda 35.Pethimbo oku za muKotoba sigo Desemba iitopolwa yopokati, kuuzilo, nokuuzilo mbangalantu iitopolwa mbika oyi na ompito oku mona omvula yooperesenda 25 yi li pombanda, ooperesenda 35 omvula yi li nawa nooperesenda 40 dhomvula yi li pevi.Iitopolwa yopokati umbangalantu, uumbangalantu ninginino,uuninginino,nosho wo uumbugantu omvula ota yi kala ooperesenda 25 yi li pombanda, ooperesenda 40 yi li nawa, ooperesenda 35 omvula otashi vulika yi kale yi li pevi noonkondo.Ota ku tiwa iitopolwa oyindji yokuuninginino wAfrika ota yi kala nompito oku taamba omvula ontshona.Omvula ndjoka ya loko omasiku ngaka Okongo mOhangwena oya loko omilimeta 25.Ondangwa oya mono oomilimeta 9,8 Grootfontein okwa mono omvula yuuwindji woomilimetere 7,1 nomahala gamwe oga mono omvula ontshona.