Ospana ya Namibia kuudhano woCommonwealth

ONGUNDU yotango yospan yaadhani naanambelewa oya yi ko India oku ka kuthombinga muudhano wiilyolongo yoCommonwealth mboka tawu tameke osoondaha ta yi ya.

Aadhani mboka ya yi koshilando pangelo sha India New Delhi aatondoki naadhani yobowling nenge okuundula omatanga.Ongundu ndjoka ta yi ka landulako oyaadhani yoongonyo, aaumbi yoondjembo, aagymnastika naa umbi yuutati, mbaka oya tegelelewa ya ka ye ko India metiyali lyoshiwike tu uka.Amushangandjayi gwokomittee ya Namibia yOlympic, Abner Xoagub okwa lombwele Nampa kutya uudhano otawu yi komeho ngaashi wa thanekwa. Okwa ti iilongo ayihe omilongo 71 oya ulike kutya ota yi ka kuthombinga, nonando omalongekidho gawo oga li ga piyaganekwa kiiningwanima iiwinayi omasiku ga piti. Shimwe shomwaambika ooshoka sho ntompa yaa yendi yokoompadhi ndjoka ya teka po pokapale okanene kuudhano mboka.Xoagub okwa ti ontompa ndjoka oya tungululwa na omalongekidho agehe oge li nawa ngashingeyi. Ontala nontompa yaa yendi yokolupadhi oya tekele po omasiku ngaka noya ehamekele aaniilonga yeli 27.Okwa ti ishewe ita pa kala iilongo mbyoka ta yi ikutha mo muudhano pethimbo ndika.Pahapu dha Xoagub oombelewa oonene dhoCommonwealth otadhi yambidhidha uudhano mbuka mewiliko lyongundu longekidhi yomoIndia. Aadhani ya Namibia mboka ta ya tumwa kuudhano mbuka ayehe kumwe oye li 30 naanambelewa 15. Uudhano mbuka otawu dhanwa kiilongo mbyoka ya li nale ya pikwa ku Britania, na otawu ka hula momulongo 14 gomwedhi ta gu ya.