Osikola yIipandayaamiti ya pewa eshina lyoocopi

OSIKOLA yIipandayaamiti moMusati ya ninga yimwe yomOosikola oonelago sho omathimbo ga zi ko ya pewa eshina lyokwiindjipaleka oombapila ko Road Fund Administration.

Omunambelewa Omukuluntupitithi gwOshikethahangano shika tate Penda Kiiyala, oye a gandja omagano gEshina ndika kOmukuluntusikola gwOsikola ndjika tate Lukas Nashilundo.Tate Kiiyala ta ti etokolo lyawo lyokugandja omagano geshina ndika kOsikola ndjika oye li ningi konima sho omugundjuka gumwe gwopomukunda mpoka tate Wendley Iipumbu Shiimi, ngoka e li kuume ke e yile ku ye noku mu lombwela oluhepo lweshina ndyoka pOsikola yawo mpoka.Kiiyala ta lombwele tate Nashilundo noshigwana she mpoka kutya oya gwana okupandula noonkondo omumati omugundjuka gwomomukunda gwawo Shiimi ngoka, oshoka okwe ya longela sha sha simana sho ya kundathana nEhangano lyawo nolye ya pe eshina ndyoka lyongushu yOoN$10,633.00.’Ondi wete kutya omwa nyanyukwa komagano ngaka oshoka ngashiingeyi omwa tetwa omagulu okuya ngashi kOshakati hoka mu ka indjipaleke oombapila dheni, oshoka ngashiingeyi otamu vulu oku shi ninga posikola yeni mpaka nuupu. Omambo gOsikola gaanona nago oge li po taga pumbu nenge ge na ondilo, naalongisikola otaya vulu okulongitha eshina ndika nokwiindjipaleka embo limwe opo li gwanene aanona ayehe, nenge oyendji pOsikola mpaka. Nande itali ka kutha po ngaa oompumbwe adhihe, ondi wete kutya otali ka kwathela moompumbwe odhindji dhoposikola yeni,’ tate Kiiyala ta ti ngawo nokwiindila kOmukuluntusikola noshigwana she mpoka ya takamithe nawa eshina lyawo ndika.Tate Kiiyala ta indile wo kOmahangano gamwe ga yama kEpangelo nosho tuu nago ga tameke okukwathela Oosikola, ano oshigwana shokomongula meilongo lyasho. Tate Nashilundo, mokutaamba ko, eshina lyawo ndika, okwa pandula noonkondo Road Fund Administration, sho ye ya pa omagano ge thike mpaka geshina lyokwiindjipaleka oombapila noku mu uvanekelaa kutya ota ye ke li longitha nawa lela noku li takamitha wo nawa lela.