Osikola ya Shuungu ya pewa eshina lyOkwiindjipaleka oombapila

OMUKULUNTU gwOshipangelo shOpaumwene sha Ngwediva Omundohotola Tshali Ithete yo nOmunangeshefa tate Onesimus Shipombo omasiku ga zi ko oya gandja omagano geshina lyokwiindjipaleka oombapila kOsikola ya Shuungu mUukwambi mOshitopolwa sha Musati.

Omundohotola Ithete yo na tate Shipombo, mboka ya za wo pOshuungu mpoka, oya li aanasikola pOsikola ya Shuungu mpoka. Tashi ti opo ya hita osikola yawo yaanona pOshuungu Combined School. Eshina ndika lyokwiindjipaleka oombapila oye li gandja kOmukuluntusikola gwOsikola ndjika pehulilo lyOmwedhi gwa zi ko. Aalongisikola, aanasikola, iilyo yEtonatelonongelo pOsikola mpoka noshowo aavali yamwe nayo opo ya li poshituthi shegandjo lyomagano ngaka.Omundohotola Ithete na tate Shipombo taya ti kutya oya tokola okugandja omagano geshina ndika lyokwiindjipaleka oombapila kosikola yawo ongepandulo sho ya pewa uunongo wopetameko pOsikola yawo mpoka sigo taya kala sho ye li nena monkalamwenyo yawo. Taya ti oya pandula keputudho ewanawa lyopetameko lela lyonkalamwenyo yawo ndyoka ya pewa posikola mpoka kaalongi yawo pethimbo ndyoka. Taya ti kutya oya hala aanasikola tayi ilongo mpoka yi ilonge monkalo yi li hwepo naalongi taya longo mpoka ya longe wo monkalo yi li hwepo.Omukuluntusikola pOshuungu meme Reginalda Shuuya, okwa pandula noonkondo Omundohotola Ithete na tate Shipombo sho ya dhimbulukwa osikola yawo ndele taya tokola ya kuthe sha meliko lyawo, ya lande eshina lyokwiindjipaleka oombapila noku li pa Osikola yawo ndjika ya Shuungu.Ta ti omagano gatya ngeyi omanene, oga simana noonkondo kOsikola yawo, oshoka oga kandula po ompumbwe onene yeshina lyokwiindjipaleka oombapila pOsikola yawo mpoka.