Osikola ya Kavu ya ninga John Alphons Pandeni Combined School

OSIKOLA ya tseyikwa nawa kwali nedhina Okavu Combined School yi li momukunda Omundjalala popepi na Anamulenge mOmbalantu mOshitopolwa sha Musati ya lukululwa nokupewa edhina lyEpendafule John Alphons Pandeni, ano ya ningi John Alphons Pandeni Combined School, sha ningwa mOlyomakaya ga zi ko, pethimbo lyOshituthi shokulukulula Osikola ndjoka posikola mpoka.

John Pandeni, ngoka a manene oondjenda dhe meti 14 Maalitsa 2008 monkalamwenyo ye okwa kala omulongwa pOsikola ya Anamulenge noshowo koDobra kOvenduka nokOshigambo.Okwa li Omulongisikola pOsikola yaLupaka mOmbalantu mOshitopolwa sha Musati nokuza mpoka okwa yi kombanda a ka kondjele emanguluko lyoshilongo. Manga nee e li omuwkiita gwOswapo ano gwOplana nokukala ta kondjitha Omukolonyeki meni lya Namibia, okwa kwatwa komatanga gOmukolonyeki nokwa ka edhililwa kOndholongo ya Robben Eiland ko South Africa hoka a kala oomvula hetatu, nonande a li a pewa dhi li 18, nokwa ethwa.Ta galukile koshilongo nokwa dhana onkandangala onene ongOmuwiliki mEhangano lyAaniilonga moNamibia. Oshilongo sho sha manguluka momumvo 1990, nakusa John Pandeniokwa hogololwa Kaansela moshitopolwa sha Khomas nokwa ningwa Gavena yOshitopolwa sha Khomas. Kombinga yOngundu yOswapo, nakusa Pandeni okwa kala wo Amushangandjayi gwongundu yoSwapo ethimbo ele. Ta kala wo oshilyo sho Central Committee no Politburo yOswapo. Sho a mana oondjenda dhe ngawo okwa adhika e li Oministeli yOmapangelo gOpaitopolwa, Omagumbo nEhumithokomeho lyiitopolwa yokomikunda.Omuprima gwa Namibia Omusimanekwa Nahas Angula oye a tula miilonga pambelewa elukululo lyosikola ndjika mOlyomakaya ga zi ko pOsikola mpoka, pethimbo lyoshituthi oshinene shelukululo lyOsikola ndjika shoka sha li sha egululwa nEgalikano kOmudiakoni gwOngeleka ya Katolika ka Roma ya Anamulenge Ambrosius Shalumbu nokupopithwa ku Gavena yOshitopolwa sha Musati tate Sackey Kayone, ngoka oshipopiwa she shetaambo lyaayenda sha leshwa pehala lye ku Kaansela gwOshikandjohogololo sha Anamulenge tate Josef Kanyenye Aluvilu noshowo kElenga enene lya Mbalantu tatekulu Oswin Mukulu. Tashi popithwa wo ku tate Kashindi Ausiku ngoka e li Kahewa/Kuume kOsikola ndjika. Taku landula Oshiteyo tashi popi nakusa John Pandeni nosikola ndjoka a lukilwa, sha etwa po kOmuningi gwUuteyo kamana mOmbalantu, tate Fillemon Shikwambi. Okuza mpoka opwa etwa ondjokonona yonkalo yOsikola ya Anamulenge ndjoka ya vala ya Kavu, ngashiingeyi ya lukilwa John Alphons Pandeni. Okwa landula nee oshipopiwa shoka sha etwa po ku kuume, kuhailwa ya nakusa John Pandeni, ano ku tate Peter Iilonga, ngoka e li ngashiingeyi Omupeviminista gwUuministeli wAaniilonga nOnkalonawa yOshigwana.Taku landula ihe nawa oshipopiwa oshinene shesiku kOmuprima Nahas Angula, ngoka a pandula noonkondo Elelo lyOsikola ya Kavu sho ya tokola oku yi lukulula yi ninge John Alphons Pandeni, ngoka e li gumwe gwomOmapendafule ga Namibia. Ta ti nakusa Pandeni gumwe gwomaamati naakadhona yomuNamibia mboka ya kondjela noonkondo emanguluko lyoshilongo shika sigo tali ya, ngashi tali tyapulwa ngeyi koshigwana sha Namibia nosho tuu.’Ondi wete kutya Elelo lyOsikola ndjika ya Kavu, omwa dhilaadhila nawa lela sho mwa ninga etokolo li li ngeyi lya simana lyokulukila Osikola ndjika Ependafule John Alphons Pandeni,’ Omuprima Angula ta ti ngawo nokwiindila kElelo lyosikola, kOmukuluntusikola kAalongisikola mpoka noshowo kaanasikola mpoka ya yeluthe po edhina lyEpandafule ndika miilonga yawo noshowo meilongo lyawo. Omukulukadhi gwa nakusa John Pandeni, meme Julia Pandeni okwa eta po oshipopiwa shokutaamba ko mbushe gwa nakusa omusamane gwe John Pandeni, ano shokutaamba ko edhina epe lyOsikola ya Kavu, ya ningi John Alphons Pandeni, e shi ningi pehala lyOfamili ayihe. Taku landula egandjo lyomagano kOsikola ndjika John Alphons Pandeni noshowo nee esuukululo lyOkapeleki hoka taka ti kutya Osikola ndjika ya Kavu ya lukululwa noya ninga John Alphons Pandeni , sha ningwa kOmuprima Nahas Angula, omanga meme Julia Pandeni naanona oshowo oonakuvala nakusa John Alphons Pandeni, ano tatekulu Johannes Pandeni na meme Pandeni, aakwanezimo, Aawiliki ya li mpoka aakuluntu nosho tuu, ya tala ko nenyanyu.Kaansela Omukulu gwOshikandjohogololo sha Anamulenge me Genorosa (Kangeno) Andowa oye a ningi omapandulo. Ta pandula Omuprima sho eya okutula miilonga pambelewa elukululo lyOsikola ya Kavu, ya ningi John Alphons Pandeni noshowo aayenda ya simana ayehe ye yile koshituthi shika noshowo kOfamili ya Pandeni sho ya taambako edhina ndika kOsikola ndjika noshowo aapopin ayehe naayeheyehe ye yile kOshituthi shElukululo lyOsikola ya Kavu ndjoka ngashiingeyi ya pewa edhina epe John Alphons Pandeni.