Osikola ya John Alphons Pandeni oyi na oompumbwe odhindji

PETHIMBO ta popitha aanashituthi shelukululo lyOsikola ya Kavu ndjoka yaningi John Alphons Pandeni meti 2 Mei 2009 pOmundjalala mOmbalantu moshitopolwa sha Musati, Kahewa kOsikola ndjoka, tate Kashindi Ausiku, okwa indila kaagandji yooshali noshowo koohandimwe ya yambidhidhe Osikola ndjoka John Alphons Pandeni moolwashoka oya pumbwa natango oshindji meyambulopo lyElongo lyoshigwana shokomngula pOsikola mpoka.

•OSWALD SHIVUTE POMUNDJALALA

Tate Ausiku ta ti kutya Osikola ndjoka ya totelwe po momumvo 1973, hayi longo okuza pondondo 6 sigo 10 na oyo Cluster 7, noyi na ngashiingeyi aalongwa ye li 543 oya pumbwa omambo gokwiilongitha, Olabora yOokoompiuta opo aalongwa yi ilonge nawa pakompiuta noshowo aalongisikola ya kale taya longo nokwiikwathela nookoompiuta noyi na wo ekwatathano lyopaInternet.
Osikola ndjoka, tate Ausiku ta ti, oya pumbwa oshinyanga shOsikola moka aanasikola taya vulu okuya nokuningila iigongi yawo kumwe naalongi yawo. Moka wo aakwashigwana noshowo aavali taya vulu okuya ya ningile mo iigongi yawo yaavali na omo wo tamu vulu okushangelwa omakonaakono.
Tamu vulu wo okuningilwa iituthi yontumba mbyoka tayi vulu okweeta sha mOshiketha shOsikola.
Osikola oya pumbwa wo iipundi nIitaafula. Oya pumbwa wo olugimbo lwa kola lwokukelela oombudhi okuya meni lyosikola nokuyaka po iinima yosikola.
Nonande pu na okapale komaudhano, unene tuu ketanga lyokoompadhi, okapumbwa ka opalekwe nawa, ka kale ngaa ke li pomuthika gwuupale womaudhano mboka wu li hwepo.
tate Husiku ota ti kutya nonando pu na oompumbwe dhi ythike mpoka pOsikola ndjoka, osikola monkalamwenyo yayo sigo opo mpaka oya kala tayi shi enditha nawa noya vala aaniilonga ye li miilonga yoonkatu dhopombanda moshilongo.
Momumvo 2004, oya li ya mono ooperesenda 8 moshilongwa shUunongononi. Tayi mono po wo Ekopi mElongo lyIikalekelwa, lyaailongo yOpausipesiale. mOmumvo gwa zi ko 2008, Osikola ndjika ya John Alphons Pandeni ngashi ya li nale Okavu CS, oya li ya sindana po ondjambi ontiyali miilonga yoopala yOndjugo yOmambo, ondjambi ndjika ye
yi pewa kOndjugo yOmambo yOpashigwana nOkaansela yOmauyelele.
Oyi na po wo oWebsite yayo ndjika, www.freewebs.comjohnalphonspandeni-cs ndjoka yi
li kumwe no Internet notayi kwatakanitha osikola ndjika nuuyuni. Uuyuni ngashiingeyi wu shi kutya oshike tashi inyenge mOsikola moka na oshike tashi pumbiwa mo wo.
Tate Ausiku ta ti Omulongwa gumwe gwokOuniversiti ya California mo Amerika okwa li i itsu OWebsite yosikola ndjika nokwa tameke nokuli okuninga nale omakwatathano nayo pakwatathano ndika lyopaunongononi.