Osikola Oshikomba mOnankandi ya pata thiluthilu sigo oompaka

OSIKOLA yedhina Oshikomba Junior Primary, tayi adhika momukunda Onankandi muumbugantu wIihongo yaMvula mOndonga moshitopolwa sha Shikoto, oya pata petameko lyomvula ndjika omoluunona kau po na kapu na nande etegameno lyasha yi ka patuluke ishewe yi kale ngashi ya tulilwa po, shapo otayi ka ningwa oseko yomuhandjo nenge osikola yUungomba yi na omuhandjo.

Mokupopya nOmuwiliki gwElongo moshitopolwa sha Shikoto, Lameck Kafidi oshiwike shika, okwa ti kutya osikola ndjoka ya tungilwe po momumvo 1992 yina oongundu okuza pongundu yotango sigo ontine, noya tamekele naanona 80, oye yi pata molwashoka aanona ya kala taya ningi po aashona. Ta ti ngashi pehulilo lyomvula ya zi ko, oya patele naanona omulongo moongundu adhihe ndhoka ne posikola mpoka. Kafidi ta ti, mboka ya ningile etokolo lyokutunga osikola ndjika mpoka, pethimbo ndyoka, kaya li ya ninga omakonaakono ge li nawa, oshoka omikunda nomagumbo moshitopolwa shoka, ogi ihana noonkondo naavali oyendji ohaya tumu aanona yawo koosikola ngashi kIihongo yaMvula nokOshiyagaya. Kafidi ta ti, sho ya adhika kuupyakadhi mbuka petameko lyomvula ndjika oya ningile oshigongi naavali noshowo na mwene gwomukunda ngoka Onankandi noya uvathana osikola ndjoka yi pate ashike manga., manga taku dhilaadhilwa shilwe shi ili. Kafidi ta ti taku tokolwa kutya, opo ngaa yi kale po yi na omwenyo, ano pu kale ngaa pu na omwenyo, napu tulwe okinde nokwa hogololwa nee, Aily Shipanga, ngoka e li oshilyo shelelo lyosikola ndjoka, a kale omulongi gwokinde ndjoka. Shoka osho nee sha ningwa po, Kafidi ta ti, nopethimbo ndika, opu na nee okinde ya, Aily Shipanga, yaanona ye li yahamano (6) ashike manga. Kafidi ota ti kutya ngele osha yi ngawo pwa kala kaapu na aanona yongundu yotango sigo ontine, nena otashi vulika osikola ndjoka ye ke yi lundululile moseko yina omuhandjo nenge osikola yopaungomba yi na omuhandjo. Kafidi ta ti, ndika edhilaadhilo, ye li na manga, ashike nee ngele oshe ke ya shi ningwe ngawo nena, otashi ka pula wo ethimbo manga noshindji okulongekidhwa po, molwashoka pethimbo ndika oyi ipyakidhila manga nokutunga oosikola ndhoka dha adhika dhi li momathaneko gawo, ngashi oseko yokOmuntele nosho tuu.Nande ongawo aavali yamwer ya popiwa nayo koshifo shika oshiwike shika pOnankandi mpoka, ngashi,Hanna Shipanga na Paulus Shipanga, otaya ti kutya ngeno natango oshikondo shElongo kumwe nelelo lyomukunda gwawo naavali naya ninge iigongi yokwiiyuvitha ko moshinima shika ndele aanona taya galukile posikola yawo mpoka ngashi sha kala nale. Taya ti otashi vulika etsomukumo lyaavali naanona olyo lya kala inali kola nawa nolya pumbwa nee okukolekwa. Aanasikola ya sikolele nale posikola mpoka, ngashi Paulus Shipanga, Matheus Nahongo, Jacob Nakale. Herman Ngendjo na Nekwaya Henock, nayo otaya ti kutya kashi shi nande oshiwanawa osikola yawo ndjoka ya kala ombwanawa lela oomvula dha zi ko, yi pate ngawo. Taya ti napu ningwe sha meendelelo yi patululwe noyi tameke ishewe okulonga ngashi shito. ‘ Inatu hala okutala osikola yetu yi li kohi yomwiidhi, itayi longo nenge itayi longithwa. Osha fa omuntu wa tala omuntu ke ko we,’ aamati mbaka taya ti ngawo nokugwedha po taya indile kOshikondo shElongo nokepangelo kutya ngele opu newe edhilaadhilo lyoku yi ninga oseko yomuhandjo.