Oshituthitumo oshiti 142 mOmandongo

OSHITUTHI shEtumo mu ELCIN oshiti 142 sha dhanenwa pOmandongo mOndonga moshitopowla sha Shikoto mehuliloshiwike sheti 6 sigo 8 Juli 2012 mewiliko lyOmumbiishofi Omukuluntu gwa ELCIN omundohotola, Shekutamba VV Nambala, ngoka wo e li Omumbiishofi gwOshikandjongeleki shuuzilo ta yambidhidhwa kOmumbiishofi gwOshikandjongeleki shUuninginino, Josaphat Kashindi Shanghala.

Aawiliki yOshituthi oya li omusita, Nambili Namutewa, Festus Kagolo, omusita Aina Amupala. Sho aanashituthi ya thiki pOmandongo, mEtitano ndyoka lyeti 6 Juli 2012, oshituthi shEtumo shika osha tamekithwa nelongelokalunga ndyoka lya li lya kwatelwa komeho komusita Eino Ekandjo, omusita Nikanor Shuukwanyama nokomusita, Hosea Iyambo. Okuza mpoka okwa landula etaambo lyaayenda komutonateli Selma Kagolo noshowo ekundo lya kaansela gwoshikandjohogololo sha Nayena , Max Nekongo. Konima yuulalelo esiku tuu ndika, okwa landula oongundulwiimbo ndhoka dha landulwa kondjokonona ya Mandongo kelenga enene lyoshikandjo shAmuteya, Vilho Kamanya. Okuza mpoka opwa gandjwa ompito ku, Ananias Uusiku a fatulule oshiketha, ano ehanganoshiketha nenge oproyeka ndjoka ya hala okuyambula po ehala ndyoka lya Mandongo.Molyomakaya okwa tamekiwa notundimbiimbeli komumbishofi, Tomas Shivute, ngoka a kulilwa mo kongundulwiimbo Teimbi ite zimbuka. Taku landula nee ngoloneya gwOshikoto, Penda Ndakolo nokonima okwa landula eegululo pambelewa lyoshituthi shika kOmumbiishofi Omuwiliki gwa ELCIN omundohotola, Nambala. Taku landula nee oshipopiwa shOmukwaniilwa gwOndonga,Immanuel Kauluma Elifas. Taku landula oshipopiwa tashi popi Onziililo yEtumo mu ELCIN nonakuyiwa, komusita, Absalom Hasheela noshowo ekundo komumbishofi, Josaphat Shanghala ngoka a landulwa ku amushangandjayi gwOngeleki ya ELCIN, omusita Alpo Enkono ngoka a eta po osheetwapo shOmbelewangeleki. Okwa landula ihe ongalo yethigathanopo paikandjongeleki nokonima yomwiha, esiku ndyoka, okwa landula omakundo ga zilile ku FELM, ELCRN-DELK, ELCRN, IELA, Anglican, UCC-NELC, CCN nongeleki ya Katoolika ka Roma. Taku landula oshipopiwa shOmuleli gwOshilongo, Hifikepunye Pohamba. Okwa ka landula nee okatewo ku, Vilho Shilongo, noshinyandwa tashi popi nkene aatumwa ya thika mOmandongo nokutaambwa, komukwaniilwa, Shikongo shaKalulu mombala ye nomOmandongo gogene, sha dhanwa kaanashitayingeleki sha Mandongo. Taku landula ongalo onene yopaikandjongeleki ndjoka ya kwatelwa komeho koongundulwiimbo dhi ili nodhi ili.Mosoondaha yeti 8 Juli 2012, oshituthi shetumo shika osha hulithwa nelongelokalunga lyUulalelo Uuyapuki kOmumbiishofi Josaphat Shanghala, ngoka wo a li omuuvithi omunene mElongelokalunga ndika, ta yambidhidhwa komusita Selma Kagola nomusita, Maria Shiweva, omanga aasita, Kleopas Amaambo, Erenestus Karuyeva, Teofilus Nelumbu. Josef Avia na Matheus Ampweya, ya yakula pethimbo lyUulalelo Uuyapuki. Omumbiishofi Nambala oye a pata ko noku kumika aasita nooitaali ayehe yOngelerki ya ELCIN ya dhiginine moshilonga shetumo noya tsikile nokutaandelitha omulombo gwenyanyu nogwombili moshigwana sha Kalunga. Ngashi osho hashi kala miituthi iinene yoludhi nduka, hamu kala aanyoleli, aanethimbo, aaniniwe, aahwahwameki, aatoloki noshowo aandjangeki nomoshituthi shika Omandongo opo ya li. Omusita Johannes Nkoto nomusita Ruusa Nembungu oyo ya li aanyoleli omanga, Adam Nangolo nomusita Temia Nangolo ya li aadhiginini yethimbo. Aasita, Adolf Hashikutuva,na Esron Kapolo, Emilie Kathima, Martha Uukelo, Aili Shikongo, Salmi Shikongo, Emilie Kotokeni na Agrippa Shilongo ya li ye lile po iiniwe. Aahwahwameki oya li omusita Elia Ndishishi, omusita Fillipus Haulofu, omusita Hulda Shau nomusita Tylves Taanyanda. Aatoloki oya li omusita, Eliakim Shaanika, omusita Halolye Nashihanga, omusita Willen Hainane, omusita, Jesaya Iipito nomusita Tomas Uushona.. Aandjangeki oya li, Lavinia Nakashole, Ndapanda Nakale, Liina Shigwedha nokombinga yomaimbilo okwa li ongundulwiimbo, Jaako Kangayi.