Oshituthi shOmagongo sha dhanwa pOmhedi

ENGATHITHI enene lyaakalimo, lya thikama mOmupresidende Hifikepunye Pohamba nOmukulukadhi gwe, Penexupifo Pohamba, Omukokolipresidende Sam Shafiishuna Nujoma, Omukwaniilwa gwOndonga Immanuel Kauluma Elifas, ngoka e li Omunashipundi gwOngonga yOmalelo gOpamuthigululwakalo, nOmunyekadhi gwe me Cesilia Elifas.

Oshigwana woo oshindji osha li sha gongala pOuhamba wAukwanyama pOmhedi mOlyomakaya ga zi ko nokudhana oshituthi shomagongo pamwe nOhamba meekulu Martha Mwadinomho Kristian Nelumbu.Nonande iipopiwa ya ka tameka okuuka pomulongonambili gwoomutenya lwaampoka, oshigwana osha tamekele okuya pOuhamba mpoka ethimbo lyongula lela, mpoka Opolisi ya tamekele nokuhadha aayehe ye ya koshituthi shika. Pwa li nokuli tapu longithwa oombwa dhOpolisi okuhadha nokufwinyaafwinya muundjato waanashituthi. Egameno olya noli lela lya kwata miiti, noyendji oya li tayi ipula kutya omolwashike lya li lya kwata miiti ngawo. Aatoolinkundana nayo inaya longa we nuupu ngashi shito, omanga yamwe ya tidhilwe po wo nopiilonga yawo mpoka sho ya kala taya pulaapula kutya omolwashike taya kelelwa ya thanekele mpoka pwa opala okuthanekelwa.Oshitopolwa shOpambelewa shIipopiwa nomaudhano osho sha tameke tango mewiliko lya Kaansela Urias Ndilula nAakwatheli ye, moka oshiithanene sha egululwa nEgalikano kOmusita gwa Halushu tate Nambili Namutewa, ye Gavena yOshitopolwa sha Hangwena Usko Nghaamwa ta taamba ko aanashituthi ayehe. Taku landula nee shOhamba meekulu Martha Mwadinomho Nelumbu shoka sha leshwa pehala lye ku meme Priskila Kambonde.Taku landula Oshipopiwa shOmunashipundi gwOngonga yOmalelo gOpamuthigululwakalo moNamibia Omukwaniilwa Kauluma Elifas, shoka sha leshwa pehala lye kElenga enene lye tate Vilho Kamanya moka omukwaniilwa Elifas a ti kutya Omalelo gOpamuthigululwakalo moNooli, oge na po edhilaadhilo lyokutunga po mbelewa yawo onene mOshakati notaya ka pula eyambidhidho kEpangelo nokaagandji yooshali moshinima shika. Pokati kiipopiwa opwa kala omaudhano gOpamithigululwakalo. Okuza mpoka, okwa tamekiwa nee netyapulo lyolyene lyoshituthi, moka Presidende Pohamba nosheendo she mwa kwatela Omukokolipresidende Nujoma nosheendo she, oyo ya yi mUuhamba tango ya ka tyapule nawa oshituthi.Epya alihe lyUuhamba, olya li hanga lya pwa ko iingombwele, unene yOmalenga omanene nomashona gUukwanyama naantu yawo, omanga megumbo wo mwa li iingombwele oyindji. Kehe mpoka wa li to ende mUuhamba moka, okoshingombwele nokomuntu. Iituthi mbika yOmagongo nonande ya kala hayi dhanwa shito ndele tayi mwena po kashona oomvula dha li dhiita yekondjelomanguluko, oya pendulilwe po ishewe kOmukokolipresidende momumvo 2001, moka oshituthi shotango shomagongo sha dhanenwe mOngandjera pOmbala ya Ngandjera yOmukwaniilwa tatekulu Jafet Munkundi. Momumvo 2002, tashi dhanenwa mOndonga puuwa wOndonga, wOmukwaniilwa tatekulu, Immanuel Kauluma Elifas. Momumvo 2003, osha dhanenwa mUukwambi pegumbo lyElenga enene lyUukwambi tatekulu Herman Ndilimani Iipumbu pOnamega. Momumvo 2004 osha dhanenwa mUukwaluudhi pOmbala yUukwaluudhi yOmukwaniilwa tatekulu Josia Shikongo Taapopi.Momumvo 2005 petameko, osha dhanenwa mOmbalantu pegumbo lyElenga enene tatekulu Oswin Mukulu. Momumvo 2006 osha li shi na okudhanenwa kwali mOukwanyama pOuhamba wa tatekulu Kornelius Mwetupunga Shelungu, ashike inashi vula okuningwa molwashoka Ohamba Shelungu ya, ka ehama nokuhulitha. Momumvo 2007 osha ningilwa mUukolonkadhi pegumbo lyElenga enene lyUukolonkadhi tatekulu Daniel Shooya. Momumvo 2008, osha li shi na, okuningilwa mOukwanyama, ashike inashi ka vulika omolu efundja.Momumvo 2009, osha li shi na okuningilwa mOkalongo pegumbo lyElelnga enene lya Kalongo tatekulu Mathias Walaula, ashike ina shi vula okuningwa omolu omaimbo. Nuumvo nee osha ningilwa mOukwanyama pOuhamba wOhamba meekulu Mwadinomho Nelumbu nosha yela kutya omvula tayi ya otashi ka ningilwa mOkalongo pegumbo lyElenga enene tatekulu Walaula.