Oshituthi oshinene shomaganeno gOoseesita sha ningwa pOshikuku

OSHITUTHI oshinene shomaganeno gOoseesita ya Katoolika ka Roma, mwa kwatelwa nedhano lyIituthi yOshisiliveri nOshingoldi, osha n ingwa pOshikuku mEtiyali lyoshiwike shika nosha li sha kwatelwa komeho kOmumbiishofi Omukuluntu gwOngeleka ya Katoolika ka Roma moNamibia Omussimankewa Liborius Ndumbukuti Nashenda, ta yambidhidhwa kuyamwe yomOopata mOshikuluntushikandjongeleka shOpaumbiishofi sha Venduka.

Ooseesita ye li yane, Wilma Shikongo, Sylvia Shikongo, Agnella Nangolo na Rosalia Hishiningwa, oya ningi omaganeno gawo gotango esiku ndyoka.
Ooseesita yaali, Anna Shilongo na Christina Alweendo taya ningi omaganeno gawo gahugunina nokuninga Ooseesita yuudhilila.
Esiku olyo tuu ndyoka, Ooseesita ye vulithe puyatano oya gwedha ko komaganeno gawo goomvula ndatu. mOshitiuthi osho tuu shoka, Seesita Kuku Angela Abraham okwa dhana Oshituthi she oshinene nosha simana shOshingoldi sho a kala mUuseesita oomvula omilongontano omanga Ooseesita ye li yane, Friedberga, Leopoldine Maria Shivolo, Cecilia Shikesho na Seesita Teophilie Shikongo, ya dhana oshituthi shawo shOshisiliveri, ano shoomvula omilongombali nantano (25) mUuseesita. Ooseesita ayehe mboka oyEhangano lyOoseesita AaBenedictine ya Shikuku noya gana nokuuvaneka eigandjo lyawo muushekesheke komeho gOmukuluntukuluntu gwOoseesita ya Benedictine ya Shikuku Seesita Magdalena Shetunyenga nOmumbiishofi Omukuluntu Nashenda.
Pethimbo lyeuvitho lye, manga ine ya ganitha na manga ina yambeka mboka ya gwanitha oomvula 25 nomilongontano mUuseesita, Omumbiishofi Omukuluntu Nashenda okwa ti kutya Ooseesita mbaka oya kala taya nongekwa nawa opo yi igandjele Kalunga kawo. Esiku ndyoka lyeti 6 Januari mOngeleka ya Katoolika oli li Esiku lyAanongo yokUuzilo, mboka ye yile ku Jerusalem na Betlehem moshilongo shAayuuda pethimbo Jesus a valwa, ye mu inyongamene noku mu pa omaganopandulo ga simana gIingoldi niizimba oshowo omagadhi ga nika nawa. Omumbiishofi Omukuluntu Nashenda ta ti, ngashi naanaa Aanongo yokuuzilo ye shi ningile, nOoseesita mbaka oya etela nokugandja omagano kokanona Jesus. Ta ti omagano ngoka ya etela Jesus ogo ngoka goku mu igandjela thiluthilu pwaa na we gumwe i ili. Omumbiishofi Omukuluntu Nashenda ta ti kutya eithano ndyoka lya kuthwa kOoseesita noshowo kOopata lyokwiigandjela Kalunga, kali shi epu, oshoka oto etha po ashihe. To etha po eliko, oluvalo, aavali yoye nosho tuu ndele to kiimangeleka ashike mu Kalunga koye noku mu kalela muushekesheke. Omumbiishofi Omukuluntu Nashenda ta pandula wo aavali naakuluntu yOoseesita mbaka kutya nayo oya longa oshilonga sha simana shokugandja aanona yawo omagano ku Kalunga. Ta ti kutya, ya ti, ‘Kalunga ketu, Ongoye we tu pele aanona mbaka, onkee natse otatu ye ku pe omagano, ye ku kalele muushekesheke,’. Omumbiishofi Omukuluntu ta ti kutya otashi vulika gumwe oye ayeke a li po paavali nenge paakuluntu ye, ashike oya tokola ye mu ethe a ka ninge Seesita, e kiigandjele Kalunga ke muushekesheke. Ta lombwele Ooseesita mbaka kutya naya landule oshiholelwa oshiwanawa shAasita yokuuzilo, mboka ye yile kokanona Jesus taye kiinyongamene nokushuna komagumbo gawo, hoka ya ka kala nokuhambelela okanona Jesus, Kalunga kawo nombili nonesimaneko enene. ‘Nane nee shi mwa ninga Ooseesita ngeyi, indeni, ndele tamu kala nokuhambelea nokusimaneka Kalunga keni. Tamu yakula oshigwana she/sheni nombili nonesimaneko enene,’Omumbiishofi Omukuluntu Nashenda ta lombwele Ooseesita ngawo. ‘Onda hala wo okupandula Seesita Angela ngoka ta gwanitha oomvula omilongontano mUuseesita nena noshowo Ooseesita mboka yane taya gwanitha oomvula omilongombali nantano mUuseesita nena, sho ya kondja noye li taya kondjo noonkondo neuvaneko lyawo lyokukalela Kalunga kawo paushekesheke ngeyi.’Ngashi Seesita Angela ekuwa lya ka nale na itali tsimpi we. Inali pumbiwa we okuupikwa olya tsa lyatsiilila notali ke omiti dhomalute lya manguluka. Onkee Kalunga ne mu yambeke. Kombinga yaamboka taya gwanitha nena oomvula omilongombalinantano. Nayo oya kondja notaya kondjo nondjila yawo yUuseesita, yeigandjeloKalunga muushekesheke. Kalunga ne mu yambeke,’Omumbiishofi Omukuluntu Nashenda ta ti ngawo nokutsa Ooseesita ayehe omukumo kutya meithano lyUuseesita omu na omashongo omanene, ashike otaya vulu oku ga taaguluka uuna ye li pamwe na Kalunga kawo moka ya uvaneka taya kala ya dhama. ‘Ooseesita nee, kaleni nokutopolelatha ohole ha Kristus noshigwana,’ Omumbiishofi Omukuluntu Nashenda ta ti ngawo nokutsikila ko ta indile koshigwana shaa kanyatele kwaambyoka tayi hulu po yuuyuni mbuka, ihe shi kale sha kanyatela kwaambyoka itayi hulu po, yomwenyo gwaaluhe. Ta ti okuuvite uuntsa sho e li nena moshituthi shOoseesita tayi igandjele Kalunga kawo, ya fa omukiintu ti igandjele omulumentu gwe mondjokana.