Oshipotha shAangola sha tsilikwa

AANGOLA yaali mboka ya li ya kwatelwa popepi na Keetmanshoop pehulilo lyomumvo 2007, ye na oopela dhOkokeina odhindji dha li dha holekwa mohauto, oya li ya mOmpangu yOpombanda oshikando shotango mEtine lyoshiwike sha zi ko.

Daniel Joa Paulo (42) na Josue Manuel Antonio (43), otaya pangulilwa oshipotha shokukala niingangamithi ya nika oshiponga. Omupangulipresidende Petrus Damaseb okwa li u undulile oshipotha shawo komasiku 18 ga June. Paulo na Antonio otaku popiwa kutya oya li ya adhika noopela dhOkokeina yookilogalama 39,35 yi na ongushu yoshimaliwa shOondola oomiliyuna omilongo mbali.Oya li ya kwatwa po sho oopela dhOkokeina dhookilogalama 30,1 nodhi na ongushu yoshimaliwa shOondola oomiliyuna omulongo nantano, dha li adha adhike dha holekwa mohauto yawo, sho ya li ya sitopwa kOpolisi pomboloka momasiku 20 ga Desemba 2007. Ohauto yawo oya li ya ka paakingwa mongalashe yopOashitaasi shOpolis po Keetmanshoo uule woomwedhi omugoyi, sigo mwa ka monika Okokeina yookilogalama 9,25, yi na ongushu yOondola oomiliyuna ne ya holekwa momatayiyela gohauto momasiku 30 ga Septemba omumvo gwa zi ko. Paulo na Antonio oya li natango konima yekumba.