Oshipotha sha Nkasi sha undulilwa petameko lya Maalitsa

OMULUMENTU gwoomvula 38 gwomomukunda Ncumnca muuningininuuzilo wa Nkurinkuru mOshitopolwa sha Kavango, Herbert Cimu Nkasi ngoka ta pangulwa mOmpangu yOpombanda mOshakati niipotha iyali yedhipago lyuunona we wuukadhona uyali, shonkambadhala yedhipago lyomukukuladhi gwe, shokufumvika kamwe komuunona we meholeko, noshowo okwaadhika nondjembo niikuti yaa na oombapila, oshipotha she, mEtitano lya zi ko, oshuundulilwa komeho sigo oketi 8 Maalitsa 2010.

Omukalelipo gwe wOpampango , Hahende, Frieda Kishi, oye a indile Ompangu yOpombanda, nomupanguli, Christie Liebenberg kutya oshipotha nenge iipotha ya Nkasi mbika nayi undulilwe komeho, oshoka okwa hala uumbangi wiihwapo okuzilila kOondohotola nenge kOmundohotola ngoka a tanda omidhimba dhuunona mbuka uyali noshowo uumbangi woonakutseya nawa oondjembo niikuti.Kuyele oshiwike sha zi ko sho a pulwa kOmupanguli, Christie Liebenberg kutya oku na ondjo miipotha mbyoka ihamano tayi mu patanekelwa, omusamane Nkasi, okwa ti kutya miipotha iyali yedhipago lyuunona noshowo shoka kutya okwa fumvika omuntu, ina lombwela epangelo naashoka shokutya okwa li a hala okudhipaga omukulukadhi gwe nondjembo, ke na ondjo. Ta ti oku na ashike ondjo mokwaadhika nondjembo niikuti ke na ombapila yayo.Nkasi ta ti shoka tashi popiwa kutya okanona ke koomvula hamano Nasira Nkasi okwe ka dhenga niiti mu Apilili 2007 nelalakano lyoku ka dhipaga, hasho. Ta ti ye okwa li a shike te ka dhenge nelalakano lyoku ka putudha, ihe kashi shi nelalakano lyoku ka dhipaga. Onkee ke na ondjo meso lya ko.Kokutya okwa dhipaga okanona ke okatiyali komvula yimwe Sigcende Nkasi meti 9 Mei 2007 sho e ka yaha nondjembo yomushasho, ota ti okwe ka yaha shili nokasa shili, ashike nee ine ka yahela owina. Ta ti okwa li ta umbu oombwa ndhoka dha li tadhi mu tsitsimikilwa dhi mu lye okuzilila kiihwa ya li yi li komeho ge. Ta ti okwa kutha nee ondjembo noku dhi umba. Ashike nee nani pethimbo lyokuumba ngawo, opo pethimbo lya meme Kasiku nokanona Sigcende momaako, taya zilile miihwa lwopoombwa mpoka, noya shakene ngeyi niikuti tayi zi kondjembo ndjoka ta umbu nayo oombwa. Tati ine ya umbila owina nande. Onkee ke na ondjo meso lyokanona ke hoka, na ke na wo ondjo nomoshipotha shonkambadhala yedhipago tashi mu patanekelwa kutya okwa li a hala okudhipaga omukulukadhi gwe Kasiku. Shoka wo shokutya okwa fumvika omuntu meholamo, a hala okuholeka eso lye, okwa ti ke na ondjo oshoka okwa lopota eso lyokanona ke hoka noshowo efumviko lyako ku mwene gwomukunda gwawo.Ashike moshipotha shokwaadhika nondjembo yomushasho niikuti yayo kee na ombaapila, oku na mo shili ondjo, oshoka ke na ombapila yokukala nondjembo ndjoka yomushasho niikuti yawo.Iihokolola otayi tsikile mOmpangu yOpombanda mOshakati. Omupanguli Liebenberg ota lopotelwa kOmuadfokaate gwEpangelo Neville Wamambo, omanga omupangulwa Nkasi e lilwepo ku Hahende Frieda Kishi gwEhangano lyoohahende lya Kishi.