Oshipotha kombinga yepato lyoluvalo

OSHIPOTHA moka aakiintu 15 mboka ta ya lumbu noHIV ta ya tamaneke epangelo molwaashoka aniwa oya patwa oluvalo kaashi shi pahalo lyawo ota shi pulakenwa mompangu yopombanda moVenduka nena.

Aakiintu mbaka taya kalelwapo kehangano lyo Legal Assistance Centre ota ya ti epangelo nUuministeli Wuundjolowele owa yonagula uuthemba wayo sho weya pata yaamonewe uunona kaashishi pahalo nopazimino lyawo.Ota ya tamaneke epangelo kutya olye ya tongola shiikwatelela konkalo yawo ongo aantu taya mwenya nombuto yo HIV nomolwaashoka yo aakiintu.Omukiintu kehe gumwe ota pula epangelo li fute omiliona yimwe molwa eyonagulo.Ndele manga omaumbangi noshowo oompata inaadhi gandjwa kombinga yokupatwa oluvalo, opena oshinima shimwe osho tashi ningwa tango.Pethimbo oshipotha shika sha etwa kompangu omwedhi gwa yi epangelo olya li lya ti kutya pa mpango yaaniilonga yepangelo yomumvo 1995 aakiintu mbaka oya li ye na oku ninga shika meni lyoomwedhi dhili 12 konima sho etando lyengambeko lyoluvalo lya ningwa.Epangelo ngashingeyi ota li ti aakiintu mbaka kaye na oshipotha shi na oonkondo dha sha oshoka omatando ngoka oga ningilwe konima yoomwedhi 12. Oshipotha shika onkene ka shi na sho ta shi ,oshoka osha ningwa pwa pita ethimbo ele.Ndele Norman Tjombe ngoka ta kalelepo aakiintu mbaka okwa ti ompango ndjika ina yi guma aakiintu mbaka oshoka ndjika oha yi wilike nokupangela aaniilonga yepangelo na ka yi na sha nokwaa uvathana pokati kepangelo naakwashigwana yowala.Ngele osheya mpoka kutya ompango ndjika ota yi vulu okulongithwa moshipotha shika nena tse otatu ka tya ompango ndjika ota yi kondjitha ekotampango molwaashoka ota yi yono uuthemba waantu shi na sha nokupulakenwa kwopa yuuki.Tjombe okwa ti epulo kombinga yompango yiilonga yepangelo olya simana unene tuu okushitalela miipotha mbyoka ha yi ningilwa epangelo ndele ka yi nasha niinima yiilonga yaaniilonga yepangelo. Shika okwa ti otashi ngambeke uuthemba waakwashigwana oku ya kompangu opo ya ulike kutya shika ota shi yono uuthemba wawo wopakotampango opo ya vule okupulakenwa komeho gompangu.Okwa ti molwa omatompelo ngaka iitopolwa mbika ka yi na okuhupa moshilongo shuudemokoli wakankamekelwa kekotampango.Oshipotha shaakiintu mbaka ota shi ka pulakenwa ashike konima ngele oompata dhi na sha nompango yaaniilonga yomepangelo dha pulakenwa etadhi gandjelwa etokolo.