Oshipangelo shaNandjokwe shi li monkalo tayi etitha ohenda

Onkalo yoshipangelo shaNandjokwe moshitopolwa shaShikoto otayi tulitha omutse kepepe, moka omashina gokuyoga ga teka, omalapi ga kaka omanga gamwe oga kulupa.

Onkalo ndjoka oyu uvitha nayi okomitiye yomutumba gwopashigwana miipambele yuuthikepamwe, omapendulopo gopankalathano osho wo iipambele yaakwanezimo, sho ya talele po oshipangelo shoka mEtine lya zi ko.

Okomitiye ndjoka oyi li molweendo lwokutalelapo iipangelo monooli yoshilongo opo ya tale kutya oyi li monkalo yi li ngiini.

Oshiwike sha zi ko oya talele po iipangelo ngaashi shaTsandi, shOutapi, shaNgela, shaShakati, shaNandjokwe, shaMuthiya osho wo shaTsumeb(Oshomeya).

Osheendo shokomitiye ndjoka osha thikama po miilyo yomutumba gwopashigwana yongundu yoSwapo ngaashi Ephraim Nekongo, Paula Kooper, Emilia Nuyoma-Amupewa, Maria Elago, oshilyo shongundu yo-Republican Party momutumba gwopashigwana Hirlinde Tjiveze osho wo oshilyo sho-Popular Democratic Movement (PDM), Jennifer van den Heever.

Etalelopo ndyoka olya hwahwamekwa kosheetwapo shoka kwa li sha tulwa poshitaafula omumvo gwa zi ko megumbo lyopashigwana koshilyo shongundu yo-PDM, Winnie Moongo opo ku kundathanwe ko ku ningwe omakonakono kombinga yonkalo ya nayipala miipangelo unene tuu miipangelo yaantu mboka ye na uunkundi wopamadhiladhilo.

Okomitiye ndjoka oya tameke olweendo lwawo momasiku 6 Auguste.

Omukwatelikomeho gwokomitiye ndjoka, Nekongo, okwa holoka okwaauvanawa unene tuu konkalo yoshipangelo shaNandjokwe moka haya longitha omalapi gokoombete ga kulupa ishewe kage li monkalo yokulongithwa.

“Sho kwa li tatu popi kutya epangelo olya pumbwa okulanda omalapi, shika osho kwa li tatu popi. Omalapi oga kulupa noonkondo omanga omashina gokuyoga oga teka,” osho Nekongo a popi ngaaka.

Nekongo okwa popi kutya aanambelewa yomoshipangelo oye mu tseyithile kutya ohaya kala nokugandja omaindilo gokupewa omalapi omape, ashike ihaya pewa sha, ishewe inaya pitikwa okulanda omalapi gawo kuyoyene ongoshipangelo.

“Ohatu kala tatu popi kutya ooyakwetu mOvenduka ohaya landa iinima yokutuminwa komahala galwe, ashike shika osho tu li musho huka,” osho a popi ngaaka.

Nekongo okwa popi kutya uuministili owa kala tawu yakula omanyenyeto ogendji okuza kiipangelo ashike oye shi tala ko owala ongomashendjo.

“Iipangelo oya pumbwa omalapi omape nomakumbatha osho wo omizalo dhaapangi, naashoka osha pumbwa okuningwa mbala ngaashi tashi vulika. Ando iipangelo okwa li ya pewa oshinakugwanithwa shokulanda omalapi kuyoyene, ando aavu itaya mono iihuna ngeika,” osho Nekongo a popi ngaaka.

Okwa gwedha po kutya okomitiye yawo otayi talele po iipangelo opo yi ku ulukile minista guundjolowele osho wo omukuluntuwiliki gwe kombinga yomashongo ngoka taya adha moshipangelo kehe.

“Omalapi ngaka agehe oga kulupa naayopaleki oya lombwele ndje kutya otaye ke ga hondja molwashoka kaye na shilwe taya vulu okuninga po,” osho a popi ngaaka.

“Epangelo nali lande, ngele oshimaliwa opo shi li. Minista nomukuluntuwili gwoye, itatu vulu nande okutsikila nonkalo ndjika,” osho Nekongo a popi ngaaka.

Nekongo okwa popi kutya okomitiye itayi lalakanene okuholola kutya minista ita longo iilonga ye, molwashoka opu na iilonga yomupondo mbyoka tayi longwa miipangelo.

Omukuluntu gwaapangi Helena Nghipandulwa, ngoka a kala omupangi moshipangelo shaNandjokwe okuza mo1989, okwa tseyithile okomitiye kutya omalapi gomoshipangelo ngoka taya longitha ngashingeyi oongoka kwa li haga longithwa pethimbo oshipangelo sha li kohi yelelo lyongeleka, omanga inaashi gandjwa momake gepangelo.

“Okuza mpoka inatu yakula we omalapi,” osho meme Nghipandulwa a popi ngaaka.

Okomitiye ndjoka natango oya mono kutya omashina gokuyoga moshipangelo oga teka nomalapi ohaga tumwa koshipangelo shEngela moshitopolwa shaHangwena oko ga ka yogelwe.

Oshipangelo shaNgela otashi adhika omukaakena gwa konda pookilometa 100 okuza poshipangelo shaNandjokwe.

Pokati mpoka, okomitiye oya ndhindhilike wo kutya oomeme mboka ye na omategelelo oya kala haya longitha ootenda okuza mo2018 molwashoka etungo lyokanyothi onkene inaali pwa okutungwa.

Nekongo okwa popi kutya iilonga yetungo lyokanyothi onkene yi li metifa, omanga kwa li yi na okukala ya manwa nale mo2018.

“Ando okanyothi okali kapwa okutungwa ando uupyakadhi mbuka tawu shi we . . . epangelo nali endeleleke iilonga opo okanyothi kapwe yo oomeme mboka ye na omategelelo ya kale momudhingoloko gu li nawa,” osho Nekongo a gwedha po ngaaka.

Sho a kwatathanwa naye, minista guundjolowele nomayakulo gonkalonawa Kalumbi Shangula okwa yamukula kutya ita vulu okutya ko sha molwashoka okuli moshigongi.