Oshipangelo sha Shakati otashi hepeke aapangwa DTA ta ti

PETHIMBO ta po pitha oshigongi sho DTA pElyambala/Okaku mOngwediva moShana mOsoondaha , Amushangandjayi gwo DTA omusamane McHenry Venani, okwa ti Oshipangelo shEpangelo sha Shakati otashi hepeke oonakupangwa, unene tuu mboka haye ya okukonaakonwa koondohotola, okupangwa, okupewa omiti nokushuna komagumbo.

Omusamane Venani ta ti oshigwana hashi mono epango moshipangelo sha Shakati otashi nyenyeta unene komayakulo ina giihwapo go itaga endelele. Ta ti aanuuvu mboka haye ya koshipangelo okumona omakonaakono, okupangwa, okutaamba omiti nokushuna komagumbo ohaya kala unene ethimbo ele momikweyo, inaya mona omayakulo. Yamwe ohashi vulika ya shune komagumbo inaya mona omundohotola, naamboka ya mona oondohotola, otashi vulika ya shune komagumbo inaya mona omiti dhawo molwashoka kaya yakulwa nziya ko aputeka, hoka haku kala omikweyo omileeleka.Aanuuvu oyendji ohaya kala ya loloka noonkondo nokugwila po, nenge ya shune komagumbo inaya mona omiti dhawo, ngashi ye dhi shangelwa koondohotola.Oshinima shimwe omusamane Venani ta ti, omiti ndhoka hadhi pewa aanuuvu moshipangelo sha Shakati konima yethimbo ele odho ashike opanado, kutya nee oto ehama omukithi gwatya ngiini, inagu gwana okupewa opanado.Venani ota ti nee kutya, ngele oDTA oya hogololwa ndele tayi yi koshipundi, otayi ka kutha po uudhigu mbuka. Ta yi ka tunga po ofaabulika onene yomiti moka tamu ka ningwa omiti dhokupanga omikithi dhi ili nodhi ili ndele oshigwana tashi mona epango lyongushu, na kali shi ndjoka tali pewa oshigwana pethimbo ndika kepangelo lyOswapo.Ta ti DTA otaka tula po wo omayakulo taga endelele opo aanuuvu ya endelelwe po okumona oondohotola nomiti dhawo.Omusamane Venani okwa popya wo kombinga yAanangeshefa yAachina noshigwana shAachina mo Namibia. Ta ti ngele Namibia ita kotoka, otamu ka mona ashike sho oshigwana shAachina, moNamibia tashi ihilile petata lyAanamibia, nenge ya kale ye vule po nokuli, oshoka ngashingeyi oye li mo nale momwaalu omunene.Ta ti aanangeshefa yAachina oya tameka nale okudhipaga po oongeshefa dhAavalelwamo notaya tsikile oku dhi dhipaga mo meendelelo. Taya shingitha nokomikunda hoka, ye na uundingosho nokuli. ‘mEpangelo lyoDTA, ndyoka tali ka kala nOmusamane Katuutire Kaura Omupresidende, Fillemon Moongo Omuprima na nangaye Venani ndi li Oministeli yIikwapondje, otashi ka kala sha yela kutya ngaye ongOministeli yIikwapondje, otandi ka tula po omalandulathano ge li nawa ge na sha nokuya nokukala moshilongo shetu Namibia kaakwiilongo.Shi na sha nOmagumbo moNamibia, Venani okwa ti kutya Epangelo lyOswapo olya nyengwa okupa aantu omagumbo. Ta ti, eeno, Oosamende noshowo iitungitho yilwe oya ninga ondilo, ashike nee Namibia oku na oondundu moka mu na omamanya ogendji taga vulu okutungitha omagumbo, ngashi ngaa mo Namibia muka mu na omagumbo nomatungo gamwe ga tungwa nomamanya.Omusamane Venani ta ti ngele oDTA oya yi koshipundi, otayi ka kutha po ompumbwe yomagumbo ndjika, unene okukakonga omukalo gumwe gwokutunga omagumbo, unene tuu okulongitha oonzo dhopauntshitwe, ngashi omamanya oku za moondundu moka nokutunga omagumbo.Kombinga yEfundja ha li adha Onooli nokuyona ombili yaakalimo, omusamane Venani okwa ti epangelo, sigo oompaka olya nyengwa okutula po omalandulathano ge li nawa gokukelela efundja li tsikile nokuhepeka oshigwana.Ta ti muule woomvula mbali dhefundja moNooli, epangelo sigo oompaka ina li ninga po sha shomupondo, nomvula ndjika onkee oshigwana sha tegelela uupyakadhi womeya gefundja. Ta ti, Epangelo lyo DTA, otali ka ninga omikanka dhokutondoka omeya ga ze mo, mokati koshigwana. Ta li ka ninga wo omatale omanene gokukwata omeya, opo ngele efundja lya yi, oshigwana shi kale po shi na omeya gasho nogiimuna. Omusamane Venani okwa popya wo kombinga yUulingilingi moshilongo. Ta gandja uusama kEpangelo nOmupresidende gwalyo kutya otaya hu oshigwana omihoka komilungu, sho taya ti kutya otaya kondjitha uulingilingi, omanga uulingilingi wa thinda ashike pombanda, unene wu li maakuluntu. Yamwe, Venani, ta ti, taya shunwa miilonga nonande ya li ya fekelwa momaulingilingi gontumba nongandi.