Oshipangelo sha Muthiya miilonga omaandaha gaziko

OSHIPANGELO oshipe sha Muthiya shoka sha tungilwa epangelo lya Namibia kepangelo lya China omagano, sha tameka okulonga ongula yomaandaha okuza sho sha pu kulongwa pehulilo lyomumvo gwayi.

Gavena yoshitopolwa sha Shikoto, Penda ya Ndakolo, oye a tseyithile oshifo shika Osoondaha ya zi ko kutya oshipangelo shika osha tamekele niilonga yasho yepango Omaandaha, pama longekidho okuzilila kUuministeli wUuhaku nIilonga yOnkalonawa. nawa.Ongula yomaandaha, kaansela gwoshikandjohogololo sha Muthiya, Armas Amukoto, okwa tseyitha mOradio NBC Oshiwambo kutya aavu ayehe mboka haya talele po oklinika ya Muthiya okuza ongula yomaandaha naya kale taya ka mona epango koshipangelo oshipe sha Muthiya molwashoka otashi tameke okulonga ongula yOmaandaha.Aakwashigwana, unene tuu mboka yomOmuthiya, oya kala taya nyenyeta koshipangelo shawo sha pwa nalenale okutungwa ndele itashi tameke okulonga. Ya kala tayi ipula kutya oshike naanaa ano she shi imba shi tameke okulonga, ano okuyakula, okupanga aavu nosho tuu.Oshifo shika osha uvu enyenyeto ndika lyoshigwana nosha ningi ekonaakono nokushanga oshinima shika. Tashi ti nee ano kutya eendelelo lyokutameka niilonga moshipangelo shika oshipe sha Muthiya, olye ya po sho The Namibian petameko lyomwedhi nguka a yi ko no kwaadha onkalo yoshipangelo shika yi li menaipalo enene lyomakende ga tatuka mo noshowo oopalafona moombuli dhoondunda dhimwe dha tekauka mo, omalamba gopondje nomeni lyoondunda ga teka noga dhima, uundjugo wuli monkalo ombwinayi, omiyelo ominene dhokuya moshipangelo moka dha tameka okuyonuuka nokupepwa po kombepo noshowo nee ehala lyoshipangelo ashihe li li lyuudha omwiidhi omuleeleka. Sho nee ayihe mbika ya shangwa mOshifo shika, osha pendula mboka ye shi tunga noku shi gandja omagano kepangelo lya Namibia noshowo epangelo lyolyene, unene tuu Uuministeli wUuhaku wa Namibia, yi itule mo metulomiilonga lyoshipangelo shika meendelelo ngashi tashi vulika.Gavena yaNdakolo, okwa lombwele The Namibian kutya okwa kutwa oondohotola dhi li ne (4) ndhoka tadhi ka panga moshipangelo oshipe sha Muthiya. Ta ti wo kutya omwa kutwa aapangipangi ye li 145 naamboka ye li pokuninga aapangipangi naaniilonga ye li pethele lwaampoka noshowo aaopaleki ye vulithe pethele nomilongondatu (130).Gavena ya Shikoto, ta ti shika oshinima oshiwanawa lela, molwashoka osha gandja iilonga kaakashigwana oyendji mboka ya kala nale kaye na iilonga.Oyendji yomaakwashigwana oya nyanyukwa molwashoka oya kondwa omagulu okuya koshipangelo sha Nandjokwe nenge shoka shepangelo sha Shakati ya ka mone epango. Ya kala haya ende ookilometa ethele nasha okuya kiipangelo mbyoka. ‘ Otwa pandula epangelo lyetu sho lye tu tungila oshipangelo oshinene mOmuthiya notu wete kutya uuhaku moshitopolwa shika sha Muthiya otau ka enda nawa noyendji otaya ka mona uukolele wiihwapo nawa,’ gumwe gwomaakwashigwana ya pandula, ta ti ngawo.Oshigwana sho sha nyenyeta kutya omolwashike oshipangelo shika itashi tameke ano okulonga sho sha pwa nale okutungwa, nosha shangwa wo ngawo ko The Namibian, mboka ye shi tunga yokampani yedhina, China Jiangsu International Namibia, kaya li ye uvitile The Namibian ombili sho a shanga onkalo yoshipangelo moka sha li konima sho sha pu kutungwa nokukala mpoka itashi longithwa. Omukwatheli gwOmukuluntu gwOkampani ndjika, Kathay Lee, a nyenyetele naye ta ti, yo oshipangelo shika oya mana nale okushi tunga noye shi gandjele wo nale kepangelo lya Namibia pehulilo lyomumvo gwayi. Ta ti yo oye wete kutya iinima mbyoka ya yonuuka mo, oshe ya sho pwa piti ethimbo ele inashi tulwa miilonga. Ta ti molwashoka oyo ye shi tunga, oya tula mo aantu yawo yamwe ya kale ya kelela mo manga epangelo lya Namibia, ano Uuministeli wUuhaku, tau tameke noku shi longitha. Kombinga yuundjugo wa kala wuudha onyata, sho oshipangelo inashi tameka okulongithwa, Lee okwa ti kutya oye ke shi mona mo kutya oosekuriti ndhoka hadhi gamene ehala ndyoka, ohadhi longitha uundjugo mboka. Lee ta uvaneke kutya iinima yilwe mbyoka ya yoonuuka mo, ota ye ki yi pangela noku yi tula ishewe ponkatu mpoka ya li nale. Ta ti osho shi li meuvathano lyiilonga mbyoka.The Namibian okwa li a talele po natango oshipangelo shoka mOlyomakaya ga zi ko nokwa adha Uuministeli wUuhaku wi ipyakidhila noonkondo oku langeka aapangi naaniilonga pomahala gawo noshowo okuyeleka nawa oshipangelo ashihe. Pu na lela eyooloko enene oku shi yelekanitha netalelopo lyotango lyo The Namibian petameko lyomwedhi nguka koshipangelo shoka.’ Ondi wete onawa lela sho oshipangelo shetu shika oshipeepeeka tashi tameke okulonga opo aantu yetu ya mone epango lyiihwapo nawa nokukondwa wo omagulu okuya kiipangelo yokiitopolwa yilwe. Ngashiingeyi otashi tameke nee niilonga yasho notaku ka longekidhwa nee nawa esiku moka tashi ka egululwa pambelewa,’ Gavena ya Ndakolo ta ti ngawo.. Nande nee ine shi popya kutya olye te ke shi egulula pambelewa.