Oshilongwa oshipe melongo lyaanona poNamcol

EHANGANO lyo Namibia College of Open Learning[Namcol] olya eta po onzapo ompe yelongo lyopetameko melongo lyaanona mboka yeli moshikunino.

Oshilongwa shika osha etwapo melongelokumwe nUuministeli wUukashike Kookantu noshowo oNational Institute of Educational Development[NIED].Enongopeko lyoshilongwa shika olya ningwa nekwathelo lyopashimaliwa sha pitile mopologram yeopaleko lyelongo nenongeko[ETSIP].Namcol okwa ulike ompumbwe yoku longa nokunongeka aalongi yiikunino nenge aagandji yakulo moshigwana.Eputudho nehumithokomeho lyomunona olyo oshitopolwa shelongo lyaayehe, oshoka ndika ota li soshimpwiyu kutya eilongo ota li tsikile okuza kuunona sigo uuna ndoka aalongwa mbaka ya yi pondondo yelongo lyopambelewa,’ osho Ominista yopevi yelongo , Becky Ndjoze-Ojo ya ti.Omuwiliki gwelongo lyopetameko noshowo ndyoka lyoshigwana, Muuministeli wUukashike kookantu,Eline Nghiitwikwa okwa ti opwa kala ehumokomeho enene meholokepo lyiikunino, noshowo melongo lyaanona aashona, ndele nee aalongi oyendji yaanona inaya longwa nawa na kayena uungomba opo ya longe aanona pamukalo gu na ongushu.Nghiitwikwa okwa ti onkene Etsip okwa gandja oshimaliwa opo putungwe omusindalongo ngoka tagu ilongwa kaa ilongi ayehe mboka yahala oku ka longa aanona opo omunona kehe ta yi kenongelo lyoshikunino a vule okukala a longwa nawa moomvula dhopetameko.Okwa ti oku na einekelo kutya oshilongwa shika otashi ka hila aailongi yeli mondjila mboka ye na ohokwe yoku ilonga nkene taya longo aanona, oku ya longekidha opo ya tameke omanongelo goshikunino nokonima ya ka tameke osikola yopevi.Oshilongwa shika otashi kala hashi ilongelwa uule womvula yimwe, pahapu dhomuwiliki gwa Namcol,Vekaama Murangi.