Oshikonga shetuntilo lyokakwenyene mOshikoto

OMUWILIKI gwUuhaku moShikoto, Maria Kavezembi okwa lombwele oThe Namibian oshiwike shika kutya omolu omukithi gwokakwenyene gwiiteyela moshitopolwa sha Shikoto omathimbo ga zi ko, Uuministeli wUuhaku nIilonga yOnkalonawa owa longekidha po oshikonga oshinene shokutuntila oshigwana kombinga yomukithi nguka gwokankwenyene, unene tuu aanona yepipi li li kohi yoomvula ntano.

Kavezembi ta ti okuza tuu mu August omvula ya zi ko 2009, oya kala nokumona omadhidhiliko gokakwenyene mokati koshigwana mpaka naampeyaka mOshitopolwa shi li kohi yOshipangelo sha Nandjokwe mOshitopolwa sha Shikoto, ashike mu Januali nuumvo oga kala taga yi pombanda, unene tuu sho aakwashigwana aakuluntu yane, omulumentu gwoomvula 37 noomeme yatatu yoomvula, 29, 32 no 34 ya pangwa mOshipangelo sha Nandjokwe omolu okakwenyene nokanona kamwe koomwedhi omugoyi ka taambelwa kwali moshipangelo sha Nandjokwe kuyele nuumvo. Me Kavezembi ta ti oyendji yomaanuuvu mbaka oya zile komikunda ngashi Oshiyashomatope moshikandjohogololo sha Nyaanya mOshikoto.Meme Kavezembi ta yelitha ishewe ta ti okwa li wo kwa lopotwa aakalimo yatatu yomomukunda Omunyekadi popepi nOkongo mOshitopolwa sha Hangwena, ashike nee oyomOshitopolwa sha Shikoto, ya kwatwa kokakwenyene. Tashi ti ngoka a kwatwa tango omusamane. A kwatelwa kugo koshitopolwa sha Kongo nokuya mOshipangelo sha Kongo. Sho nee e ya kegumbo kOmunyekadi, okwe gu pe omukulukadhi gwe nokanona kawo kokamati koomvula heyali. Taya pangwa nokweeluka.Omolu omukithi nguka gwokakwenyene, gwa kala nogu li tagu pula komeho, meme Kavezembi ota ti kutya Uuministeli wUuhaku palongelokumwe nAaniilonga yUuhaku mOshipangelo shinene sha Nandjokwe noshowo na Kaansela gwoshikandjohogololo sha Kankolo, tate Josef Iimbili, pamwe naawiliki yakwawo moshikandjohogololo she nAanambelewa ye, oya ningi po oshikonga oshishona shokutuntila aanona yepipi lyoomvula dhi li kohi yoomvula ntano mOshitopolwa shUuhaku shi li kohi yOshipangelo sha Nandjokwe mOshitopolwa sha Shikoto, Otuntila ndjika, meme Kavezembi ta ti, oya li ko nee okuza meti 16 sigo eti 17 Februari 2010 momikunda gashi Oshiyashomaptope moka mwa tuntilwa aanona 219, momukunda Onampengu moka mwa tuntilwa aanona 216, momukunda Okashanakiitembu moka mwa tuntilwa aanona ye li 199, momukunda Ohahati moka mwa tuntilwa aanona ye li 108, momukunda Olukupa moka mwa tuntilwa aanona ye li 102 nomomukunda Omunyekadi moka mwa tuntilwa aanona ye li 42. Aantu ayehe mboka ya tuntilwa moshikonga shika oshishona, meme Kavezembi ota ti kutya oye li 877 lwaampoka.Kavezembi ta ti manga nee ya mana okutuntila ngawo, moshikonga shoka oshishona, oya kundana kutya kOshitopolwa shUuhaku shOshipangelo sha Shomeya moshitopolwa tuu shoka sha Shikoto nako okwiiteyela omukithi gwokankwenyene. Kwa dhidhilikwa aantu omulongo nayatatu (13) ye na omadhidhiliko gokankwenyene, moka gumwe gwomuyo (okanona) kwa kolekwa ke gu na lela. Omolu omukithi nguka tagu ende tagu ihanene noshitopolwa ashihe sha Shikoto, meme Kavezembi okwa ti kutya Uuministeli wUuhaku owa tokola okukaninga oshikonga oshinene shotuntila yokakwenyene moshitopowla sha Shikoto muule woshiwike tashi ya opo ku ka adhike aanona oyendji lela yepipi lyoomvula dhi li kohi yoomvula ntano mOshitopolwa ashihe sha Shikoto. Ta ti etseyitho lyOpambelewa otaye ke li ninga muule womasiku twa thinda , opo oshigwana ashihe shi kale shi shi kutya moshiwike tashiya moShikoto otamu ka kala oshikonga oshinene shontuntila yomukithi gwokakwenyene. Nande ongawo, Kavezembi okwa ti kutya omatuntilo goshito ngoka ga kala po guunona onkee taga tsikile kumwe nomatalelopo komahala guuhaku gokokule, kUuklinika nosho tuu. Ta ti oondohotola dhe, aapangi ye kumwe nAaniilonga yalwe yUuhaku onkee taya longo nuudhiginini ngashi shito noye li komalwilo ethimbo alihe, yi ilongekidhila shoka tashi holoka po. Kavezembi ta pandula noonkondo Aawiliki yomoShikoto, unene tuu ooyene yomikunda sho taya longele kumwe nawa nAanuuhaku. Ta ti naya tsikile ngawo. Ta lombwele aakwashigwana kutya kehe ngoka to mono nenge to monika omadidhiliko gwokakwenyene, wu ye nenge wu falwe nziya koshipangelo opo wu ka mone epango meendelelo. Kavezembi ota ti,e lago enene, sigo oompaka inamu sa omuntu kokakwenyene mOshitopolwa sha sha Shikoto.